15-Sep-2025

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)
ସୁବର୍ଣ୍ଣପୁର ର ଇଷ୍ଟଦେବୀ ମା ସୁରେଶ୍ଵରୀଙ୍କ ମନ୍ଦିର ଯଜ୍ଞ ମଣ୍ଡପରେ ବିଶ୍ୱର କଲ୍ୟାଣ ତଥା ସୁବର୍ଣ୍ଣପୁର ଜିଲ୍ଲାର ସର୍ବାଙ୍ଗୀନ ବିକାଶ ପାଇଁ ଅନୁଷ୍ଟିତ ହେବାକୁ ଥିବା ନବଦିନାତ୍ମକ ଚଣ୍ଡୀଯଜ୍ଞ ପାଇଁ ଆଜି ସନ୍ଧ୍ୟାରେ ଏକ ସାମ୍ୱାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି l ସେପ୍ଟେମ୍ବର ୧୯ ତାରିଖ ରୁ ଅକ୍ଟୋବର ୨ ତାରିଖ ଯାଏ   ହେବାକୁ ଥିବା ଏହି ଚଣ୍ଡୀଯଜ୍ଞରେ ୧୯ ତାରିଖ ଶୁକ୍ରବାର ଶୁଭସ୍ତମ୍ଭ ସ୍ଥାପନ, ୨୦ ତାରିଖ ଅଷ୍ଟ ବିଷ୍ଣୁ, ଅଷ୍ଟ ଶମ୍ଭୁ, ଅଷ୍ଟ ଚଣ୍ଡୀ, ଅଷ୍ଟ ହନୁମାନ ଙ୍କୁ ନିମନ୍ତ୍ରଣ, ୨୧ ତାରିଖ ରେ କଳସ ଯାତ୍ରା ଏବଂ ୨୨ ତାରିଖ ସୋମବାର ରୁ ୨ ତାରିଖ ଗୁରୁବାର ପର୍ଯ୍ୟନ୍ତ ଚଣ୍ଡୀ ପାଠ ଓ ଘୃତନାର୍ଦ୍ଧ ଅନୁଷ୍ଠିତ ହେବା ସହ ସନ୍ଧିପୂଜା, କୁମାରୀପୂଜା, ଅପରାଜିତା ପୂଜା ଓ ପ୍ରତ୍ୟହ ମା ଙ୍କ ନୂତନ ବେଶ ଦର୍ଶନ କରିବେ ଶ୍ରଦ୍ଧାଳୁ l ପ୍ରତ୍ୟହ ମାଙ୍କ ଦ୍ୱାର ଫିଟା ନୀତି, ମଙ୍ଗଳ ଆଳତି, ସୂର୍ଯ୍ୟ ପୂଜା, ଷୋଡ଼ଶ ପୂଜା ଚଣ୍ଡୀସ୍ତୋତ୍ର ପଠନ ସହ ଶ୍ରୀ ଶ୍ରୀ ସପ୍ତଶତୀ ଚଣ୍ଡୀଯଜ୍ଞ  ଅନୁଷ୍ଟିତ ହେବ ବୋଲି ମା ଙ୍କ ସୁରେଶ୍ଵରୀ ଯଜ୍ଞ କମିଟି ପକ୍ଷରୁ ସୁଚନା ମିଳିଛି l ମା ଙ୍କ ପରମ ଭକ୍ତ ତଥା କଲିକତା ହାଇକୋର୍ଟର ପ୍ରାକ୍ତନ ବିଚାରପତି ଶ୍ରୀ ଚିତ୍ତ ରଞ୍ଜନ ଦାଶଙ୍କ ପରାମର୍ଶ କ୍ରମେ ଅନୁଷ୍ଟିତ ଏହି ସମ୍ମିଳନୀରେ ବୈକୁଣ୍ଠ ଶତପଥି, ପ୍ରଦୀପ ପୁରୋହିତ, ସତ୍ୟନାରାୟଣ ତ୍ରିପାଠୀ, ଶ୍ରୀବତ୍ସ ମଲ୍ଲିକ ଓ ମୂଖ୍ୟ ପଣ୍ଡିତ କାଳୀଚରଣ ମିଶ୍ର ପ୍ରମୁଖ ସମସ୍ତ ସୂଚନା ପ୍ରଦାନ କରିଥିଲେ l