14-Oct-2025

ବଲାଙ୍ଗୀର (ପ୍ରେରଣା ଖବର); ବଲାଙ୍ଗୀରରେ ବାଇପାସ କାମ ସରିବ ଓ ଭାରିଜାନ ଏହି ବାଇପାସଦେଇ ଗଲେ ଘଟୁଥିବା ଦୁର୍ଘଟଣା କମିବ । ଏହି ଆଶା ରଖିଛନ୍ତି ବଲାଙ୍ଗୀରବାସୀ । କିନ୍ତୁ ବଲାଙ୍ଗୀରବାସୀଙ୍କ ଏହି ସ୍ୱପ୍ନ କେବେ ପୂରଣ ହେବ ତାହା ଦେଖିବାର ଅଛି । କାହିଁକିନା ବଲାଙ୍ଗୀର ସହରରେ ଚାରିକଡେ ନିର୍ମାଣ ହେବାକୁଥିବା ବାଇପାସ ବିଳମ୍ବିତ ହୋଇଚାଲିଛି । ପ୍ରଥମକରି ଆରମ୍ଭ ହୋଇଥିବା ପୂର୍ତ୍ତବିଭାଗର ବାଇପାସ କାମ ଗତ ୧୫ବର୍ଷ ଭିତରେ ମାତ୍ର ୫୦% କାମ ସରିଛି ଓ ଏବେ ବାକିକାମ ହେଲା ବେଳକୁ ସୁପ୍ରିମକୋର୍ଟର ଏକ ମାମଲାରେ ଫସିରହିଛି । ଗତ ୨୦୨୩ର ଏକ ଟେଣ୍ଡର ପ୍ରକ୍ରୀୟାକୁ ବଲାଙ୍ଗୀରର ଠିକାଦାର ରାହୁଲ ମିଶ୍ର ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି । ସରକାର ଯଥେଷ୍ଟ କାରଣ ନଥାଇ ବାଇପାସକାମର ଟେଣ୍ଡରକୁ ରଦ୍ଦ କରିଦେଇଥିବା ନେଇ ରାହୁଲ ଅଭିଯୋଗ କରି ସୁପ୍ରିମକୋର୍ଟରେ ମାମଲା କରିଛନ୍ତି । ଫଳରେ ଏହି କୋର୍ଟମାମଲା ନସରିବା ପର୍ଯ୍ୟନ୍ତ ବାଇପାସ କାମ ଫସିରହିବ ବୋଲି ଜଣାପଡିଛି ।
    ପ୍ରକାଶ ଯେ,ଗତ ୨୦୦୯ ମସିହାରେ ବଲାଙ୍ଗୀର ବିଧାୟକ ଅନଙ୍ଗଉଦୟ ସିଂଦେଓ ରାଜ୍ୟସରକାରରେ ପୂର୍ତ୍ତବିଭାଗର ମନ୍ତ୍ରୀ ଥିବା ବେଳେ ଜାତୀୟରାଜପଥ-୨୬ର ମାଧିଆପାଲିଠାରୁ ସଦାଇପାଲିଦେଇ ଲର୍କିପାଲି ପର୍ଯ୍ୟନ୍ତ ୫.୫ କିମି ରାସ୍ତାକୁ ଇଡକୋ ବିଭାଗରୁ ନିର୍ମାଣ କରାଇଥିଲେ । ସେ ସମୟରେ ପ୍ରସ୍ତାବ କରାଯାଇଥିଲା ଯେ,ମାଧିଆପାଲିଠାରୁ ସଦାଇପାଲି,ଲର୍କିପାଲି,ଧୂମାମରା,ଗନ୍ଧରେଲ ଦେଇ ବିଜାଖମନ ପର୍ଯ୍ୟନ୍ତ ପ୍ରାୟ ୧୪ କିମି ବାଇପାସ ରାସ୍ତା ନିର୍ମାଣ ହେବ । ସେହି ହିସାବରେ ଡିଜାଇନ କରି ସରକାରଙ୍କ ଅନୁମୋଦନ ନେଇ ଆବଶ୍ୟକ ଜଙ୍ଗଲଜମି ଓ ଘରୋଇଜମିର ଅଧିଗ୍ରହଣ ପ୍ରକ୍ରୀୟା ଆରମ୍ଭ କରିଥିଲେ । ୨୦୧୧ ମସିହା ପର୍ଯ୍ୟନ୍ତ ଇଡୋକ ଜମିରେ ମାଧିଆପାଲିଠାରୁ ଲର୍କିପାଲି ପର୍ଯ୍ୟନ୍ତ ଚାନ୍ଦଲିପାହାଡ ପର୍ଯ୍ୟନ୍ତ ୫. କିମି ରାସ୍ତା ୯କୋଟି ଟଙ୍କାରେ ନିର୍ମାଣ ହୋଇଗଲା । କିନ୍ତୁ ବାକି ରାସ୍ତାକାମ ଆଉ ହୋଇପାରିଲା ନାହିଁଁ । ପରେ ଘରୋଇ ଜମି ଅଧିଗ୍ରହଣ କରାଯାଇ ଲର୍କିପାଲିଠାରୁ ଧୂମାମରା ପର୍ଯ୍ୟନ୍ତ ୨.