21-Dec-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକଅନ୍ତର୍ଗତ ଦେଷଣ୍ଢଠାରେ ପ୍ରସିଦ୍ଧ ଚାନ୍ଦଲି ପର୍ଯ୍ୟଟନସ୍ଥଳିରେ ଆସନ୍ତା ଡିସେମ୍ବର ୩୧ ତାରିଖରୁ ୪ଦିନ ଧରି ଜାନୁୟାରୀ ୩ ତାରିଖ ପର୍ଯ୍ୟନ୍ତ ୯ମ ଚାନ୍ଦଲି ମହୋତ୍ସବ ଅନୁଷ୍ଠିତ ହେବାକୁ ଯାଉଛି । ଆଜି ଚାନ୍ଦଲି ପର୍ଯ୍ୟଟନସ୍ଥଳିରେ ମହୋତ୍ସବ କମିଟି ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ବିଳନୀରେ ଏନେଇ ସୂଚନା ଦିଆଯାଇଛି । ଆଜି ମହୋତ୍ସବର ଲୋଗୋ ଉନ୍ମୋଚିତ

ହୋଇଯାଇଛି । ମହୋତ୍ସବ କମିଟିର ସଂଯୋଜକ ଲକ୍ଷ୍ମଣ କୁମାର ମେହେରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ମୁଖ୍ୟଅତିଥି ଭାବରେ ପୌରାଧ୍ୟକ୍ଷା ଲିକା ସାହୁ ଓ ବିଶିଷ୍ଟ ସଂସ୍କୃତି ଗବେଷକ ଗୁରୁଶ୍ରୀ ଡ.ଘାସିରାମ ମିଶ୍ର ଯୋଗଦେଇ ଏହି ଲୋଗୋକୁ ଉନ୍ମୋଚନ କରିଥିଲେ । ଏଠାରେ ପ୍ରତ୍ୟହ ନାମଯଜ୍ଞ,ସଂକିର୍ତ୍ତନ୍ୟ,ମହିମାଧର୍ମିଙ୍କ ହୋମଯଜ୍ଞ,ରାବଣ ଦରବାର ସହ ସାଂସ୍କୃତିକ ସଭା ଅନୁଷ୍ଠିତ ହେବ । ମୀନାବଜାର ଲାଗିବା ସହ ହଜାର ହଜାର ଲୋକଙ୍କ ସମାଗମ ହେବ ବୋଲି ସୂଚନା ଦିଆଯାଇଛି ।
 ମଞ୍ଚରେ ଚାନ୍ଦଲି ମହୋତ୍ସବ କମିଟିର ସଭାପତି ରାଧେଶ୍ୟାମ ମେହେର,ସଂପାଦକ ସ୍ୱୟଂମ୍ବର ମେହେର,ପୂର୍ବତନ ଜିଲ୍ଲା ପରିଷଦ ସଭ୍ୟ ସୁଶିଳ ଚାନ୍ଦ,ବନ୍ଧପଡା ସରପଞ୍ଚ ଗୋପାଳ ମିଶ୍ର,ମଧୁସୁଦନ ନାୟକ,ପ୍ରମୋଦ ବହିଦାର,ଶୈଳେନ୍ଦ୍ର ସାହୁ, ଘାସିରାମ ରଣା,ଇନ୍ଦ୍ରଜିତ ରାଉତ,ରଘୁମଣୀ ରଣା,ପ୍ରଦ୍ୟୁମ୍ନ ଷଢଙ୍ଗୀ ପ୍ରମୁଖ ରହିଥିଲେ । ମହୋତ୍ସବର ସଂଯୋଜକ ଲକ୍ଷ୍ମଣକୁମାର ମେହେର ଚାନ୍ଦଲିପାହାଡର ବିକାଶ ତଥା ପର୍ଯ୍ୟଟନସ୍ଥଳି ଘୋଷଣା ପ୍ରସଙ୍ଗରେ ସହଯୋଗ କରିଥିବା ବ୍ୟକ୍ତିବିଶେଷଙ୍କୁ କୃତଜ୍ଞତା ଜଣାଇଥିଲେ । ପୂର୍ବତନ ସରକାର ଓ ବର୍ତ୍ତମାନ ସରକାର ଏହି ପର୍ଯ୍ୟଟନସ୍ଥଳିର ବିକାଶ ପାଇଁ ନେଇଥିବା ପଦକ୍ଷେପ ବିଷୟରେ ଲୋକଙ୍କୁ ସୂଚନା ଦେଇଥିଲେ । ପୂର୍ବରୁ ଚାନ୍ଦଲି ପର୍ଯ୍ୟଟନସ୍ଥଳିର ବିକାଶ ପାଇଁ ନବୀନ ସରକାର ୧କୋଟି ଟଙ୍କାର ଅନୁଦାନ ସହିତ ରାସ୍ତାପାଇଁ ଗ୍ରାମ୍ୟଉନ୍ନୟନ ବିଭାଗ ୩.୫କୋଟି ଟଙ୍କା ଦେଇଥିଲେ । ଏବେ ଭୁଲିଆକଟାର ପୁନଃରୁଦ୍ଧାର ପାଇଁ ୫୦ଲକ୍ଷ ଟଙ୍କାର ଅନୁଦାନ ଆସିଥିବା ଓ ଆଗକୁ ବିଧାୟକଙ୍କ ଉଦ୍ୟମରେ ଆହୁରି ଅନୁଦାନ ଆସିବ ବୋଲି  କହିଥିଲେ । ମୋହନ ସରକାରଙ୍କ ଦୁଇ ଉପମୁଖ୍ୟମନ୍ତ୍ରୀ,ସାଂସଦ ଓ ବଲାଙ୍ଗୀର ବିଧାୟକଙ୍କ ସଦିଚ୍ଛା ରହିଛି ତେଣୁ ଅନୁଦାନ ଆସିବାରେ ଅସୁବିଧା ରହିବ ନାହିଁ ବୋଲି ଶ୍ରୀ ମେହେର କହିଥିଲେ । ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ପର୍ଯ୍ୟଟନସ୍ଥଳିକୁ ବିକାଶ କରାଇବାରେ

ଅଞ୍ଚଳବାସୀଙ୍କ ଉଦ୍ୟମକୁ ପ୍ରଶଂସା କରିଥିଲେ । ଠିକ ସେହିପରି ଗୁରୁଶ୍ରୀ ଡ.ଘାସିରାମ ମିଶ୍ର ତାଙ୍କ ବକ୍ତବ୍ୟରେ ବଲାଙ୍ଗୀରର ଖୋଲ ବା ପାଟ୍ କଥା କହି ଚାନ୍ଦଲିପାହାଡ ମଧ୍ୟ ଏକ ପାଟ ବୋଲି କହିଥିଲେ । ଏହି ଚାନ୍ଦଲି ପାହାଡ ପ୍ରକୃତିକୁ ସୁରକ୍ଷା ଦେଉଛି ଓ ଯୁଗଯୁଗ ଧରି ସ୍ଥାନୀୟ ଅଞ୍ଚଳକୁ ସୁରକ୍ଷା କରୁଛି ବୋଲି କହିଥିଲେ । ତେଣୁ ଏହାକୁ ଆମେ ସୁରକ୍ଷାଦେଇ ମାନବସମାଜଙ୍କୁ ସୁରକ୍ଷା ଦେଉଛୁ ବୋଲି କହିଥିଲେ ।