16-Feb-2026

ବଲାଙ୍ଗୀର(ପ୍ରେରଣା ଖବର): ସ୍ଥାନୀୟ ସରକାରୀ ମହିଳା ମହାବିଦ୍ୟାଳୟ ବଲାଙ୍ଗୀର କନଫରେନ୍ସ ହଲ ଠାରେ ଦୁଇଦିନିଆ ଜାତୀୟ ଆଲୋଚନାଚକ୍ର ଉଦଘାଟିତ ହୋଇ ଯାଇଛି।ଏହି ଆଲୋଚନାଚକ୍ର ଅର୍ଥନୀତି,ଶିକ୍ଷା,ଇଂରାଜୀ ଓ ରାଜନୀତି ବିଜ୍ଞାନ ବିଭାଗଙ୍କ ମିଳିତ ସହଯୋଗରେ ଆୟୋଜିତ ହୋଇଥିଲା।କଲେଜର ଅଧ୍ୟକ୍ଷ ଡ଼ଃ ଏ.କେ. ଓଝା ସ୍ୱାଗତ ଭାଷଣରେ ସମକାଳୀନ ସାମାଜିକ ସମସ୍ୟାମାନଙ୍କ ସମାଧାନ ପାଇଁ ସମାବେଶୀ ପ୍ରତିନିଧିତ୍ୱ ଓ ଶିକ୍ଷାନୁଷ୍ଠାନମୂଳକ ଆଲୋଚନାର ଗୁରୁତ୍ୱ ଉଲ୍ଲେଖ କରିଥିଲେ। ଆଲୋଚନାଚକ୍ରର ଉଦ୍ଦେଶ୍ୟ ସମ୍ପର୍କରେ ଆବାହକ ସୁଚେତା ଦୋରା ବିସ୍ତୃତ ଭାବେ ଆଲୋଚନା କରିବାସହ ପ୍ରାନ୍ତୀୟତା,ଦୃଶ୍ୟମାନତା ଓ ସାମାଜି ନ୍ୟାୟ ବିଷୟକ ପ୍ରଶ୍ନମାନଙ୍କୁ ବହୁମାତ୍ରିକ ଦୃଷ୍ଟିକୋଣରୁ ବିଶ୍ଳେଷଣ କରିବାର ଆବଶ୍ୟକତା ଉପରେ ମତପ୍ରକାଶ କରିଥିଲେ। ଡ଼ଃ ଅନୁରାଧା ମିଶ୍ର ଅତିଥିମାନଙ୍କ ପରିଚୟ ପ୍ରଦାନ କରିଥିଲେ। ମୁଖ୍ୟ ଅତିଥି ଭାବେ ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ ପ୍ରଫେସର କାଳିଦାସ ମିଶ୍ର ମୁଖ୍ୟ ଉପସ୍ଥାପକ ଭାବେ ନିଜ ଭାଷଣରେ ପ୍ରାନ୍ତୀୟକରଣର ଐତିହାସିକ ପରିଣାମ ଓ ଏହାର ସାମାଜିକ ପରିପ୍ରେକ୍ଷ୍ୟ ଉପରେ ଆଲୋକପାତ କରିବା ସହ ସମାନ ଅଧିକାର ସୁନିଶ୍ଚିତ କରିବାରେ ଉଚ୍ଚ ଶିକ୍ଷା ଓ ଗବେଷଣାର ପରିବର୍ତ୍ତନଶୀଳ ଭୂମିକା ବିଷୟରେ ଉଲ୍ଲେଖ କରିଥିଲେ।ଏହି ଅବସରରେ ଆଲୋଚନାଚକ୍ରର ସ୍ମରଣିକା ଉନ୍ମୋଚନ କରାଯାଇଥିଲା।ଶେଷରେ ଶରଧର ମାଝୀ ଧନ୍ୟବାଦ ଦେଇଥିଲେ।ଦ୍ଵିତୀୟ ଅଧିବେଶନର କାର୍ଯ୍ୟକ୍ରମରେ ସମାନାନ୍ତର ପ୍ୟାନେଲ ଆଲୋଚନା ଆୟୋଜିତ ହୋଇଥିଲା।