25-Jan-2026

ବଲାଙ୍ଗୀର(ଦେବାଶିଷ ବହିଦାର)- ସଂପ୍ରତି ଧାନ ମଣ୍ଡି ସମସ୍ୟା ଓ ଧାନର ଅଭାବୀ ବିକ୍ରୀ ସମସ୍ୟା କୁ ନେଇ ସମଗ୍ର ରାଜ୍ୟରେ ଚାଷୀ ଅସନ୍ତୋଷ ଚାଲିଛି। ବିଶେଷେ କରି ଏହି ସମସ୍ୟା କୋଶଳାଂଚଳରେ ବେଶୀ ଉତ୍କଟ ଆକାରରେ ଚାଲିଛି। ଟୋକନ ପ୍ରଦାନରେ ଅବ୍ୟବସ୍ଥା ଓ କଟନୀ ଛଟଟୀ ସମସ୍ୟାକୁ ନେଇ ଚାଷୀ ସମାଜ ଭୟଙ୍କର ଭାବରେ ସରକାର ଉପରେ କ୍ଷୁବ୍ଧ ଅଛନ୍ତି। ଏଭଳି ସମୟରେ ବରଗଡ ଧନୁଯାତ୍ରା ମଂଚରେ କୃଷିମନ୍ତ୍ରୀଙ୍କ ବିବାଦୀୟ ମନ୍ତବ୍ୟ ଓ ତତ୍ ପରବର୍ତୀ ଘଟଣାବଳୀ ପାଇଁ ସମଗ୍ର ରାଜ୍ୟର ଚାଷୀ ସମାଜ ସରକାରଙ୍କ ଉପରେ ଅସଂଭବ ଭାବରେ କ୍ଷୁବଧ ଅଛନ୍ତି। ବିଗତ ସରକାରଙ୍କ ୨୪ ବର୍ଷ ଶାସନ ଓ ତତ୍ ପୂର୍ବବର୍ତ୍ତୀ କଂଗ୍ରେସ ଶାସନ ସମୟରେ ମଧ୍ୟ କୋଶଳାଂଚଳର ଚାଷୀ ଅଭାବୀ ବିକ୍ରୀ ସମସ୍ୟାରେ ଜର୍ଜରିତ ହେଉଥିଲେ। ସବୁ ବର୍ଷ ଚାଷୀ ଆନ୍ଦୋଳନ ମଧ୍ୟ ଚାଲିଥିଲା। ଚାଷୀଙ୍କ ଅସନ୍ତୋଷ ଯୋଗୁଁ ଉଭୟ ସରକାର ବିତାଡିତ ହେଲା ପରେ ବର୍ତମାନ ବିଜେପି ସରକାର ଚାଲିଛି। ଏହି ସରକାରଙ୍କ ଅମଳରେ ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ଘୋଷଣା କରିଥିଲେ ମଧ୍ୟ ସରକାର ଟୋକନ ପ୍ରଦାନ ସମସ୍ୟା ଓ ମଣ୍ଡିର ସମସ୍ୟା ସମାଧାନ କରିବାରେ ବର୍ତମାନ ଯାଏ ବିଫଳ ରହିଛନ୍ତି। ତେଣୁ ମିଲ ମାଲିକ ଓ ଧାନ ଦଲାଲଙ୍କ ସହ ଓ ଅନ୍ୟ ରାଜ୍ୟର ଧାନ ବେପାରୀଙ୍କ ସହ ସରକାରଙ୍କ ମଧୁଚନ୍ଦ୍ରିକା ଚାଲିଛି ବୋଲି ଚାଷୀ ସଂଗଠନମାନେ ଅଭିଯୋଗ କରୁଛନ୍ତି। ଦୁର୍ଭାଗ୍ୟର କଥା ଯେ ଚାଷୀଙ୍କ ଏହି ସମସ୍ୟାର ସମାଧାନ ଓ ଅସନ୍ତୋଷକୁ ପ୍ରଶମିତ କରିବା ପାଇଁ ସରକାର ବର୍ତମାନ ସୁଦ୍ଧା କୌଣସି ଠୋସ୍ ପଦକ୍ଷେପ ନେଇ ପାରି ନାହାନ୍ତି। ତେଣୁ ପ୍ରତିବାଦର ଚାଷୀ ସଂଗଠନମାନେ ସରକାରଙ୍କ ବିରୁଦ୍ଧରେ ରାସ୍ତାକୁ ବାହାରିଲେଣି। ଏଭଳି କି ଆଗାମୀ ୨୮ ତାରିଖରେ ଏକ ନିର୍ଦ୍ଦିଷ୍ଟ ଚାଷୀ ସଂଗଠନ ବନ୍ଦର ଡାକରା ମଧ୍ୟ ଦେଲେଣି। 
  କୋସଲ ଆନ୍ଦୋଳନ କୌଣସି ରାଜନୈତିକ ଗୋଷ୍ଠୀର ଆନ୍ଦୋଳନ ନୁହେଁ । ଏହା ମାଟି ମୁକ୍ତି ର ଆନ୍ଦୋଳନ । ଆମ ଅଂଚଳର ଚାଷୀ, ଛାତ୍ର, ଯୁବକ, ବୁଦ୍ଧଜୀବୀ, ଶିଶୁ, ନାରୀ, କର୍ମଚାରୀ ଓ ଅର୍ଥନୈତିକ ରୂପେ ଶୋଷିତ ଶ୍ରେଣୀଙ୍କ ମୁକ୍ତି ଓ ଏ ଅଂଚଳର ସର୍ବବିଧ ବିକାଶ କେବଳ ସଂବିଧାନର ଧାରା ୩ ଅନୁଯାୟୀ ସ୍ୱତନ୍ତ୍ର କୋସଳ ରାଜ୍ୟ ଗଠନ ହେଲେ ଯାଇ ସଂଭବ । ତେଣୁ କୋଶଳାଂଚଳର ଚାଷୀମାନେ ସାମୁହିକ ଭାବେ ଚାଷୀ ଆନ୍ଦୋଳନ ଓ କୋଶଲ ଆନ୍ଦୋଳନକୁ ଶାଣିତ କରନ୍ତୁ । ଚାଷୀଙ୍କ ସମସ୍ୟା କୋଶଳାଂଚଳର ମୁଖ୍ୟ ସମସ୍ୟା । କାରଣ କୋଶଳାଂଚଳର ଅର୍ଥନୀତି କୃଷିଭିତିକ ଅର୍ଥନୀତି ଅଟେ । ତେଣୁ ଚାଷୀ ଆନ୍ଦୋଳନକୁ କୋଶଳ ଆନ୍ଦୋଳନ ସଂପୂର୍ଣ୍ଣ ରୂପେ ସମର୍ଥନ କରେ । ଏବଂ ସରକାର ସଂବେଦନଶୀଳ ହୋଇ ଚାଷୀଙ୍କ ସମସ୍ୟା ସମାଧାନ କରିବା ସହ ଏଭଳି ଟୋକନ ବ୍ୟବସ୍ଥା ଓ କଟନୀ ଛଟନୀ ବ୍ୟବସ୍ଥା ଉଚ୍ଛେଦ କରିବା ସହ ଅସାଧୁ ଧାନ ବ୍ୟବସାୟୀଙ୍କ ଚକ୍ରରେ ନ ପଡିବାକୁ କୋଶଳ ଆନ୍ଦୋଳନ ଦାବୀ କରେ । ଦେଶରେ ବହୁ ବଡ ବଡ ସରକାର ଚାଷୀ ଅସନ୍ତୋଷରେ ଉଡିଯାଇଛନ୍ତି । ତେଣୁ ବେଳହୁୁଁ ସରକାର ସତର୍କ ହୁଅନ୍ତୁ ନ ହେଲେ ପରିଣତି ଭୟାବହ ହୋଇପାରେ ବୋଲି କୋଶଳ ଆନ୍ଦୋଳନ ତରଫରୁ ଚେତାବନୀ ଦିଆଯାଇଛି । ସମ୍ବାଦିକ ସମ୍ମିଳନରେ ଶରତ କୁମାର ହୋତା, ରଣରାଜ ସିଂହ ଦେଓ, ରବି ଶଙ୍କର ମିଶ୍ର ଉପସ୍ଥିତ ଥିଲେ ।