04-Mar-2026

ବର୍ତ୍ତମାନ ଯୁଗରେ କୋଚିଂ ଏକ ଭଲ ବ୍ୟବସାୟ ।ଏହି ବ୍ୟବସାୟ କୁ ଲୋକେ ନିଜର ରୋଜଗାରର ମାଧ୍ୟମ କରି ହଜାର ହଜାର ଟଙ୍କା କମାଉଛନ୍ତି । କିନ୍ତୁ ବଲାଙ୍ଗୀର ଜିଲ୍ଲା ରାମଚନ୍ଦ୍ରପୁର ସରକାରୀ ବାଳିକା ଉଚ୍ଚ ବିଦ୍ୟାଳୟରେ ସହକାରୀ ଶିକ୍ଷକ ଭାବରେ କାର୍ଯ୍ୟରତ ଅଭୟ ଚରଣ ତ୍ରିପାଠୀ ଟିକେ ଭିନ୍ନ । ସେ କୋଚିଂ କୁ ସେବା ଭାବି ଦେଇଚାଲିଛନ୍ତି ମାଗଣା ଶିକ୍ଷା । ଉଭୟ ଅଫଲାଇନ୍ ଓ ଅନଲାଇନ୍ ମାଧ୍ୟମରେ ତାଙ୍କର ଏହି କାର୍ଯ୍ୟ ବେଶ୍ ଭଲ ଭାବରେ କରିଚାଲିଛନ୍ତି ସେ । ଯାହା ଦ୍ଵାରା ପ୍ରତ୍ୟେକ ଦିନ ପ୍ରାୟ ୨୦୦ ଛାତ୍ର ଛାତ୍ରୀ ଅଫଳାଇନ୍ ଓ ୩୦-୪୦ ଜଣ ଅନଲାଇନ୍ ରେ ଉପକୃତ ହେବା ସହିତ ଗତ ୬ ବର୍ଷ ରେ ପାଖାପାଖି ୯୦୦ ରୁ ଅଧିକ ଛାତ୍ର ଛାତ୍ରୀ ଯୋଡ଼ି ହୋଇ ସାରିଲେଣି ।ଯାହା ଛାତ୍ରଛାତ୍ରୀ ଓ ଅଭିଭାବକଙ୍କ ଗହଣରେ ବେଶ୍ ଗ୍ରହଣ ଯୋଗ୍ୟ ହୋଇଅଛି । ଦେଓଗାଁ ବ୍ଲକର ଜରାସିଂହା ପଞ୍ଚାୟତ ଅନ୍ତର୍ଗତ ବରକାନୀ ଗ୍ରାମର ଶ୍ରୀଯୁକ୍ତ ଦ୍ଵାରୁ ତ୍ରିପାଠୀ ଓ ଶ୍ରୀମତୀ କୁମୁଦିନୀ ତ୍ରିପାଠୀଙ୍କ ସାନ ପୁଅ ଅଭୟ ନିଜ ବଡ଼ ଭାଇ ଶ୍ରୀ ପ୍ରଦୀପ କୁମାର ତ୍ରିପାଠୀଙ୍କ ଦିଗ୍ ଦର୍ଶନ ରେ ନିଜ ଗ୍ରାମ ବିଦ୍ୟାଳୟରୁ ପାଠ ପଢା ଆରମ୍ଭକରିବା ପରେ ନେତ୍ର ଭାନୁ ଉଚ୍ଚ ବିଦ୍ୟାଳୟରେ ଦଶମ ପର୍ଯ୍ୟନ୍ତ, ରାଜେନ୍ଦ୍ର ବିଶ୍ଵବିଦ୍ୟାଳୟରେ ଯୁକ୍ତ ଦୁଇ, ପୁରୀ ସଦାଶିବ କେନ୍ଦ୍ରୀୟ ସଂସ୍କୃତ ବିଶ୍ଵବିଦ୍ୟାଳୟ ରେ ଯୁକ୍ତ ତିନି ସାରି ବିଏଡ୍ କରି ଥିଲେ । ସେ ଦୁଇଟି ଭାଷା ଇଂରାଜୀ ଓ ସଂସ୍କୃତରେ ପିଜି ମଧ୍ୟ କରି ସାରିଛନ୍ତି ।