୨କିମି ରାସ୍ତାକୁ ପୂର୍ତ୍ତବିଭାଗ ନିର୍ମାଣ କରିଛି । ଏବେ ଆଉ ବାକି ୬.୮ କିମି ବାଇପାସ ରାସ୍ତାକାମ ନିର୍ମାଣ ହେବାକୁ ଅଛି । ଏଥିପାଇଁ ୧୭.୫୦ ଏକର ଜଙ୍ଗଲଜମିର ଅନୁମତିର ଆବଶ୍ୟକତା ରହିଥିଲା । ଘରୋଇ ଜମିର ମାଧ୍ୟ ଅଧିଗ୍ରହଣ କରାଗଲା । ବନବିଭାଗ ଡିଜିପିଏସ ସର୍ଭେ ପରେ ଆବଶ୍ୟକ କାଗଜପତ୍ର ଦାଖଲ କଲାପରେ ଜଙ୍ଗଲଜମିର କେନ୍ଦ୍ରିୟପରିବେଶ ବିଭାଗର ଅନୁମତି ମିଳିସାରିଛି । ପୂର୍ତ୍ତବିଭାଗ ବିକଲ୍ପ ବନୀକରଣ ପାଇଁ ୩ କୋଟି ୨୫ଲକ୍ଷ ଟଙ୍କା ଜମା ମଧ୍ୟ କରିସାରିଛି । ପ୍ରଶାସନ ସିନ୍ଦୁରବାହାଲ ମୌଜାରେ ୩୪ଏକର ବନିକରଣ ପାଇଁ ସରକାରୀ ଜମିଦେଇସାରିଛି । ଏବେ ପ୍ରଶାସନିକ ଓ ପରିବେଶଗତ ଅନୁମତି ପାଇସାରି ୨୦୨୩ ମସିହାରେ ଟେଣ୍ଡର ବାହାରିଥିଲା । ଆଗ୍ରହୀ ଠିକାସଂସ୍ଥାମାନେ ଟେଣ୍ଡରରେ ଭାଗ ନେଇଥିଲେ । ଟେଣ୍ଡର ପ୍ରକ୍ରୀୟା ସରିଲା ବେଳେ ସରକାର ଟେଣ୍ଡରକୁ ବାତିଲ କରିଦେଲେ । ସରକାରଙ୍କ ଏଭଳି ନିଷ୍ପତ୍ତିକୁ ଚ୍ୟାଲେଞ୍ଜ କରି ଠିକାଦାର ରାହୁଲ ମିଶ୍ର ସୁପ୍ରିମକୋର୍ଟର ଦ୍ୱାରସ୍ଥ ହୋଇଛନ୍ତି । ତେବେ ପ୍ରାୟ ଦେଢବର୍ଷ ହୋଇଗଲା ପରେ ମଧ୍ୟ ସେନେଇ କୌଣସି ନିଷ୍ପତ୍ତି ହୋଇପାରିନାହିଁ । ଫଳରେ ପୂର୍ତ୍ତବିଭାଗର ବାଇପାସ କାମ ଝୁଲି ରହିଛି । ଏନେଇ ପୂର୍ତ୍ତବିଭାଗର ଅଧିକ୍ଷଣ ଯନ୍ତ୍ରୀ ଇଂ.ଆଶୁତୋଷ ଜେନାଙ୍କୁ ପଚାରିବାରୁ କୋର୍ଟର ମାମଲା ନସରିବା ପର୍ଯ୍ୟନ୍ତ କାମ ହୋଇପାରିବ ନାହିଁ ବୋଲି କହିଛନ୍ତି । ଠିକ ସେହିପରି କୋର୍ଟର ଦ୍ୱାରସ୍ଥ ହୋଇଥିବା ଠିକାଦାର ରାହୁଲ ମିଶ୍ରଙ୍କୁ ପଚାରିବାରୁ ସରକାରଙ୍କ ନୀୟମ ମୁତାବକ ଆମେ ଟେଣ୍ଡର ପ୍ରକ୍ରୀୟାରେ ଭାଗନେଇଥିଲୁ । କିନ୍ତୁ ସରକାର କୌଣସି କାରଣ ନଥାଇ ଟେଣ୍ଡରକୁ ବାତିଲ କରିଦେଲେ ,ସେଥିପାଇଁ ମୁଁ ମାନ୍ୟବର କୋର୍ଟଙ୍କ ଦ୍ୱାରସ୍ଥ ହୋଇଛି ବୋଲି କହିଛନ୍ତି ।