25-Jul-2025

ପ୍ରଶାସନର ପ୍ରତିଶୃତି ପରେ ରାସ୍ତାରୋକ ପ୍ରତ୍ୟାହାର

କଣ୍ଟାମାଳ(ଜୟ କୁମାର ମହାରଣା)  ଅଜଣା ଗାଡି ଧକ୍କାରେ ସାଇକେଲ ଆରୋହୀଙ୍କ ମୃତ୍ୟୁ ଘଟଣାକୁ ନେଇ ଆଜି ସକାଳ ୬ଟା ଠାରୁ ଶତାଧିକ ଉତ୍ୟକ୍ତ ମହିଳା ଓ ପୁରୁଷ ମନମୁଣ୍ଡା -କଣ୍ଟାମାଳ ୪୧ନଂ ରାଜ୍ୟ ରାଜପଥର ବଡକୁଶଙ୍ଗ ଠାରେ ରାଜରାସ୍ତା ଅବରୋଧ କରି ପୀଡିତ ପରିବାରକୁ କ୍ଷତିପୂରଣ, ଦୁର୍ଘଟଣା ଘଟାଇଥିବା ଅଭିଯୁକ୍ତକୁ ତୁରନ୍ତ ଗିରଫ ଦାବିକୁନେଇ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର କଣ୍ଟାମାଳ ତହସିଲଦାର ଶ୍ୱେତପଦ୍ମା ଯୋଶୀ ଙ୍କୁ ପ୍ରଦାନ କରିଥିଲେ  l ପରେ ବୌଦ୍ଧ ଏସ୍ଡ଼ିପିଓ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା ପରେ ରାସ୍ତା ଅବରୋଧ ହଟିଥିଲା l   ସୂଚନାପ୍ରକାରେ କଣ୍ଟାମାଳ ଥାନା ରେଙ୍ଗାଲି ପଞ୍ଚାୟତ ବଡ଼କୁଶଙ୍ଗ ଗ୍ରାମର ଦୟାନିଧି ରଣା (୪୫) ବୁଧବାର ଅପରାହ୍ନ ରେ ପଲସାଗୋରାକୁ ସାଇକେଲ ସଜାଡିବାକୁ ଯାଇଥିଲେ  l ସଂଧ୍ୟାରେ ପଲସାଗୋରାରୁ ଫେରିବା ବାଟରେ ବଡ଼କୁସଙ୍ଗ ନିକଟ ଭୂମିଗୁଡ଼ି ଠାରେ  ପଲସାଗୋରା ପଟୁ କଣ୍ଟାମାଳ ଦିଗକୁ ଦ୍ରୁତଗତିରେ ଯାଉଥିବା ଏକ ଅଜଣା ଗାଡି ସାଇକେଲକୁ ପଛପଟୁ ଧକ୍କା ଦେଇଥିଲା  l  ଖବର ପାଇ ପରିବାର ଓ ଗାଁ ଲୋକେ ଘଟଣାସ୍ଥଳରେ ପହଞ୍ଚି କଣ୍ଟାମାଳ ପୋଲିସକୁ ଖବର ଦେବାରୁ ଦୁର୍ଘଟଣା ସ୍ଥଳରେ ପୋଲିସ ପହଞ୍ଚି ଗୁରୁତରଙ୍କୁ କଣ୍ଟାମାଳ ଡାକ୍ତରଖାନାକୁ ଆଣିଥିଲେ  l  ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ୍ୟୁକୁ ନେଇ ଆଜି ସକାଳ ୬ଟା ଠାରୁ ସ୍ଥାନୀୟ ଅଂଚଳର ଶତାଧିକ ଉତ୍ୟକ୍ତ ମହିଳା ଓ ପୁରୁଷ ମନମୁଣ୍ଡା -କଣ୍ଟାମାଳ ୪୧ନଂ ରାଜ୍ୟ ରାଜପଥର ବଡକୁଶଙ୍ଗ ଠାରେ ରାଜରାସ୍ତା ଅବରୋଧ କରିଥିଲେ  l  କଣ୍ଟାମାଳ ତହସିଲଦାର ଶ୍ରୀମତୀ ଯୋଶୀ ଓ ଥାନାଧିକାରୀ ଭାବାନନ୍ଦ ପ୍ରଧାନ ଆନ୍ଦୋଳନକାରୀଙ୍କୁ ବୁଝାଇଥିଲେହେଁ ଜିଲ୍ଲାପାଳ ଆସିଲେ ଧାରଣା ପ୍ରତ୍ୟାହାର ପାଇଁ ଅଡିବସିଥିଲେ ଆନ୍ଦୋଳନକାରୀ  l  ପରେ ବୌଦ୍ଧ ଏସ୍ଡ଼ିପିଓ ଘଟଣାସ୍ଥଳକୁ ଆସି ତିନିଦିନ ମଧ୍ୟରେ ଅଭିଯୁକ୍ତକୁ ଗିରଫ ପାଇଁ ପ୍ରତିଶୃତି ଏବଂ ପୀଡିତ ପରିବାରକୁ ୪ଲକ୍ଷ ଟଙ୍କାର ସହାୟତା ରାଶି ପ୍ରଦାନ ପାଇଁ ଟୁଇଟ ଯୋଗେ ମାନ୍ୟବର ଓଡିଶା ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝିଙ୍କ ଘୋଷଣା ପରେ ଆନ୍ଦୋଳନ ପ୍ରତ୍ୟାହାର ହୋଇଥିଲା  l  ସେହିପରି ହରିଶ୍ଚନ୍ଦ୍ର ଯୋଜନା ରୁ ୩ହଜାର ଓ ରେଙ୍ଗାଲି ସରପଞ୍ଚ ୨ହଜାର ଟଙ୍କାର ନଗଦ ସହାୟତା ରାଶି ପ୍ରଦାନ କରିଥିଲେ  l  ଆନ୍ଦୋଳନକାରି ଓ ପୋଲିସ ପ୍ରଶାସନ ସହ ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଅନିଲ ପ୍ରଧାନ,ବିଜେଡି ଜିଲ୍ଲା ଉପସଭାପତି ରାଧାବଲ୍ଲଭ ପ୍ରଧାନ, କନ୍ଧମାଳ ସାଂସଦ ପ୍ରତିନିଧି ଦୀପକ ବାରିକ ସମେତ ଅନ୍ୟମାନେ ଉପସ୍ଥିତ ରହି ଆଲୋଚନାରେ ସହଯୋଗ କରିଥିଲେ  l