୨୦୧୯ ମସିହାରେ ରାମଚନ୍ଦ୍ରପୁର ବାଳିକା ଉଚ୍ଚ ବିଦ୍ୟାଳୟରେ ନିଯୁକ୍ତି ପାଇବା ପରେ ପୂର୍ବ ପ୍ରଧାନ ଶିକ୍ଷକ ଶ୍ରୀଯୁକ୍ତ ପର୍ଶୁରାମ ଧରୁଆ ଓ ବର୍ତ୍ତମାନ ର ପ୍ରଧାନ ଶିକ୍ଷୟିତ୍ରୀ ସୁଲତା ପଣ୍ଡା ତଥା ସମସ୍ତ ଶିକ୍ଷକ ଶିକ୍ଷୟିତ୍ରୀଙ୍କ ପ୍ରେରଣାରେ ନବମ ଦଶମ ଶ୍ରେଣୀ ଛାତ୍ରୀ ମାନଙ୍କୁ ମାଗଣା କୋଚିଂ କାର୍ଯ୍ୟକ୍ରମ ଆରମ୍ଭ କରି ଥିଲେ ।କରୋନା ଭଳି ଦୁଃସହ ସ୍ଥିତିରେ ମଧ୍ୟ ସେ ଅନଲାଇନ ମାଧ୍ୟମରେ ଏହାକୁ ଚାଲୁ ରଖିଥିଲେ । ଏହାଦ୍ବାରା ଏସ୍ ସି ଓ ଏସ୍ ଟି ଛାତ୍ରୀ ମାନଙ୍କ ଶିକ୍ଷାର ଅନେକ ମାନ ବୃଦ୍ଧି ହଉଛି। ଏହା ବ୍ୟତୀତ ବିଦ୍ୟାଳୟର କ୍ରୀଡା ଶିକ୍ଷକର ଅଭାବ ଯୋଗୁଁ ନିଜେ ଦାୟିତ୍ଵ ନେଇ କ୍ରୀଡା କ୍ଷେତ୍ରରେ ମଧ୍ୟ ବିଦ୍ୟାଳୟ ପାଇଁ ଅନେକ ସୁନାମ ଅର୍ଜନ କରିଛନ୍ତି । ତାଙ୍କ ନେତୃତ୍ଵରେ ଜୋନ ସ୍ତରୀୟ ଭଲିବଲ୍ ପ୍ରତିଯୋଗିତାରେ ବିଦ୍ୟାଳୟ ଚାମ୍ପିଅନ ହେବାରେ ସଫଳ ହୋଇଥିବା ବେଳେ ଗତ ଦୁଇ ବର୍ଷରେ ଉଭୟ ଆଦିବାସୀ ହରିଜନ କଲ୍ୟାଣ ବିଭାଗ ଓ ଗଣ ଶିକ୍ଷା ବିଭାଗର ବିଭିନ୍ନ ଖେଳକୁଦ ପ୍ରତିଯୋଗୀତାରେ ୧୫ ଜଣ ଛାତ୍ରୀ ରାଜ୍ୟ ସ୍ତରକୁ ଉତ୍ତୀର୍ଣ୍ଣ ହୋଇ ପାରିଛନ୍ତି । ଏହା ସହ ସମଗ୍ର ଓଡ଼ିଶାର ଅନେକ ଛାତ୍ରଛାତ୍ରୀଙ୍କୁ ଅନଲାଇନ୍ ମାଧ୍ୟମରେ ମାଗଣା କୋଚିଂ ପ୍ରଦାନ କରି ଅନେକ ଛାତ୍ରଛାତ୍ରୀଙ୍କୁ  ସିଟି ଏବଂ ବିଏଡ ପ୍ରବେଶିକା ପରୀକ୍ଷାରେ କୃତକାର୍ଯ୍ୟ କରାଇବା ସହ ଅନେକ ପିଲାଙ୍କ ନିଯୁକ୍ତି ରେ ମଧ୍ୟ ସହାୟକ ହୋଇ ପାରିଛନ୍ତି ।