22-Feb-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀରକୁ ପାଟଣାରାଜ୍ୟର ରାଜଧାନୀ ପରିବର୍ତ୍ତନ ପରେ ପ୍ରଥମେ ଜୁନାଡିହି ଠାରେ ପାଟଣେଶ୍ୱରୀ ଦେବୀ ପୂଜିତ ହୋଉଥିଲେ। ୧୯୦୨ ମସିହାରେ ମାଁ ପାଟଣେଶ୍ୱରୀଙ୍କ ନୂତନ ଜଗନ୍ନାଥ ପଡା ଠାରେ ମନ୍ଦିର ନିର୍ମାଣ ସହ ଦେବୀଙ୍କ ମୂର୍ତ୍ତି ସ୍ଥାପିତ ହୋଇଥିଲେ। ଏହା ପରେ ୧୯୧୫ ମସିହାରେ ଗୋପାଳଜୀ ମନ୍ଦିର ନିକଟସ୍ଥ ଜମିରେ ମାଁ ସମଲେଶ୍ୱରୀଙ୍କ ମନ୍ଦିର ନିର୍ମାଣ କରା ଯାଇଥିଲେ। ମହାରାଜା ପୃଥ୍ୱୀରାଜ ସିଂଦେଓ ଏହାର ନିର୍ମାଣ କରାଇଥିଲେ। ସେହିଦିନ ଠାରୁ ସେହି ମନ୍ଦିରରେ ମାଁ ପୂଜିତ ହେଉଛନ୍ତି ଓ ଭକ୍ତଙ୍କ ଗୁହାରୀ ଶୁଣୁଛନ୍ତି। ତେବେ ଗତ ନବୀନ ସରକାର ଅମଳରେ ରାଜ୍ୟର ଅନେକଗୁଡିଏ ମନ୍ଦିରର ପୁନଃରୁଦ୍ଧାର କରାଯାଇ ଥିଲା। ସେହିକ୍ରମରେ ବଲାଙ୍ଗୀର ସହରର ଗୋପାଳଜୀ ମନ୍ଦିର ପାଇଁ ୬କୋଟି ଟଙ୍କା, କୋସଲ କଳାମଣ୍ଡଳ ପଡିଆ ପାଇଁ ୪କୋଟି ଟଙ୍କା, ପାଟଣେଶ୍ୱରୀ ମନ୍ଦିର ପାଇଁ ୨କୋଟି ଟଙ୍କା ଓ ସମଲେଶ୍ୱରୀ ମନ୍ଦିର ପୁନଃରୁଦ୍ଧାର ପାଇଁ ୨କୋଟି ଟଙ୍କାର ଅନୁଦାନ ମଞ୍ଜୁର ହୋଇଥିଲା। ୨୦୨୪ ସାଧାରଣ ନିର୍ବାଚନ ପୂର୍ବରୁ ବିଜେଡି ସରକାର ଅମଳରେ ଏହି ଅନୁଦାନ ଆସିଥିଲା। ଏବେ ପାଟଣେଶ୍ୱରୀ ମନ୍ଦିର, ଗୋପାଳଜୀ ମନ୍ଦିର ଓ କୋସଳ କଳାମଣ୍ଡଳ ପଡିଆର ଉନ୍ନତିକରଣ କାମ ସରିଯାଇଛି। ପାଟଣେଶ୍ୱରୀମନ୍ଦିର ସ୍ଥାପନର ୧୫୦ବର୍ଷ ପୂର୍ତ୍ତିରେ ପୁନଃସ୍ଥାପନା ଉତ୍ସବ ପାଳନ କରାଯାଇଛି। କିନ୍ତୁ ଦୀର୍ଘ ୩ବର୍ଷ ହେଲା ସମଲେଶ୍ୱରୀ ମନ୍ଦିରର ପୁନଃରୁଦ୍ଧାର ପାଇଁ ଆସିଥିବା ଅନୁଦାନ ପଡିରହିଛି। କାମ ଆରମ୍ଭ କରାଯାଇ ପାରୁନାହିଁ। ଏହାକୁ ନେଇ ଜନଅସନ୍ତୋଷ ବଢିବାରେ ଲାଗିଛି। ଗତ ୪ବର୍ଷ ତଳେ ସମଲେଶ୍ୱରୀ ମନ୍ଦିରର ଛାତ ଭୁଷୁଡି ପଡିଥିଲା। ଏପରିକି ମନ୍ଦିର ଭିତରକୁ ଡ୍ରେନପାଣି ପଶିଯାଉଛି। ଏହାକୁ ନେଇ ଭକ୍ତମାନଙ୍କ ମନରେ ପ୍ରବଳ ଅସନ୍ତୋଷ ଦେଖାଦେଇଛି। ବଲାଙ୍ଗୀର ରାଜପରିବାରର କଳିକେଶ ନାରାୟଣ ସିଂଦେଓ ଗତ ୨୦୨୨ ମସିହାରେ ୨ଲକ୍ଷ ଟଙ୍କା ଦେଇ ଭଙ୍ଗାଛାତର ମରାମତି କରାଇଥିଲେ। ପରେ ୨୦୨୪ ମସିହାରେ ରାଜ୍ୟ ସରକାର ୨ କୋଟି ଟଙ୍କାର ଅନୁଦାନ ଦେଇଥିଲେ। ପୂର୍ତ୍ତ ବିଭାଗ ପକ୍ଷରୁ ଏହାର ପୁନଃରୁଦ୍ଧାର କାମ କରାଯିବାକୁ ଡିପିଆର ପ୍ରସ୍ତୁତ ହୋଇଛି । କିନ୍ତୁ ମନ୍ଦିର ଭିତରେ ପୂଜକଙ୍କ ଘର ରହିଥିବା ଓ ଏହା ମନ୍ଦିର ପରିସରର ଅଧିକଅଂଶ ଜମିରେ ରହିଥିବା କାରଣରୁ ଏହାକୁ ଭାଙ୍ଗି ନବନିର୍ମାଣ ହୋଇପାରୁନାହିଁ । ଭକ୍ତମାନଙ୍କ ଅନୁରୋଧକ୍ରମେ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ ପୂର୍ତ୍ତ ବିଭାଗର ଯନ୍ତ୍ରୀ, ଉପଜିଲ୍ଲାପାଳ ତଥା ତହସିଲଦାରଙ୍କୁ ନେଇ ଅନେକଥର ସମୀକ୍ଷା ବୈଠକ କରି ମନ୍ଦିର ପରିସର ମାପଚୁପ କରି ଅବଶ୍ୟକସ୍ଥଳେ ଭାଙ୍ଗି ପୁନଃନିର୍ମାଣ କରିବାକୁ ନିର୍ଦ୍ଦେଶ କରିଥିଲେ। କିନ୍ତୁ ଦୀର୍ଘ ଦିନର ଅପେକ୍ଷା ପରେ ମଧ୍ୟ ସମଲେଶ୍ୱରୀ ମନ୍ଦିରର ପୁନଃନିର୍ମାଣ କାମ ଆରମ୍ଭ ହୋଇପାରୁ ନାହିଁ। ପୂର୍ତ୍ତବିଭାଗକୁ ଯୋଗାଯୋଗ କଲେ ମନ୍ଦିରର ପୂଜକଙ୍କ ପାଇଁ ନିକଟସ୍ଥ ଗୋପାଳଜୀ ମନ୍ଦିର ପରିସରରେ ଆବାସ ନିର୍ମାଣ ହୋଇଛି । ସେଠିକି ସେ ସ୍ଥାନାନ୍ତର ହେଲେ ସମଲେଶ୍ୱରୀ ମନ୍ଦିର ପରିସରର ଘରକୁ ଭାଙ୍ଗି ଖାଲିକରି ପୁନଃନିର୍ମାଣ କାମ ଆରମ୍ଭ କରାଯିବ ବୋଲି କୁହାଯାଉଛି । ବଲାଙ୍ଗୀରର ଐତିହ୍ୟସୁରକ୍ଷା ଦୃଷ୍ଟିରୁ ସମଲେଶ୍ୱରୀ ମନ୍ଦିରର ପୁନଃରୁଦ୍ଧାରର ଯଥେଷ୍ଟ ଆବଶ୍ୟକତା ରହିଛି । ଭକ୍ତମାନଙ୍କ ଭାବାବେଗ ସହିତ ସମଲେଶ୍ୱରୀ ମନ୍ଦିରର ଆଧ୍ୟାତ୍ମିକ ସମ୍ପର୍କ ରହିଛି। ସେହି ଦୃଷ୍ଟିରୁ ଦେବୋତ୍ତର ବିଭାଗ,ପୂର୍ତ୍ତବିଭାଗ ତୁରନ୍ତ ପଦକ୍ଷେପ ନେଇ ଆସିଥିବା ଅନୁଦାନର ସଠିକ ବିନିଯୋଗ କରି ମନ୍ଦିରର ପୁନଃରୁଦ୍ଧାର କାମ ଆରମ୍ଭ କରିବାକୁ ଜନସାଧାରଣରେ ଦାବି ହେଉଛି।