02-Dec-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାରୁ  ପ୍ରତିବର୍ଷ ହଜାର ହଜାର ସଂଖ୍ୟାରେ ବେଆଇନ ମାନବଚାଲାଣ ହୋଇ ଚାଲିଛି । ଏହି ଘଟଣାକୁ ନେଇ ବିଭିନ୍ନ ମହଲରେ ଉଦବେଗ ପ୍ରକାଶ ପାଉଛି । ତେବେ ଏହି ପ୍ରସଙ୍ଗକୁ ନେଇ ବିଜେଡି ବିଧାୟକ କଳିକେଶ ନାରାୟଣ ସିଂଦେଓ ବିଧାନସଭାରେ ଉଠାଇ ଗୃହବିଭାଗ ଦାୟୀତ୍ୱରେ ଥିବା ମୁଖ୍ୟମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି । ଏକ ଅଣତାରକା ପ୍ରଶ୍ନ-ୟୁଡି-୬୨୫ ମାଧ୍ୟମରେ ବଲାଙ୍ଗୀର ଜିଲ୍ଲାରୁ ବେଆଇନ ମାନବଚାଲାଣ ହେଉଥିବା ଓ ଏହାକୁ ରୋକିବାକୁ ରାଜ୍ୟସରକାର କଣ ପଦକ୍ଷେପ ନେଉଛନ୍ତି ତଥା ଉଦ୍ଧାର ଶ୍ରମିକଙ୍କ ଥଇଥାନ ପାଇଁ କଣସବୁ ବ୍ୟବସ୍ଥା କରାଯାଇଛି ସେନେଇ ପ୍ରଶ୍ନ କରିଛନ୍ତି ବିଧାୟକ କଳିକେଶ । ଗତ କିଛିଦିନ ତଳେ କଣ୍ଟାବାଞ୍ଜିର ଜଣେ ସର୍ଦ୍ଦାରଙ୍କ ଘରୁ ଚାଲାଣ ହେବାକୁ ଥିବା ୧୪ଜଣ ଶିଶୁ ସମେତ ୫୫ଜଣଙ୍କୁ ଉଦ୍ଧାର କରାଯାଇଥିଲା । ମୁଖ୍ୟତଃ ସେହି ପ୍ରସଙ୍ଗରେ ସରକାର କଣ ପଦକ୍ଷେପ ନେଇଛନ୍ତି ସେନେଇ ମୁଖ୍ୟମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି ।  ô ମୁଖ୍ୟମନ୍ତ୍ରୀ ମୋହନଚରଣ ମାଝି ଏହାର ଉତ୍ତର ରଖିଛନ୍ତି ଯେ,କଣ୍ଟାବାଞ୍ଜିର ଆନନ୍ଦନଗର ପଡାର ବ୍ରଜେସ ବେହେରା ଓ ତାଙ୍କ ଭାଇ ପ୍ରକାଶ ବେହେରାଙ୍କ ଘରେ ପୋଲିସ ଚଢାଉକରି ୧୪ଜଣ ଶିଶୁ ସମେତ ୫୫ଜଣ ଶ୍ରମିକଙ୍କୁ ଉଦ୍ଧାର କରିଥିଲା । ସେହି ଘଟଣାରେ ଉଭୟ ଅଭିଯୁକ୍ତୁ ଅନ୍ଧାରର ସୁଯୋଗ ନେଇ ଫେରାର ହୋଇଯାଇଥିବା ବେଳେ ତାଙ୍କ ଘରୁ ଏକ ଅନେକଗୁଡିଏ ଶ୍ରମିକମାନଙ୍କ ଆଧାରକାର୍ଡ ,ଲାପଟପ ସହ ୧ଲକ୍ଷ ୬୭ ହଜାର ଟଙ୍କା ଜବତ କରାଯାଇଥିଲା । ଉଭୟେ ବେଆଇନ ଭାବରେ ଶ୍ରମିକ ଚାଲାଣ କରିବାକୁ ତାଙ୍କ ଘରେ ଶ୍ରମିକଙ୍କୁ ରଖିଥିବା ଜଣାପଡିଥିଲା । କଣ୍ଟାବାଞ୍ଜି ଥାନାରେ ମାମଲା ନମ୍ବର-୦୮/୨୦୨୫ ରୁଜୁ କରି ତଦନ୍ତ ଚାଲୁରହିଛି । ଅଭିଯୁକ୍ତମାନେ ହାଇକୋର୍ଟ ନିର୍ଦ୍ଦେଶ ବଳରେ ଜାମିନରେ ଅଛନ୍ତି ବୋଲି ଉତ୍ତର ରଖାଯାଇଛି । ତେବେ ଶ୍ରମବିଭାଗ, ମହିଳା ଶିଶୁକଲ୍ୟାଣବିଭାଗ,ପଞ୍ଚାୟତପ୍ରତିନିଧି ଓ ଏନଜିଓ ମାନଙ୍କ ମିଳିତ ପ୍ରୟାସରେ ଲୋକଙ୍କୁ ସଚେତନ କରାଯାଉଛି । ଜିଲ୍ଲା ସ୍ତରରେ ଡିଏସପି ଓ ଇନ୍ସପେକ୍ଟରଙ୍କୁ ନେଇ ଗଠିତ ବିଭାଗ ମାନବ ଓ ଶିଶୁଚାଲାଣ ଅଭିଯୋଗ ଉପରେ ତ୍ୱରିତ ପଦକ୍ଷେପ ନେଉଛନ୍ତି । ଉଦ୍ଧାର ଶିଶୁ ଓ ଲୋକଙ୍କୁ ସର୍ଟ ଷ୍ଟେହୋମରେ ରଖାଯାଇ ଖାଦ୍ୟଦେବା ସହ କାଉନସେଲିଂ କରାଯାଇଛି ବୋଲି ମୁଖ୍ୟମନ୍ତ୍ରୀ ତାଙ୍କ ଉତ୍ତରରେ କହିଛନ୍ତି ।