14-Nov-2025

ବିନିକା(ହିମାଂଶୁ ଶେଖର ପୁଟେଲ)ସୁବର୍ଣ୍ଣପୁରରୁ ବିନିକା ଭାୟା ଦେଇ ରାମପୁର ମୁଖ୍ୟ ରାସ୍ତାଟି ଏବେ ଗଞ୍ଜେଇ ବେପାରୀଙ୍କ କରିଡ଼ର ରାସ୍ତା ପାଲଟିଛି ।ତେଣୁ ଏହି ବେଆଇନ କାର୍ଯ୍ୟକୁ ରୋକିବା ପାଇଁ ଏବଂ ଏହି ବ୍ୟବସାୟରେ ସଂଶ୍ଳିଷ୍ଟ ବ୍ୟକ୍ତି ବିଶେଷ ମାନଙ୍କୁ ଧରିବା ପାଇଁ ପୋଲିସ ତରଫରୁ ବିଭିନ୍ନ ସମୟରେ ବିଭିନ୍ନ ସ୍ଥାନରେ ଗାଡ଼ି ମଟର ଚେକିଂ କୁ ଗୁରୁତ୍ତ୍ଵ ଦିଆଯାଉଛି ।ଆଜି ସକାଳେ ବିନିକା ସହର ମୁଖ୍ୟ ରାସ୍ତା ଥାନା ଛକ ଠାରେ ପୋଲିସ ପକ୍ଷରୁ ଯାନ ବାହାନ ଗୁଡ଼ିକୁ କଡାକଡି ଚେକିଙ୍ଗ କରାଯାଉଥିବା ବେଳେ ସଂଦେହରେ ମହିନ୍ଦ୍ରା ୫୦୦ କାର ଯାହାର ନଂ OD 05R 1111 ଅଟକାଇ ଯାଞ୍ଚ କରାଯାଇଥିଲା ।ଗାଡ଼ିରେ ଗଞ୍ଜେଇ ଥିବା ଦେଖି ପୋଲିସ ଗାଡ଼ିକୁ ଜବତ କରି ଏଥିରେ ଥିବା ୨ଜଣ ବ୍ୟକ୍ତିଙ୍କୁ ଥାନାକୁ ନେଇ ପୋଲିସ ପଚରାଉଚୁରା କରିଥିଲା ।ଅପରାହ୍ନରେ ମାଜିଷ୍ଟ୍ରେଟ ଦାୟିତ୍ୱରେ ବିନିକା ଅତିରିକ୍ତ ତହସିଲଦାର ପହଞ୍ଚିବା ପରେ ବିନିକା ଥାନା ଅଧିକାରୀ ଓ ପୋଲିସ ଷ୍ଟାଫ ଉକ୍ତ ଗାଡିକୁ ଟିକିନିଖି ଯାଞ୍ଚ କରି ଗାଡ଼ି ଭିତରୁ ଗଞ୍ଜେଇ ବାହାର କରି ଓଜନ କରିଥିଲେ ।ପ୍ରାୟ ୫୦କେଜି ଗଞ୍ଜେଇ ଜବତ କରାଯାଇଛି ।ଯାହାର ଆନୁମାନିକ ମୂଲ୍ୟ ୫୦ଲକ୍ଷ ଟଙ୍କା ହେବ  ।ଏଥିରେ ସଂଶ୍ଲିଷ୍ଟ ବୌଦ୍ଧ ଜିଲ୍ଲାର ୨ଜଣ ବ୍ୟକ୍ତିଙ୍କୁ ପୋଲିସ ଗିରଫ କରିଛି।