14-Oct-2025

ବଲାଙ୍ଗୀର(ପ୍ରେରଣା ଖବର): ରାଜ୍ୟସରକାର ପ୍ରତ୍ୟେକ ଜିଲ୍ଲାରେ ସାଇନ୍ସପାର୍କ ଓ ପ୍ଲାନେଟୋରିୟମ ନିର୍ମାଣ କରିବାକୁ ନିଷ୍ପତ୍ତି ନେଇଥିଲେ । ସେହିକ୍ରମରେ ଗତ ୨୦୧୯ ମସିହାରେ ତତକାଳିନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜେନ୍ଦ୍ରକଲେଜର ୭୫ବର୍ଷ ପୂର୍ତ୍ତିପାଳନ ଉତ୍ସବରେ ଯୋଗଦେଇ ବଲାଙ୍ଗୀରରେ ସାଇନ୍ସପାର୍କ ଓ ପ୍ଲାନେଟୋରିୟମ ନିର୍ମାଣ ପାଇଁ ଘୋଷଣା କରିଥିଲେ । ଏଥିପାଇଁ ସେ ୨୫ କୋଟି ଟଙ୍କାର ଅନୁଦାନ ମଧ୍ୟ ଘୋଷଣା କରିଥିଲେ । ପରବର୍ତ୍ତି ପର୍ଯ୍ୟାୟରେ ରାଜ୍ୟସରକାରଙ୍କ ପକ୍ଷରୁ ଏହି ଅନୁଦାନ ଆସିଥିଲା ଓ ରାଜେନ୍ଦ୍ର ବିଶ୍ୱବିଦ୍ୟାଳୟର ପଛପଟେ ଥିବା ସୂର୍ଯ୍ୟନଗରଠାରେ ୧୦ଏକର ଜମିରେ ଏହାର ନିର୍ମାଣ କାମ ଆରମ୍ଭ ହେଲା । କିନ୍ତୁ ସେହିକାମ ଦୀର୍ଘ ୪ବର୍ଷ ହେଲା ଚାଲିଛି ଓ ଏହା ମନ୍ଥରଗତିରେ ଚାଲିଛି । ନିର୍ମାଣକାରୀ ସଂସ୍ଥାର ମନମାନୀ କାରଣରୁ ଏହିକାମ ମନ୍ଥରଗତିରେ ଚାଲିଥିବା ଓ ମାତ୍ର ୫୦% କାମ ସରିଥିବା ଅଭିଯୋଗ ହେଉଛି । ଏହି ନିର୍ମାଣକାମକୁ କେନ୍ଦ୍ରିୟ ପିଏସୟୁ ଏନବିସିସି(ନେସନାଲ ବିଲଡିଂ କନଷ୍ଟ୍ରକସନ କର୍ପୋରେସନ) ନେଇ କାମ କରୁଛି । କିନ୍ତୁ କାମ ଏତେମନ୍ଥର ଗତିରେ ଚାଲିଛି ଯେ,କେବେ ଏହାର ନିର୍ମାଣକାମ ସରିବ ତାହା ସ୍ପଷ୍ଟ ଜଣାପଡୁନାହିଁ । ସୂର୍ଯ୍ୟନଗର ଠାରେ ଲକ୍ଷ୍ମୀଯୋରଖଣ୍ଡିରେ ବ୍ରିଜପାଖରେ ପ୍ରଶାସନ ଏହି ସାଇନ୍ସପାର୍କ ଓ ପ୍ଲାନେଟରିୟମ ପାଇଁ ଜମିଦେଇଛି । ରାଜେନ୍ଦ୍ର ବିଶ୍ୱବିଦ୍ୟାଳୟରୁ କେନ୍ଦ୍ରୀୟବିଦ୍ୟାଳୟ-୨କୁ ଗଲାେଳେ ରାସ୍ତାକଡରେ ଏହାର ନିର୍ମାଣ କାମ ଚାଲିଛି । ଏହାର ନିର୍ମାଣ କାମ ସରି କାର୍ଯ୍ୟକ୍ଷମ ହେଲେ ଛାତ୍ରଛାତ୍ରୀ ତଥା ବଲାଙ୍ଗୀରବାସୀ ଉପକୃତ ହୁଅନ୍ତେ । କେବେ ଏହିକାମ ସରିବ ସେନେଇ ଜନସାଧାରଣ ଅପେକ୍ଷାରେ ରହିଛନ୍ତି । ପୂର୍ବରୁ ବିଜେଡି ସରକାର ଅମଳରେ ତତ୍‌କାଳିନ ବିଜ୍ଞାନ ଓ ପ୍ରଯୁକ୍ତିବିଦ୍ୟା ବିଭାଗର ମନ୍ତ୍ରୀ ଅଶୋକ ପଣ୍ଡା ଅନେକଥର ଆସି ଏହାର ନିର୍ମାଣକାମର ତଦାରଖ କରୁଥିଲେ । କିନ୍ତୁ ରାଜ୍ୟରେ ସରକାର ବଦଳିଲା ପରେ ସରକାର କିମ୍ବା ପ୍ରଶାସନ କେହି ମଧ୍ୟ ଆଉ ତତ୍‌ପରତା ଦେଖାଉନଥିବା ଲକ୍ଷ୍ୟ କରଯାଇଛି । ପ୍ରକାଶ ଯେ,ଏହି ଏନବିସିସି ନିର୍ମାଣକାରୀ ସଂସ୍ଥା ବଲାଙ୍ଗୀର ପୌରାପାଳିକାଠାରୁ ଟାଉନହଲ ଉନ୍ନୟନକାମକୁ ଟେଣ୍ଡରରେ ନେଇ କରୁନାହିଁ । ସେଥିପାଇଁ  ବଲାଙ୍ଗୀର ପୌରପାଳିକା ପକ୍ଷରୁ ଏହି ସଂସ୍ଥାକୁ କାରଣଦର୍ଶାଅ ନୋଟିସ ମଧ୍ୟ ଦିଆଯାଇ ସାରିଛି । ଏବେ ପ୍ଲାନେଟୋରିୟମ ଓ ସାଇନ୍ସପାର୍କ କାମକୁ ନିର୍ଦ୍ଧାରିତ ସମୟ ଅବଧି ମଧ୍ୟରେ ନସାରି ନିର୍ମାଣସଂସ୍ଥା ଦିନ ଗଡାଇ ଚାଲିଛି । ଫଳରେ ଜନସାଧାରଣରେ ଏହି ସଂସ୍ଥାପ୍ରତି ଆସ୍ଥା କମିଯାଉଛି ଓ ଜନଅସନ୍ତୋଷ ବୃଦ୍ଧି ପାଇଛି । ତେବେ ଏହି ଅଭିଯୋଗ ନେଇ ଏନବିସିସି ସଂସ୍ଥାର ପ୍ରୋଜେକ୍ଟ ମ୍ୟାନେଜର ବିଜୟକୁମାର ନାଥଙ୍କୁ ଫୋନରେ ଯୋଗାଯୋଗ କରାଯାଇଥିଲେ ହେଁ ସେ ଫୋନ ରିସିଭ କରିନଥିଲେ । ଜିଲ୍ଲାପ୍ରଶାସନ ଓ ରାଜ୍ୟସରକାର ତୁରନ୍ତ ଏଦିଗରେ ପଦକ୍ଷେପ ନିଅନ୍ତୁ ବୋଲି ଜନସାଧାରଣରେ ଦାବି ହେଉଛି ।