ଏହି ସବୁ କାର୍ଯ୍ୟ ପାଇଁ ତାଙ୍କୁ ଗତ ବର୍ଷ ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ମଧ୍ୟ ପ୍ରଦାନ କରା ଯାଇଥିଲା । ପୁନଶ୍ଚ ତାଙ୍କୁ ବିଭିନ୍ନ ଅନୁଷ୍ଠାନ ତରଫରୁ ସମ୍ୱର୍ଦ୍ଧନା ଜ୍ଞାପନ ମଧ୍ୟ କରା ଯାଇଛି ଯଥା ଭୀମ ପାହାଡ଼ ଆଦର୍ଶ ଶିକ୍ଷକ ସମ୍ମାନ, ଅର୍କଶ୍ରୀ ଶିକ୍ଷା ସେବୀ ସମ୍ମାନ(କୋଣାର୍କ), ତେଜସ୍ଵିନୀ ପ୍ରତିଭା ସମ୍ମାନ (ବଲାଙ୍ଗୀର), ଭାରତୀୟ ସାହିତ୍ୟ ଓ ସଂସ୍କୃତି ସାଂସଦ, ସମ୍ବଲପୁର ଦ୍ଵାରା ଆଦର୍ଶ ଶିକ୍ଷକ ସମ୍ମାନ, ସୋମ ଫାଉଣ୍ଡେସନ ଦ୍ବାରା ମାଟି ଗୌରବ ସମ୍ମାନ , ମାଟିଲଗ୍ନା ସମର୍ପିତ ସେବା ସମ୍ମାନ ଆଦି । ତାଙ୍କର ବିଶ୍ବାସ ଶିକ୍ଷା ହିଁ ଏକମାତ୍ର ପନ୍ଥା ଯାହାଦ୍ଵାରା  ସମାଜ ରୁ ଗରିବୀ, ଅନ୍ୟାୟ ଓ କୁସଂସ୍କାର କୁ ଦୂର କରି ପାରିବ । ତେଣୁ ଏହି ଅଧିକାର ସମସ୍ତେ ପାଇବା ଯୋଗ୍ୟ । ଏଣୁ ଶିକ୍ଷାସେବା ମାର୍ଗ ର ବ୍ରତୀ ହେବା ନିମନ୍ତେ ସେ ପ୍ରୟାସ ରତ । ଏସବୁ ଭିତରେ ତାଙ୍କର ନିଶା ହେଉଛି ସାହିତ୍ୟ ସର୍ଜନା । ସେ ଓଡ଼ିଆ, ଇଂରାଜୀ,ହିନ୍ଦୀ, ସଂସ୍କୃତ ଓ ସମ୍ବଲପୁରୀ ଆଦି ପାଞ୍ଚଟି ଭାଷାରେ ସାହିତ୍ୟ ରଚନା କରି ପ୍ରାୟ ୫୦୦ ରୁ ଉର୍ଦ୍ଧ କବିତା ,ଗଳ୍ପ, ପ୍ରବନ୍ଧ ସୃଷ୍ଟି କରି ସାରିଛନ୍ତି । ସାହିତ୍ୟ ପାଇଁ ତାଙ୍କୁ ମାଟିଲଗ୍ନା ଚନ୍ଦନ ସମ୍ମାନ, ଟାଇମ୍ସ ୱାନ୍ କବିଶ୍ରୀ ସମ୍ମାନ, ମାଟିଲଗ୍ନା ଯୁବ କିଶଳୟ ସମ୍ମାନ ପ୍ରଦାନ କରା ଯାଇଛି । ଦେଓଗାଁ ସାହିତ୍ୟ ଘରର ସେ ଜଣେ ସକ୍ରିୟ ସଦସ୍ୟ । ନିକଟଭବିଷ୍ୟତରେ ଅନେକ ଗୁଡ଼ିଏ ପୁସ୍ତକ ପ୍ରକାଶିତ କରିବା ଲକ୍ଷ ରଖିଛନ୍ତି । ତାଙ୍କର ଏହି ସବୁ କାର୍ଯ୍ୟ ଆମ ସମସ୍ତଙ୍କ ପାଇଁ ଏକ ଉଦାହରଣ ସୃଷ୍ଟି କରି ପାରିଛି ।