07-Mar-2026

ବରପାଲି:-(ସୁଦାମ ଦୀପ)ବରଗଡ଼ ଜିଲ୍ଲାର ଭେଡେନ ବ୍ଲକ ଅନ୍ତର୍ଗତ ରେଶମ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ୧୨୫ ବର୍ଷ ପୂର୍ତ୍ତି ଅବସରରେ ଶତପଞ୍ଚବିଂଶତି ଜୟନ୍ତୀ ମହୋତ୍ସବ ପାଳନ ପାଇଁ ବ୍ୟାପକ ଭାବେ ପ୍ରସ୍ତୁତି ଆରମ୍ଭ ହୋଇଛି । ଶିକ୍ଷା, ସଂସ୍କୃତି ଓ ସାମାଜିକ ଉନ୍ନତିରେ ଏହି ପ୍ରାଚୀନ ବିଦ୍ୟାଳୟର ଅବଦାନକୁ ସ୍ମରଣ କରି ଏହି ଐତିହାସିକ ଅବସରକୁ ଆଡମ୍ବରପୂର୍ଣ୍ଣ ଭାବେ ପାଳନ କରିବା ପାଇଁ ଶତପଞ୍ଚବିଂଶତି ଜୟନ୍ତି ମହୋତ୍ସବ କମିଟି ତରଫରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ଉଲ୍ଲେଖନୀୟ ଯେ, ରେଶମ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରତିଷ୍ଠା ସନ ୧୯୦୦ ମସିହାରେ ତତ୍କାଳୀନ ବ୍ରିଟିଶ ସରକାରଙ୍କ ଶାସନକାଳରେ ହୋଇଥିଲା। ସେହି ସମୟରୁ ଆରମ୍ଭ କରି ଏହି ବିଦ୍ୟାଳୟ ଅଞ୍ଚଳର ଶିକ୍ଷାକ୍ଷେତ୍ରରେ ଏକ ପ୍ରମୁଖ କେନ୍ଦ୍ର ଭାବେ ପରିଚିତ ହୋଇଆସୁଛି। ଦୀର୍ଘ ୧୨୫ ବର୍ଷର ଯାତ୍ରାରେ ଏହି ବିଦ୍ୟାଳୟ ଅନେକ ପ୍ରତିଭାଶାଳୀ ଛାତ୍ରଛାତ୍ରୀଙ୍କୁ ଗଢ଼ି ତୋଳିଛି, ଯେଉଁମାନେ ଆଜି ବିଭିନ୍ନ କ୍ଷେତ୍ରରେ ଦେଶ ବିଦେଶରେ ସମାଜର ସେବା କରୁଛନ୍ତି। ଏହି ପ୍ରାଚୀନ ଶିକ୍ଷା ପ୍ରତିଷ୍ଠାନର ଗୌରବମୟ ଐତିହ୍ୟକୁ ସ୍ମରଣ କରିବା ପାଇଁ ଶତପଞ୍ଚବିଂଶତି ଜୟନ୍ଧୀ ମହୋତ୍ସବକୁ ବିଶେଷ ଭାବେ ପାଳନ କରାଯିବାକୁ ଯୋଜନା ରହିଛି। ଏହି ମହୋତ୍ସବକୁ ଅଧ‌ିକ ଗୌରବମୟ କରିବା ପାଇଁ ମହୋତ୍ସବ କମିଟି ପକ୍ଷରୁ ଓଡ଼ିଶାର ମାନ୍ୟବର ରାଜ୍ୟପାଳ ଡଃ କମ୍ଭମ୍ପତି ହରିବାବୁ ଏବଂ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଔପଚାରିକ ଭାବେ ନିମନ୍ତ୍ରଣ ପ୍ରଦାନ କରାଯାଇଛି। ଏହି ନିମନ୍ତ୍ରଣ ପ୍ରଦାନ ସମୟରେ ବରଗଡ଼ ଲୋକସଭା କ୍ଷେତ୍ରର ମାନ୍ୟବର ସାଂସଦ ପ୍ରଦୀପ ପୁରୋହିତ ମଧ୍ୟ ଉପସ୍ଥିତ ଥିଲେ। ନିମନ୍ତ୍ରଣ ଗ୍ରହଣ କରି ମାନ୍ୟବର ରାଜ୍ୟପାଳ ଓ ମୁଖ୍ୟମନ୍ତ୍ରୀ ଉଭୟେ ଏହି ଐତିହାସିକ ଅବସରରେ ଆୟୋଜିତ ହେବାକୁଥ‌ିବା ଶତପଞ୍ଚବିଂଶତି ଜୟନ୍ତୀ ମହୋତ୍ସବରେ ଯୋଗଦାନ କରିବାକୁ ସକାରାତ୍ମକ ମନୋଭାବ ପ୍ରକାଶ କରିଥିବା ସୂଚନା ମିଳିଛି। ଏହି ମହୋତ୍ସବ ଅବସରରେ ପୁରାତନ ଛାତ୍ରଛାତ୍ରୀଙ୍କର ମିଳନ ଉତ୍ସବ, ସାହିତ୍ୟ ଓ ସାଂସ୍କୃତିକ କାର୍ଯ୍ୟକ୍ରମ, ଛାତ୍ରଛାତ୍ରୀଙ୍କ ପାଇଁ ବିଭିନ୍ନ ପ୍ରତିଯୋଗିତା, ସ୍ମାରକ ପ୍ରକାଶନ ଓ ସମ୍ମାନ ଅର୍ପଣ ଭଳି ବିଭିନ୍ନ କାର୍ଯ୍ୟକ୍ରମ ଆୟୋଜନ ପାଇଁ ମହୋତ୍ସବ କମିଟି ପକ୍ଷରୁ ଯୋଜନା କରାଯାଉଛି। ଏହା ସହ ଏହି ବିଦ୍ୟାଳୟ ସହ ଜଡିତ ପୂର୍ବତନ ଶିକ୍ଷକ, ପୁରାତନ ଛାତ୍ରଛାତ୍ରୀ ଓ ଅଞ୍ଚଳର ସମାଜସେବୀ ମାନଙ୍କୁ ସମ୍ମାନିତ କରିବା ପାଇଁ ମଧ୍ୟ ବିଶେଷ ବ୍ୟବସ୍ଥା ରହିଛି। ମହୋତ୍ସବ କମିଟି ସଦସ୍ୟ ମାନଙ୍କ କହିବା ଅନୁସାରେ, ୧୨୫ ବର୍ଷର ଏହି ଐତିହାସିକ ଅବସର କେବଳ ବିଦ୍ୟାଳୟ ପାଇଁ ନୁହେଁ, ସମଗ୍ର ଅଞ୍ଚଳ ପାଇଁ ଗୌରବର ବିଷୟ। ଏହି ମହୋତ୍ସବ ମାଧ୍ଯମରେ ବିଦ୍ୟାଳୟର ଐତିହ୍ୟ, ପରମ୍ପରା ଓ ଶିକ୍ଷାର ମହତ୍ତ୍ବକୁ ନୂତନ ପିଢ଼ୀ ସମ୍ମୁଖରେ ପ୍ରସ୍ତୁତ କରାଯିବ। ସେହିପରି ଆଗାମୀ ଦିନରେ ବିଦ୍ୟାଳୟର ଉନ୍ନତି ଓ ଆଧୁନିକୀକରଣ ପାଇଁ ମଧ୍ୟ ଏହି ଅବସରରେ ଆଲୋଚନା କରାଯିବ ବୋଲି ସୂଚନା ମିଳିଛି। ନିମନ୍ତ୍ରଣ ପ୍ରଦାନ କାର୍ଯ୍ୟକ୍ରମରେ ମହୋତ୍ସବ କମିଟି ପକ୍ଷରୁ ଦେବେନ୍ଦ୍ର ପାତ୍ର, ମନୋଜ କୁମାର ପ୍ରଧାନ, କୈଲାଶ ସେଠ, ସଂଜୁ ବିଶି, ସୁନୀଲ କୁମାର ବାରିକ ପ୍ରମୁଖ ଉପସ୍ଥିତ ଥିଲେ। ସେମାନେ ମହୋତ୍ସବକୁ ସଫଳ କରିବା ପାଇଁ ସମସ୍ତଙ୍କ ସହଯୋଗ ଆଶା କରିଛନ୍ତି। ରେଶମ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଶତପଞ୍ଚବିଂଶତି ଜୟନ୍ତୀ ମହୋତ୍ସବକୁ ନେଇ ଅଞ୍ଚଳରେ ଉତ୍ସାହ ଓ ଆନନ୍ଦର ପରିବେଶ ଦେଖାଯାଉଛି।ବିଦ୍ୟାଳୟର ପୁରାତନ ଛାତ୍ରଛାତ୍ରୀ, ଅଭିଭାବକ ଓ ସ୍ଥାନୀୟ ବାସିନ୍ଦାମାନେ ମଧ୍ୟ ଏହି ଐତିହାସିକ ଅବସରକୁ ସ୍ମରଣୀୟ କରିବା ପାଇଁ ଅପେକ୍ଷାରେ ରହିଛନ୍ତି।