ଇଂରାଜୀ ବିଭାଗର ସମାନାନ୍ତର ପ୍ୟାନେଲ ଆଲୋଚନା ଅଡିଟୋରିୟମ୍‌ରେ ଅନୁଷ୍ଠିତ ହୋଇଥିଲା।ଡ଼ଃ ଚିନ୍ମୟୀ ନନ୍ଦ ଏକ୍ସଆଇଏମ ବିଶ୍ୱବିଦ୍ୟାଳୟ,ଡ଼ଃ ପିତାମ୍ବର ବେହେରା, ସରକାରୀ ମହିଳା ମହାବିଦ୍ୟାଳୟ,ସମ୍ବଲପୁର,ଡ଼ଃ ତ୍ୟାଗରାଜ ଠାକୁର,ସିଲିକନ୍ ଇନ୍‌ସ୍ଟିଟ୍ୟୁଟ୍ ଅଫ୍ ଟେକ୍ନୋଲୋଜି, ସମ୍ବଲପୁର, ଡ଼ଃ ମୃଣ୍ମୟ ପ୍ରମାଣିକ, କୋଲକତା ବିଶ୍ଵବିଦ୍ୟାଳୟ ନିଜର ପ୍ରବନ୍ଧ ଉପସ୍ଥାପନ କରିଥିଲେ।ପ୍ରଫେସର  କାଳିଦାସ ମିଶ୍ର ଏହି କାର୍ଯ୍ୟକ୍ରମ ର ଅଧ୍ୟକ୍ଷତା କରିଥିଲେ। ଡ଼ଃ ଅନୁରାଧା ମିଶ୍ର କାର୍ଯ୍ୟକ୍ରମ ର ସମୀକ୍ଷା କରିଥିଲେ।ଭାରତୀୟ ସିନେମାରେ ପରିବେଶ ନାରୀବାଦ, ଭାରତୀୟ ସାହିତ୍ୟର ଉପନିବେଶ ମୁକ୍ତ ଦୃଷ୍ଟିକୋଣ ଓ ପ୍ରାନ୍ତୀୟ ସାହିତ୍ୟରେ ପ୍ରତିରୋଧର ସ୍ୱର ଭଳି ବିଷୟରେ ପ୍ରବନ୍ଧ ଉପସ୍ଥାପିତ ହୋଇଥିଲା। ସାମାଜିକ ବିଜ୍ଞାନ ବିଭାଗର ସମାନାନ୍ତର ପ୍ୟାନେଲ ଆଲୋଚନା ହାଇବ୍ରିଡ୍ ମୋଡ୍‌ରେ ଆୟୋଜିତ ହୋଇଥିଲା। ଅବସରପ୍ରାପ୍ତ ପ୍ରଧାନାଚାର୍ଯ୍ୟ ସୁନୀଲ କୁମାର ପଣ୍ଡା ଏହାର ଅଧ୍ୟକ୍ଷତା କରିଥିଲେ।ଡ଼ଃ ଭୁବନେଶ୍ୱର ଛତ୍ରିଆ,ଅର୍ଥନୀତି ବିଭାଗ ଅଧ୍ୟକ୍ଷ,ଡ଼ଃ ମନୋଜ କୁମାର ନାଗ,ରାଜେନ୍ଦ୍ର ବିଶ୍ୱବିଦ୍ୟାଳୟ,ଡ଼ଃ ସୁରେଶ ପ୍ରସାଦ ଷଡ଼ଙ୍ଗୀ, ସଞ୍ଜୟ ମେହେର,ଡ଼ଃ ଶୁସାନ୍ତ ସେଠୀ ଓ ଡ଼ଃ ମାନସୀ ମହାନ୍ତି ଏଥିରେ ଅଂଶଗ୍ରହଣ କରିଥିଲେ।ଆମ୍ବେଦକରଙ୍କ ପ୍ରତିନିଧିତ୍ୱ ଦୃଷ୍ଟିକୋଣ,ଓଡିଶାରେ ଆଦିବାସୀ ରାଜନୈତିକ ସଶକ୍ତିକରଣ, ଆର୍ଥିକ ସମାବେଶ ଓ ମାନବ ବିକାଶ ଏବଂ ଖଣି ଅଞ୍ଚଳରେ ପ୍ରାନ୍ତୀୟ ସମୁଦାୟମାନଙ୍କ ସ୍ଥିତି ଉପରେ ଆଲୋଚନା ହୋଇ ଥିଲା। ପରବର୍ତ୍ତୀ ଟେକ୍ନିକାଲ୍ ସେସନ୍‌ଗୁଡିକ ଶାରୀରିକ, ହାଇବ୍ରିଡ୍ ଓ ଭର୍ଚୁଆଲ୍ ମୋଡ୍‌ରେ

