10-Aug-2025

କାଲିମେଳା(ସନ୍ତୋଷ କୁମାର ପଣ୍ଡା): ୧୫ ବର୍ଷୀୟା ଆଦିବାସୀ ନାବାଳିକା ଯୁବତୀ ଗର୍ଭବତୀ କିନ୍ତୁ ପ୍ରଶାସନ ପାଖରେ ଏହାର ନାହିଁ ଖବର । ଦିନକୁ ଦିନ ଅପ୍ରାପ୍ତ ବୟସ୍କ ଙ୍କ ପ୍ରତି ବଢିଚାଲିଛି ଏପରି ଅନ୍ୟାୟ ଏବଂ ଅପରାଧିକ ଘଟଣା।
ମାଲକାନଗିରି ଜିଲ୍ଲା କାଲିମେଳା ବ୍ଲକ ମୋଟୁ ଥାନା ଅନ୍ତର୍ଗତଏମ୍.ପି.ଭି-୮୩ ଗ୍ରାମ ନିକଟସ୍ଥ ନାକାଗୁଡ଼ା ଗ୍ରାମରେ ଦେଖିବାକୁ ମିଳିଛି ଏପରି ଏକ ନିନ୍ଦନୀୟ ଘଟଣା। ନାକାଗୁଡ଼ା ଗ୍ରାମର ଜଗା ମାଡ଼ି ନାମକ ଜଣେ ଯୁବକ ସେହି ଗ୍ରାମର ଜଣେ ୧୫ ବର୍ଷୀୟା ନାବାଳିକା ସହ ଦୀର୍ଘ ଦିନ ଧରି ଶାରୀରିକ ସମ୍ପର୍କ ସ୍ଥାପନ କରି ଆସୁଥିଲା । 
 ଯାହାଫଳରେ  ଯୁବତୀ ଜଣକ କିଛି ମାସ ପୂର୍ବେ ଗର୍ଭବତୀ ହେବା କଥା ଯୁବତୀଙ୍କ ପରିବାର ଲୋକେ ଜାଣିବାକୁ ପାଇଥିଲେ । ସୂଚନା ଥାଉକି ଯୁବକ ଜଣକ ପୂର୍ବରୁ ବିବାହିତ କିନ୍ତୁ କୌଣସି କାରଣରୁ ସ୍ତ୍ରୀ ଛାଡି ଚାଲି ଯାଇଛି । ଏହି କଥାରେ ଚିନ୍ତିତ ହୋଇ ଯୁବତୀଙ୍କ ମା, ଭାଇ ଉକ୍ତ ଯୁବକ ର ବାପାକୁ ଜଣାଇ ଥିଲେ। ଏହି ବାବଦରେ ଗ୍ରାମରେ ଏକ ଗ୍ରାମ ସଭା ମଧ୍ୟ ହୋଇଥିଲା। କିନ୍ତୁ ଉକ୍ତ ଘଟଣାରେ ସମ୍ପୃକ୍ତ ଯୁବକ କେଉଁଠାକୁ ଫେରାର ହୋଇଯାଇଥିଲା ଏହାସହ ଯୁବକର ପରିବାର ଲୋକେ ମଧ୍ୟ ନାବାଳିକା ଯୁବତୀକୁ ଗ୍ରହଣ କରିବାକୁ ପଛେଇଥିଲେ । ଯୁବତୀଙ୍କ ପରିବାର ଅତ୍ୟନ୍ତ ଗରିବ ହୋଇଥିବାରୁ ଭାଗ୍ୟ କୁ ଭରସା ମାନି ଚାଲିଛନ୍ତି । କିନ୍ତୁ ଯୁବତୀ ଜଣକ ବର୍ତ୍ତମାନ ପ୍ରାୟ ୮ ମାସର ଗର୍ଭବତୀ  ହୋଇଯାଇଛି। ଜଣେ ୧୫ ନାବାଳିକା ଯୁବତୀର ସମ୍ପୂର୍ଣ୍ଣ ଶାରୀରିକ ଗଠନ ଏବଂ ପରିପ୍ବକତା ଏହି ବୟସରେ ଆସିନଥାଏ ତେଣୁ ମା ଏବଂ ଶିଶୁ ଙ୍କ ଜୀବନ ପ୍ରତି ବିପଦ ରହିଥାଏ । ତେଣୁ ମା ଏବଂ ଶିଶୁ ର ଯତ୍ନ ସହ ସୁରକ୍ଷା ଦୃଷ୍ଟିରେ ରଖିବା ଅତ୍ୟନ୍ତ ଜରୁରୀ ଅଟେ। ଏପରି ଘଟଣା ଘଟି କେଇଟା ମାସ ବିତି ଯାଇଥିବା ସତ୍ୱେ ପ୍ରଶାସନ ତଥା ଅଧିକାରୀଙ୍କ ଆଖିକୁ କିପରି ଦୃଶ୍ୟମାନ ହୋଇନାହିଁ  ତାହା ଆଶ୍ଚର୍ଯ୍ୟର କଥା ଅଟେ। ଜିଲ୍ଲା ରେ ମାଳ ମାଳ ସଂସ୍ଥା ରହି ମଧ୍ୟ ଏଯାଏଁ କୌଣସି ପଦକ୍ଷେପ କିପରି ହୋଇପାରିନି ତାହା ମଧ୍ୟ ଚିନ୍ତା ଜନକ ବିଷୟ । ଯୁବତୀ ତଥା ଶିଶୁ ର ଜୀବନ କିପରି ସୁରକ୍ଷା କରାଯାଇପାରିବ ଏବଂ ଦୋଷୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଅଞ୍ଚଳ ବାସୀ ଙ୍କ ଦାବି ରହିଛି ।