12-Sep-2025

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ): ତରଭା ଅଞ୍ଚଳରେ ଦିନକୁ ଦିନ ବଢିଚାଲିଛି ଚୋରି, ଡକାୟତି, ଲୁଟପାଟ, ନିଶା କାରବାର ଭଳି ଅନେକ ଘଟଣା I ଏହି କ୍ରମରେ ତରଭା ବ୍ଲକ ସରଗଜ ଗ୍ରାମପଞ୍ଚାୟତ ମଧ୍ୟ ବାଦ ପଡ଼ିନାହିଁ I ସରଗଜ ପଞ୍ଚାୟତରେ ପୂର୍ବରୁ ଏଟିଏମ ମେସିନ ଭାଙ୍ଗି ଟଙ୍କା ଲୁଟ ଉଦ୍ୟମ, ସରଗଜ ସ୍ମାର୍ଟ ସ୍କୁଲ ଆଗରେ ଦିନ ଦ୍ୱିପହରରେ ୩ ଲକ୍ଷରୁ ଉର୍ଦ୍ଧ ଟଙ୍କା ଲୁଟ ଘଟଣା ଲୋକଙ୍କ ମନରୁ ଯାଇ ନ ଥିବା ବେଳେ ପୁଣି କିଛି ଦିନ ହେବ ବାଇକ୍ ଚୋରୀ, ଘର ଆଗରୁ ଟ୍ରାକ୍ଟରରୁ ବ୍ୟାଟେରୀ ଚୋରି ଭଳି ଅନେକ ଘଟଣା ଘଟିଥିବା ନେଇ ଅଞ୍ଚଳବାସୀ ଭୟଭୀତ ଅଛନ୍ତି I ଏହାକୁ ନେଇ ସରଗଜ ପଞ୍ଚାୟତର ଯୁବ ଗୋଷ୍ଠୀ ଏକଜୁଟ ହୋଇ ତରଭା ଥାନାକୁ ଆସି ଆଇଆଇସି ଅନିତା କିଟୋ ଙ୍କୁ ଲିଖିତ ଅଭିଯୋଗ କରିଛନ୍ତି I ପଞ୍ଚାୟତବାସୀଙ୍କ କହିବା ଅନୁସାରେ ତରଭା ପୋଲିସ ଅପରେସନ ପ୍ରହାର ଚଳାଇ କେବଳ ଗଞ୍ଜେଇ ଧରିବାରେ ଦିନରାତି ବ୍ୟସ୍ତ ରହୁଛି I କିନ୍ତୁ ଲୋକଙ୍କ ଧନଜୀବନ ରକ୍ଷା ଯାହାକି ପୋଲିସ୍ ର ଏହି ମୁଖ୍ୟ କର୍ତ୍ତବ୍ୟ ଭୁଲି ଯାଇଛି I ତରଭା ପୋଲିସ ଲୋକଙ୍କୁ ସୁରକ୍ଷା ଦେବାରେ ଫେଲ୍ ମାରିଛି ବୋଲି ଅଭିଯୋଗ କରିଛନ୍ତି ଅଞ୍ଚଳବାସୀ I  ଆଗାମୀ ଦିନରେ ଯଦି ପୋଲିସ ଚୋରି, ଡକାୟତି, ଲୁଟପାଟ, ନିଶା କାରବାର ରୋକିବାରେ ବିଫଳ ହୁଏ ତାହେଲେ ତୀବ୍ର ଆନ୍ଦୋଳନ କରିବା ସହ ରାଜରାସ୍ତାକୁ ଓଲ୍ଲହାଇବାକୁ ଯୁବକ ମାନେ ଚେତାବନୀ ଦେଇଛନ୍ତି I ପ୍ରକାଶ ଥାଉ କି ପୂର୍ବରୁ ତରଭା ପୋଲିସ ତାର କାର୍ଯ୍ୟଦକ୍ଷତାକୁ ନେଇ ସର୍ବଭାରତୀୟ ସ୍ତରରେ ଚତୁର୍ଥ ସ୍ଥାନ ବଜାୟ ରଖି ପୁରସ୍କୃତ ହୋଇଥିଲା I ପୋଲିସ ର ନାଁ ଶୁଣିଲେ ଦୁର୍ବୃତ୍ତ ମାନେ ଛାନିଆ ହୋଇ ପଡୁଥିଲେ I କିନ୍ତୁ ବର୍ତମାନର ପରିସ୍ଥିତି ଦେଖି ଜନସାଧାରଣ ମଧ୍ୟରେ ପୋଲିସର କାର୍ଯ୍ୟ କଳାପ ଉପରେ ସନ୍ଦେହ ଉପୁଜୁଛି ଓ ଭରଷା ତୁଟି ଯାଇଛି I ତରଭା ଅଞ୍ଚଳରେ ପୁନର୍ବାର ପୂର୍ବଭଳି ଶାନ୍ତି ଫେରାଇବା ନେଇ ଦକ୍ଷ ପୋଲିସ ଅଫିସର ଡିଆଇଜି ହିମାଂଶୁ ଲାଲ ଓ ରାଜ୍ୟର ଅନ୍ୟ ଉଚ୍ଚସ୍ତରୀୟ ଅଧିକାରୀଙ୍କ ହସ୍ତକ୍ଷେପ ନିହାତି ଜରୁରୀ ବୋଲି ସାଧାରଣରେ ଚର୍ଚ୍ଚା ହେଉଛି I ଅନ୍ୟ ପକ୍ଷରେ ଦୀର୍ଘ ବର୍ଷ ରୁ ଜିଲ୍ଲାରେ ସହର ଓ ବ୍ଲକ ଅଞ୍ଚଳରେ ଭୋଟବ୍ୟାଙ୍କ ସୃଷ୍ଟି କରିବାକୁ ବଙ୍ଗାଳୀ ବିହାରୀ ବିଭିନ୍ନ ସମ୍ପ୍ରଦାୟର ବାହାର ରାଜ୍ୟ ର ଲୋକଙ୍କୁ ଜାଗା ଦେବା ପ୍ରଶ୍ରୟ ଦେବା, ତାଙ୍କୁ ପୋଲିସ ଚିହ୍ନଟ ନ କରିବା ଯୋଗୁଁ ଆଜି ଚୋରୀ ଡକାୟତି ଲୁଟତରାଜ ଘଟଣା ବହୁମାତ୍ରାରେ ବୃଦ୍ଧି ପାଇଥିବା ଦେଖା ଦେଇଛି l ଯାହାର ଏକ ଜ୍ୱଳନ୍ତ ଉଦାହରଣ  ୫ଦିନ ପୂର୍ବରୁ ତିନି ଜଣ ବିହାରୀ ଯୁବକଙ୍କ ଦ୍ବାରା ସୋନପୁର ସହରରୁ ନାବାଳକ ଅପହରଣ l ଏ ସବୁ ଘଟଣା ପାଇଁ  ତଳସ୍ତରରୁ ଜିଲ୍ଲାସ୍ତର ଯାଏ ଜନପ୍ରତିନିଧି ଓ ଜିଲ୍ଲା ପୋଲିସ ହିଁ ଦାୟୀ ବୋଲି ଜିଲ୍ଲା ବୁଦ୍ଧିଜୀବୀ ପ୍ରକାଶ କରିଛନ୍ତି l