09-Oct-2025

ବେଲପଡା(ପ୍ରେରଣା ଖବର):  ମଣିଷକୁ ଯେତେବେଳେ ଦୁଃଖ ଆସେ, ତାର ଭାଇ ବନ୍ଧୁ ସହିତ ଆସେ l ପରିସ୍ଥିତି ଆଗରେ ମଣିଷ ଏତେ ବିବସ୍ ଏବଂ ଅସହାୟ ଯେ ସେ ଚାହିଁଲେ ବି କିଛି କରିପାରେ ନାହିଁ l ଏପରି କିଛି ବିଷମ ପରିସ୍ଥିତି ର ସାମନା କରି ପ୍ରତିଦିନ ଜୀବନ ଯୁଦ୍ଧରେ ଦୁଃଖ ଓ ଯନ୍ତ୍ରଣା ସହ ଜୁଝୁଛନ୍ତି ଟିମନ ବାଗ ସଙ୍ଗୀତା ବାଗ ଙ୍କ ପରିବାର l ବଲାଙ୍ଗୀର ଜିଲ୍ଲା ବେଲପଡ଼ା ବ୍ଲକ ଘାଗୁର୍ଲି ଗାଁ ର  ବାସିନ୍ଦା ଟିମନ କିଛି ଛୋଟ ମୋଟ  ବ୍ୟବସାୟ କରି ନିଜ ପରିବାର ପୋଷଣ କରନ୍ତି l ଏହି ଦମ୍ପତ୍ତି ଙ୍କ ୪  ପୁଅଝିଅ ମଧ୍ୟରୁ ଗୋଟିଏ ଝିଅ ଯଶୋବନ୍ତ(୧୮), ମୁକେଶ(୧୭) ଓ ଦୀପକ(୧୫) ହେଉଛନ୍ତି ଜନ୍ମରୁ ଭିନ୍ନକ୍ଷମ l ନିଜ ଜନ୍ମ କଲା ପୁଅ ଝିଅ ଙ୍କୁ ଅତି କଷ୍ଟରେ ଅନେକ ଝଡଝଞ୍ଜା ଅତିକ୍ରମ କରି ଲାଳନପାଳନ କରୁଛନ୍ତି ସ୍ଵାମୀ ସ୍ତ୍ରୀ l ଝିଅ ଯଶୋବନ୍ତ କଲେଜ ମଧ୍ଯ ପାଦ ମାଡିଥିଲା କିନ୍ତୁ ଶାରୀରିକ ଅକ୍ଷମତା ଯୋଗୁଁ ପାଠ ପଢି ପାରିନଥିଲା । ନିଜ ତିନି ପୁଅ ଝିଅ ର ଚିକିତ୍ସା ପାଇଁ  ବିଚରା ଟିମନ ଲକ୍ଷାଧିକ ଟଙ୍କା ଖର୍ଚ୍ଚ କରିସାରିଲେଣି କିନ୍ତୁ ତାଙ୍କୁ ମିଳିଛି କେବଳ ଦୁଃଖ ଓ ନୈରାଶ୍ଯ l  ସବୁଠାରୁ ଚିନ୍ତାର ବିଷୟ ମୁକେଶ ଓ ଦୀପକ ମଧୁମେହ ରୋଗରେ ପୀଡିତ ଓ ପ୍ରତିମାସରେ  ଇନସୁଲିନ ବାବଦକୁ ହାରହାରି ହଜାର ଟଙ୍କା ଖର୍ଚ୍ଚ କରୁଛନ୍ତି ଟିମନ । ସରକାରୀ ସାହାଯ୍ଯ କହିଲେ ୩୫ଶହ ଟଂକା ଭତ୍ତା ଓ ଅନ୍ତୋଦୟ କାର୍ଡ l ଏହା ବ୍ୟତିତ ଅନ୍ୟ କୌଣସି ସରକାରୀ ସାହାଯ୍ଯ ସହଯୋଗ ପାଇ ନାହାଁନ୍ତି ଟିମନ । ବିଡିଓ ଙ୍କ ଠାରୁ ଆରମ୍ଭ କରି ଜିଲ୍ଲାପାଳଙ୍କ ପର୍ଯ୍ୟନ୍ତ ସବୁଠାରେ ନିଜର ଦୁଃଖ ର କାହାଣୀ କହି ସାରିଲା ପରେ  ବି  ଟିମନ ଏବେ ନିରାଶ ହୋଇ ଭାଗ୍ୟକୁ ଆଦରି ରହିଛନ୍ତି l ଏପରି ପରିସ୍ଥିତିରେ ସରକାର ଟିମନ ଙ୍କ ତିନି ପୁଅଝିଅ ର ଚିକିତ୍ସା ଖର୍ଚ୍ଚ ବହନ କଲେ ଏମାନେ ପୁଣିଥରେ ନିଜର ଭିବିଷ୍ୟତ ଗଢି ପାରନ୍ତେ ବୋଲି ମତପ୍ରକାଶ ପାଇଛି l