21-Feb-2026

ସୁବର୍ଣ୍ଣପୁର  (ମନୋରଞ୍ଜନ ତ୍ରିପାଠୀ )
 ଇଙ୍କଫେଷ୍ଟର ବୌଦ୍ଧିକ ମଞ୍ଚରେ “ମହାନଦୀ ଜଳ ପ୍ରଦୂଷଣ ଓ ଆମ ଜୀବନ ଜୀବିକା” ଶୀର୍ଷକରେ ଏକ ଗୁରୁତ୍ୱପୂର୍ଣ୍ଣ କଥାଚକ୍ର ଅନୁଷ୍ଠିତ ହୋଇଯାଇଛି। ଏହି ସମ୍ବେଦନଶୀଳ ପ୍ରସଙ୍ଗରେ ଆୟୋଜିତ କଥାଚକ୍ରରେ ଓଡ଼ିଶାର ଜୀବନରେଖା ମହାନଦୀର ବର୍ତ୍ତମାନ ସ୍ଥିତି,ଜଳ ପ୍ରଦୂଷଣର ମୂଳ କାରଣ ଓ ସମାଧାନର ପଥ ଉପରେ ବିଶଦ ଆଲୋଚନା ହୋଇଥିଲା। କଥାଚକ୍ରରେ ଜଳ ସୁରକ୍ଷାକର୍ମୀ ରଞ୍ଜନ ପଣ୍ଡା ଓ ସାମାଜିକ କର୍ମୀ ଘାସିରାମ ପଣ୍ଡା ଅତିଥି ଆଲୋଚକ ଭାବେ ଯୋଗଦେଇଥିଲେ । ମହାନଦୀରେ ଦିନକୁ ଦିନ ବୃଦ୍ଧି ପାଉଥିବା ଶିଳ୍ପ ମଳ,ସହରର ନିଷ୍କାଷିତ ଅପମିଶ୍ରିତ ପାଣି ଓ ପ୍ଲାଷ୍ଟିକ ଅବଶିଷ୍ଟ ଯୋଗୁଁ ସୃଷ୍ଟ ହେଉଥିବା ପରିବେଶୀୟ ସଙ୍କଟ ବିଷୟରେ ଉଭୟ ଆଲୋଚକ ଉଦବେଗ ପ୍ରକାଶ କରିଥିଲେ। ରଞ୍ଜନ ପଣ୍ଡା କହିଥିଲେ ଯେ,ମହାନଦୀ କେବଳ ଏକ ନଦୀ ନୁହେଁ,ଏହା ଓଡ଼ିଶାର କୃଷି,ପାନୀୟ ଜଳ ଓ ଜୀବନ ଜୀବିକାର ପ୍ରମୁଖ ଆଧାର। ଯଦି ଏହାର ପ୍ରଦୂଷଣକୁ ନିୟନ୍ତ୍ରଣ କରାଯିବନି,ତେବେ ଆଗାମୀ ଦିନରେ ଜଳ ସଂକଟ ଗଭୀର ଆକାର ନେବ ଏବଂ ଜନଜୀବନକୁ ଅନେକ ମାତ୍ରାରେ ପ୍ରଭାବିତ କରିବ । ସେ ଶିଳ୍ପ ଅଞ୍ଚଳରେ କଡା ନିୟମ ପ୍ରୟୋଗ,ନିଷ୍କାଷିତ ଜଳର ସଠିକ ଶୋଧନ ବ୍ୟବସ୍ଥା ଓ ଜନସଚେତନତା ବୃଦ୍ଧି ଉପରେ ଜୋର ଦେଇଥିଲେ। ଘାସିରାମ ପଣ୍ଡା ମତ ପ୍ରକାଶ କରିଥିଲେ ଯେ,ନଦୀକୁ ବଞ୍ଚାଇବା ପାଇଁ ସରକାର,ସମାଜ ଓ ଶିଳ୍ପ ସଂସ୍ଥାମାନଙ୍କର ସମନ୍ୱିତ ପ୍ରୟାସ ଆବଶ୍ୟକ। ଗ୍ରାମସ୍ତରରେ ଜଳ ସୁରକ୍ଷା କମିଟି ଗଠନ,ନଦୀ ପାର୍ଶ୍ୱରେ ବୃକ୍ଷରୋପଣ ଓ ପ୍ଲାଷ୍ଟିକ ବ୍ୟବହାରରେ କଡା ନିୟନ୍ତ୍ରଣ ମାଧ୍ୟମରେ ପ୍ରଦୂଷଣ କମାଇ ହେବ।
ମୂଳତଃ ମହାନଦୀର ପ୍ରାକୃତିକ ସ୍ରୋତର ସବୁଦିନିଆ ପ୍ରବାହକୁ ବଞ୍ଚାଇ ରଖିବା ଏବଂ ସ୍ୱଚ୍ଛତାକୁ ଗୁରୁତ୍ୱ ଦେବାକୁ ଉପଭୋକ୍ତା ମାନଙ୍କୁ ଯତ୍ନଶୀଳ ରହିବାକୁ ହେବ ବୋଲି ସେ ସ୍ପଷ୍ଟ ମତ ରଖିଥିଲେ ।  ଆଲୋଚନାର ଶେଷରେ ଅତିଥିମାନେ ମହାନଦୀକୁ ପ୍ରଦୂଷଣମୁକ୍ତ କରିବା ପାଇଁ ସମସ୍ତଙ୍କୁ ସଚେତନ ହୋଇ ଏକତ୍ରିତ ପଦକ୍ଷେପ ନେବାକୁ ଆହ୍ୱାନ ଦେଇଥିଲେ । ଇଙ୍କଫେଷ୍ଟର ବରିଷ୍ଠ ସଦସ୍ୟ ରାଜୀବ ନାୟକ ଏହି କଥାଚକ୍ରକୁ ସଂଯୋଜନା କରିଥିବାବେଳେ ଇଙ୍କଫେଷ୍ଟର ସଦସ୍ୟ ଅଶ୍ୱିନୀ କୁମାର ଧନ୍ୟବାଦ ଅର୍ପଣ କରିଥିଲେ । ସୁବର୍ଣ୍ଣପୁରର ଏକ ଅଗ୍ରଣୀ ଶିକ୍ଷାନୁଷ୍ଠାନ ମହାନଦୀ ଧାରା ପକ୍ଷରୁ ଆଜିର କଥାଚକ୍ର ପ୍ରାଯୋଜିତ ହୋଇଥିଲା।