ଆୟୋଜିତ ହୋଇଥିଲା। ରାଜନୈତିକ ଅଂଶଗ୍ରହଣ ଓ ଶାସନ,ଆର୍ଥିକ ପ୍ରାନ୍ତୀୟତା ଓ ବିକାଶ,ଶିକ୍ଷା ଓ ଲିଙ୍ଗ ସମାବେଶ, ପରିବେଶ ଓ ପ୍ରତିରୋଧ, ନାରୀବାଦ ଓ ମହିଳା ସ୍ୱର ଭଳି ବିଭିନ୍ନ ବିଷୟରେ ପ୍ରବନ୍ଧ ଉପସ୍ଥାପିତ ହୋଇଥିଲା।ରାଜେନ୍ଦ୍ର ବିଶ୍ୱବିଦ୍ୟାଳୟ, ଗଙ୍ଗାଧର ବିଶ୍ୱବିଦ୍ୟାଳୟ, ସମ୍ୱଲପୁର,ରେଭେନ୍ସା ବିଶ୍ୱବିଦ୍ୟାଳୟ,ବ୍ରହ୍ମପୁର ବିଶ୍ୱବିଦ୍ୟାଳୟ, ହାଇଦ୍ରାବାଦ ବିଶ୍ୱବିଦ୍ୟାଳୟ,ଖ୍ରୀଷ୍ଟ ମାନୀତ  ବିଶ୍ୱବିଦ୍ୟାଳୟ, ଲକ୍ଷ୍ନୌ ଓ ଅନ୍ୟାନ୍ୟ ସଂସ୍ଥାରୁ ଆସିଥିବା ଗବେଷକମାନେ ତାଙ୍କର ଗବେଷଣାପତ୍ର ପ୍ରସ୍ତୁତ କରିଥିଲେ।ଗ୍ରାମୀଣ ଓଡିଶାରେ ଭୋଟିଂ ବ୍ୟବହାର,ପଞ୍ଚାୟତି ରାଜରେ ମହିଳାଙ୍କ ସଶକ୍ତିକରଣ, କୃଷି ସଙ୍କଟ, ଡିଜିଟାଲ୍ ଆର୍ଥିକ ସମାବେଶର ଅସମତା, ଦରିଦ୍ରତା ଓ ଅସମାନତା,ଶିକ୍ଷାରେ ଜାତିଭିତ୍ତିକ ବିଷମତା, ପରିବେଶୀୟ ବିସ୍ଥାପନ ଓ ଆଦିବାସୀ ପରିଚୟ ଭଳି ବିଷୟ ରେ ଗଭୀର ଆଲୋଚନା ହୋଇଥିଲା। ପ୍ରଥମ ଦିନର କାର୍ଯ୍ୟକ୍ରମ ସଜୀବ ଆଲୋଚନା ଓ ବିଚାର ବିମର୍ଶ ସହ ଶେଷ ହୋଇଥିଲା।ପ୍ରାନ୍ତୀୟ ସ୍ୱରକୁ ମୁଖ୍ୟ ଧାରାରେ ଆଣି ସାମାଜିକ ପରିବର୍ତ୍ତନକୁ ସୁଦୃଢ଼ କରିବାରେ ଆଲୋଚନାଚକ୍ରର ଅଙ୍ଗୀକାର ସ୍ପଷ୍ଟ ହୋଇଥିଲା।ଦେଶର ବିଭିନ୍ନ ପ୍ରସିଦ୍ଧ ଶିକ୍ଷାନୁଷ୍ଠାନରୁ ଅଧ୍ୟାପକ, ଗବେଷକ ଓ ଛାତ୍ରଛାତ୍ରୀ ମାନେ ଏହି ଆଲୋଚନାଚକ୍ରରେ ଯୋଗଦେଇଥିଲେ।ସାଙ୍ଗଠନିକ ସମ୍ପାଦକ ରାଜେଶ କର୍ଣ୍ଣ କାର୍ଯ୍ୟକ୍ରମର ପରିଚାଳନା କରିଥିଲେ।