01-Apr-2026

ତରଭା,୧ା୪-ସୁବର୍ଣ୍ଣପୁର ଜିଲ୍ଲା ତରଭାବ୍ଲକ ପାଇକବାହାଲ ଗ୍ରାମପଞ୍ଚାୟତର ରାଜପାଲି/ବ୍ରାହ୍ମଣୀପାଲିର ଦେବପୀଠରେ ବାରପାହାଡ ଯାତ୍ରା ଆରମ୍ଭ ହୋଇଯାଇଛି । ଚୈତ୍ରମାସ ତ୍ରୟୋଦଶୀତିଥି ମଙ୍ଗଳବାରଦିନ ବ୍ରାହ୍ମଣୀପାଲି(ମଖନାମୁଣ୍ଡା)ର କୁଠିଘରୁ ବାରବଏଠା ଯାଇ ବାରପାହାଡ ପର୍ବତରେ ଥିବା ଗୁମ୍ଫାରେ ଦେବପୀଠରେ ପୂଜାର୍ଚ୍ଚନା କରାଯାଇଥିଲା । ପରେ ସେଠାରୁ ବାଜାଗଜା ସହିତ ରାତିରେ ଛତର ବଏରଖ ଧରି ଏକ ଶୋଭାଯାତ୍ରାରେ ରାଜପାଲିଗ୍ରାମ ଦେଇ ଡାଲତଳ ରାଜପାଲିପୀଠକୁ ପହଞ୍ଚିଥିଲା । ମଙ୍ଗଳବାର ଠାରୁ ଅଞ୍ଚଳଟି ଚଳଚଞ୍ଚଳ ହୋଇଉଠିଛି । ରାତିରେ ରାଜପାଲିଗ୍ରାମ ଦେଇ ଛତର ଆସିବା ବେଳେ ଗ୍ରାମର ଗଉଁତିଆ ଚକ୍ରଧର ପଣ୍ଡାଙ୍କ ସମେତ ସମସ୍ତଗ୍ରାମବାସୀ ଖଇ,ନଡିଆ,ଧୂପ,ଦୀପ ଓ ପାଣିଧାର ଦେଇ ପୂଜାର୍ଚ୍ଚନା କରିଥିଲେ । ରାତିରେ ରାଜପାଲି ଡାଲତଳ ପୀଠରେ ପୂଜାର୍ଚ୍ଚନା ପରେ ଆଜି ବୁଧବାର ପୁଣି ପୂଜା କରାଯାଇଥିଲା । ବୁଧବାର ରାତିରେ ପୁଣି ବାରପାହାଡ ପର୍ବତରେ ଥିବା ଗୁମ୍ଫାକୁ ପୂଜାପାଇଁ ଯାଇଥିଲା । ନୀୟମ ରହିଛି । ଯେଉଁବର୍ଷ ପୋଢବଳି ପଡେନାହିଁ ସେହିବର୍ଷ ପର୍ବତରୁ କେବଳ ଛତର ଆସି ରାଜପାଲିପୀଠରେ ପୂଜା ହୋଇଥାଏ । କିନ୍ତୁ ଯେଉଁ ବର୍ଷ ପୋଢବଳି ପଡିବ ସେହିବର୍ଷ ହଜାର ହଜାର ସଂଖ୍ୟାରେ ମାନସିକଧାରୀ ଛେଳି,କୁକୁଡା ଓ ପୋଢ ବୋଦା ନେଇ ପର୍ବତର ଗୁ୍‌ମ୍ଫାକୁ ଯାଇ ବଳି ଚଢାଇଥାନ୍ତି । ଚଳିତବର୍ଷ ଦୁଇଟି ପୋଢବଳି ପଡିବାର ରହିଛି । ସେଥିପାଇଁ ବାରପାହାଡ ଦେବଗୁମ୍ଫା ଚଳଚଞ୍ଚଳ ହୋଇଛି । ଆଜି ଚତର୍ଦ୍ଦଶୀ ତିଥିରେ ପୋଢବଳି ଦେଉଥିବା ମାନସିକଧାରୀ ପୋଢ ସହ ଏକ ଛେଳି ବୋଦା ନେଇ ମେଣ୍ଡାର ଦକ୍ଷିଣମୁଣ୍ଡରେ ଥିବା ମଙ୍ଗଳାସର(ସୁକତେଲନଦୀ)ରେ ଗାଧୋଇବା ପରେ ମେଣ୍ଡାଶୁଣୀ ମନ୍ଦିରରେ ପୂଜାର୍ଚ୍ଚନା କରା ଥିଲେ । ସେହିକ୍ରମରେ ଦୁଇଟି ପୋଢବୋଦା ଓ ଛେଳିକୁ ନେଇ ମଙ୍ଗଳାସରରେ ଗାଧୋଇବା ପରେ ମେଣ୍ଡାଶୁଣୀ ମନ୍ଦିରରେ ପୂଜା କରାଯାଇଥିଲା । ସେଠାରୁ ରାଜପାଲି ପୀଠକୁ ଅଣାଯାଇ ପୂଜାର୍ଚ୍ଚନା ପରେ ସଂଧ୍ୟାରେ ବାରାପାହାଡ ପର୍ବତର ଗୁମ୍ଫାକୁ ନିଆଯାଇଥିଲା । ବିଳମ୍ବିତ ରାତିରେ ସେଠାରେ ପୋଢବଳି ଦିଆଯଇଛି । ହଜାର ହଜାର ଭକ୍ତ ଓ ମାନସିକଧାରୀଙ୍କ ସମ୍ମିଳିତ ଉଦ୍ୟମରେ ଯାତ୍ରା ସମ୍ପନ୍ନ ହୋଇଛି । ଅନେକ ମାନସିକଧାରୀ କପଡାରେ ନିର୍ମିତ ଛତର ମଧ୍ୟ ଦେଇଛନ୍ତି । ବାଜାଗଜାରେ ବାରପାହାଡ ପୀଠ କମ୍ପିଉଠିଛି । ମଖନାମୁଣ୍ଡାର ଗଣ୍ଡସଂପ୍ରଦାୟର ଝାଙ୍କର ପୂଜକମାନେ ମୁଖ୍ୟପୂଜକ ଜିତେନ୍ଦ୍ରୀୟ ଝାଙ୍କରଙ୍କ ନେତୃତ୍ୱରେ ପୂଜାର୍ଚ୍ଚନା କରିଛନ୍ତି । ଗୁରୁବାର ଦିନ କେବଳ ରାଜପାଲି ଗ୍ରାମବାସୀଙ୍କ ପକ୍ଷରୁ ପୀଠରେ ପୂଜାର୍ଚ୍ଚନା ହେବ । ବଣପାହାଡ଼ ସେନା ପକ୍ଷ୍ୟରୁ ଗୁରୁବାର ରାତିରେ ଅର୍କଷ୍ଟ୍ରl ଓ ବୈଠକୀ କୀର୍ତ୍ତନ ର ଆୟୋଜନ କରାଯାଉଛି l