21-Feb-2026

ବଲାଙ୍ଗିର(ପ୍ରେରଣା ଖବର)-ବଲାଙ୍ଗୀର ପୂର୍ତ୍ତଡିଭିଜନରେ ଠିକାକାମକୁ ନେଇ ଠିକାଦାର-ଯନ୍ତ୍ରୀଙ୍କ ମଧ୍ୟରେ ଗଣ୍ଡଗୋଳ ହୋଇଛି ଓ ଏହାକୁ ନେଇ ଉଭୟ ପଟରୁ ଥାନାରେ ଲିଖିତ ଅଭିଯୋଗ ହୋଇଛି । ତେବେ ରିପୋର୍ଟ ଲେଖାଯିବା ପର୍ଯ୍ୟନ୍ତ ଥାନାରେ ଉଭୟ ପକ୍ଷକୁ ଡାକି ପୋଲିସ ପଚାରଉଚାର ଜାରିରଖିଛି । ମିଳିଥିବା ତଥ୍ୟରୁ ଜଣାପଡିଛି ଯେ,ଗତ ୧୯ ତାରିଖରେ ପ୍ରେମରଂଜନ ପାଣିଗ୍ରାହୀ ନାମକ ଜଣେ ଠିକାଦାର ଓ ତାଙ୍କ ସାଙ୍ଗରେ ଥିବା କିଛି ଠିକାଦାର ପୂର୍ତ୍ତବିଭାଗର ଏସଡିଓ କାର୍ଯ୍ୟାଳୟକୁ ଯାଇ ବାହାର ଠିକାଦାରଙ୍କ ବିଲ ବନ୍ଦକରିବାକୁ ଧମକଦେଇ ଚେତାବନୀ ମଧ୍ୟ ଦେଇଥିଲେ । ଏପରିକି ଯନ୍ତ୍ରୀ ଓ କର୍ମଚାରୀମାନଙ୍କୁ ଜାତିଗତ ଆକ୍ଷେପକରି ଅଶ୍ଲିଳଭାଷାରେ ଗାଳିଗୁଲଜ କରିଥିଲେ । ସେହି ଘଟଣାରେ ପୂର୍ତ୍ତକାର୍ଯ୍ୟାଳୟରେ କେତେକ ଠିକାଦାର ଓ ଅଧିକ୍ଷଣଯନ୍ତ୍ରୀଙ୍କ ମଧ୍ୟରେ ଆଲୋଚନା ମଧ୍ୟ ହୋଇଥିଲା । କିନ୍ତୁ ୨୦ ତାରିଖରେ ପୁଣି ଏହି କଥାକୁ ନେଇ ଅଧିକ୍ଷଣଯନ୍ତ୍ରୀ ଇଂ.ଆଶୁତୋଷ ଜେନା ଓ ଠିକାଦାର ପ୍ରେମରଂଜନ ପାଣିଗ୍ରାହୀଙ୍କ ମଧ୍ୟରେ ବଚସା ହୋଇଥିଲା । ପୂର୍ତ୍ତକାର୍ଯ୍ୟାଳୟରେ କେଉଁ ସାହସରେ ଆସି ଜଣେ ଠିକାଦାର ହୋଇ ଗାଳିକରି ଧମକ ଦେଉଛ କହି ପ୍ରଶ୍ନପଚାରିଥିଲେ । ଏଥିରେ ବଚସା ବଢିଥିଲା ଓ ଯନ୍ତ୍ରୀ ଆଶୁତୋଷ ଜେନା ମଧ୍ୟ ଏକ ରଡ ଆଣି ଠିକାଦାର ଶ୍ରୀ ପାଣିଗ୍ରାହୀଙ୍କୁ ହତ୍ୟାକରିବାକୁ ଉଦ୍ୟମ କରିଥିଲେ ବୋଲି ଅଭିଯୋଗ ହୋଇଛି । ଆଜି ଏନେଇ ପୂ୍‌ର୍ତ୍ତକର୍ମଚାରୀମାନେ କାର୍ଯ୍ୟବନ୍ଦ କରି ଥାନାରେ ଠିକାଦାର ପ୍ରେମରଂଜନ ପାଣିଗ୍ରାହୀ ଓ ଅନ୍ୟମାନଙ୍କ ନାମରେ ଲିଖିତ ଏତଲା ଦେଇଛନ୍ତି । ଠିକ ସେହିପରି ଠିକାଦାର ପ୍ରେମରଂଜନ ପାଣିଗ୍ରାହୀ ମଧ୍ୟ ଅଧିକ୍ଷଣଯନ୍ତ୍ରୀ ଇଂ.ଆଶୁତୋଷ ପାଣିଗ୍ରାହୀଙ୍କ ନାମରେ ଏକ ଏତଲା ଦେଇଛନ୍ତି । ଟାଉନଥାନାରେ ପୂର୍ତ୍ତବିଭାଗର ଯନ୍ତ୍ରୀ ଓ କର୍ମଚାରୀମାନେ ବସିରହି ଅଭିଯୁକ୍ତ ଠିକାଦାରଙ୍କୁ ଗିରଫ କରିବାକୁ ଦାବି କରିଥିଲେ । ଠିକ ସେହିପରି ଠିକାଦାର ପ୍ରେମରଂଜନ ପାଣିଗ୍ରାହୀଙ୍କ ପକ୍ଷରୁ ଠିକାଦାରସଂଘର ସଭ୍ୟମାନେ ପହଞ୍ଚି ଥାନାରେ ହୋହଲ୍ଲା କରିଥିଲେ । ଠିକାଦାରମାନେ ଅଭିଯୋଗ କରିଛନ୍ତି ଯେ,ଅଧିକ୍ଷଣଯନ୍ତ୍ରୀ ବଲାଙ୍ଗୀର ଠିକାଦାରଙ୍କ ବଦଳରେ ବାହାର ଠିକାଦାରମାନଙ୍କୁ ନାମରେ କାମ କରାଉଛନ୍ତି । ଗତ କିଛିଦିନ ତଳେ ବାହାର ଜିଲ୍ଲାର ଠିକାଦାରଙ୍କୁ ବଲାଙ୍ଗୀର ଜିଲ୍ଲାରେ କାମ କରାଇ ଦେବେ ନାହିଁ ବୋଲି ସଂଘ ନିସ୍ପତ୍ତି କରିଥିଲା । ଉଭୟ ପକ୍ଷକୁ ଡାକି ପୋଲିସ ଆଇଆଇସି ଅବନୀ ସାହୁ ପଚାରଉଚାର କରୁଥିବା ଜଣାପଡିଛି ।
ଜିଲ୍ଲା ଠିକାଦାର ବନାମ ବାହାର ଠିକାଦାର ; ଜିଲ୍ଲା ଠିକାଦାର ବନାମ ବାହାର ଠିକାଦାର । ଠିକାକାମକୁ ନେଇ ଠିକାଦାରଙ୍କ ମଧ୍ୟରେ ଟଣାଓଟରା । ନୀୟମ ରହିଛି ରାଜ୍ୟର କୌଣସି ଠିକଦାର କୌଣସି ଜିଲ୍ଲାରେ ବାହାରୁଥିବା ଟେଣ୍ଡରରେ ଭାଗନେଇ ପରିବ । ପୂର୍ବରୁ ଏହି ନୀୟମ ଚଳିଆସିଛି । କିନ୍ତୁ ଏବେ ରାଜ୍ୟରେ ସରକାର ବଦଳିବା ପରେ ବିଭିନ୍ନ ଜିଲ୍ଲାରେ ଠିକାଦାରମାନେ ସଂଗଠିତ ହୋଇ ଜିଲ୍ଲାୱାରୀ ଠିକାକାମ କରାଇବାକୁ ଦାବି କରୁଛନ୍ତି । କେତେକ ବିଭାଗରେ ରାଜନୈତିକ ପ୍ରୋତ୍ସାହନରେ ଟେଣ୍ଡର ଫିକ୍ସିଂ ମଧ୍ୟ କରାଯାଉଛି । ବିଭିନ୍ନ ବିଭାଗର ଟେଣ୍ଡରକୁ ଜିଲ୍ଲାର ଠିକାଦାରମାନେ ଭାଗକରି ସିଡ୍ୟୁଲରେଟରେ ନେଇ କାମ କରିବାକୁ ଜିଦ କରୁଛନ୍ତି । କିନ୍ତୁ ସରକାରୀ ନୀୟମ ବଦଳୁନାହିଁ । ଅନ୍ୟ ଜିଲ୍ଲାର ଠିକାଦାରମାନେ ଭାଗ ନେଇପାରିବେ ବୋଲି  ନୀୟମ ରହିଆସିଛି । ପୂର୍ତ୍ତବିଭାଗର ଠିକାରେ ରାଜନେତା,ପ୍ରଶାସନିକ ଅଧିକାରୀମାନଙ୍କ ଭିତିରିଅଅ ସୁପାରିଶରେ ମଧ୍ୟ ଏଫଟୁ କାମ କରାଯାଉଛି । ଏହି ସୁପାରିଶରେ କିଛି ରାଜନେତାଙ୍କ ପାଖଲୋକ ଲାଭାନ୍ୱିତ ହେଉଛନ୍ତି । ତେବେ ଠିକାକାମକୁ ନିଜ ସମର୍ଥକଙ୍କ ସପକ୍ଷରେ କରାଇବାକୁ ମସୁଧା ଚାଲିୁଛି । ଯାହାକି ନେଇ ଯନ୍ତ୍ରୀମାନେ ଅସୁବିଧାରେ ପଡୁଛନ୍ତି । ଏହାକୁ ନେଇ ଏବେ ବିଭିନ୍ନ ଡିଭିଜନରେ ଗଣ୍ଡଗୋଳ ଆରମ୍ଭ ହୋଇଯାଇଛି ।