12-Jul-2025

ବିନିକା(ହିଂମାଶୁ ଶେଖର ପୁଟେଲ) ଦେଖେନ ସୁନ୍ଦୁରି ଫଲସା ଫୁଲ ରୀତିରେ ମରାମତି ହୋଇଛି ବିନିକା ଶିଶୁ ମନ୍ଦିର ରାସ୍ତା । ସହର ମୁଖ୍ୟ ରାସ୍ତାକୁ ସଂଯୋଗ କରିଥିବା ଶିଶୁ ମନ୍ଦିର ରାସ୍ତାର ପ୍ରବେଶ ପଥରେ ଗର୍ତ୍ତ ସୃଷ୍ଟି କରି ବର୍ଷା ପାଣି ଭରି ରହିଥିଲା ।ଯାହାକି ପୋଖରୀର ଭ୍ରମ ସୃଷ୍ଟି କରିଥିଲା । ପାଣି ଭିତର ଦେଇ ଦୈନନ୍ଦିନ ଯିବା ଆସିବାକୁ ପଡୁଥିଲା ।ହେଲେ ସେହି ପାଣି ଭର୍ତ୍ତି ଗର୍ତ୍ତ ପାରି ହେବାକୁ ଉଭୟ ପଟରେ ଭିଡ ମଧ୍ୟ ଜମି ଅପେକ୍ଷା କରିବାକୁ ପଡ଼ିଥିଲା ।କାରଣ ସୃଷ୍ଟି ଗର୍ତ୍ତରେ ଟିକିଏ ଅସାବଧାନତା ହେଲେ ସାଧାରଣ ଲୋକେ ଦୁର୍ଘଟଣାଗ୍ରସ୍ତ ହେବା ସହିତ କାଦୁଅ ପାଣିରେ ଭିଜିବାକୁ ପଡୁଥିଲା ।ପ୍ରାୟ ୨୦ବର୍ଷ ପୂର୍ବରୁ ନିର୍ମାଣ ହୋଇଥିବା ଏହି କଂକ୍ରିଟ ରାସ୍ତାର ବିଭିନ୍ନ ସ୍ଥାନରେ ସିମେଣ୍ଟ ଚିରା ଚିରା ହୋଇ ଫାଟି ଯାଇ ଛୋଟ ବଡ଼ ଗର୍ତ୍ତ ସୃଷ୍ଟି କରିଛି । ସେହିପରି କେତେକ ସ୍ଥାନରେ ସିମେଣ୍ଟ ନଥିବାରୁ ରାସ୍ତାଟି ମାଟି ରାସ୍ତାରେ ପରିଣତ ହେଲାଣି ।ପୁଣି ରାସ୍ତାର ଉଭୟ ପାର୍ଶ୍ବରେ ଅନାବନା ଗଛ ଲତା ଭରି ରହିଥିବାରୁ ରାସ୍ତାଟି ଅତ୍ୟନ୍ତ ସଂକୀର୍ଣ୍ଣ ହୋଇପଡିଛି ।ନୀତି ପ୍ରତିଦିନ ଏହି ରାସ୍ତାରେ ସ୍କୁଲ,କଲେଜକୁ ଶହ ଶହ ଛାତ୍ରଛାତ୍ରୀ ଅଧ୍ୟୟନ ପାଇଁ ଯାଉଥିବା ବେଳେ ୪/୫ଖଣ୍ଡ ଗ୍ରାମର ଲୋକେ ମଧ୍ୟ ଯିବା ଆସିବା କରୁଛନ୍ତି ।ସେହିପରି କୃଷି,ଜଙ୍ଗଲ,ଗ୍ରାମ୍ୟ ଉନ୍ନୟନ ବିଭାଗ ରହିଥିବାରୁ ବିଭିନ୍ନ କାମ ନେଇ ଲୋକେ ଓ ମା ସନ୍ତୋଷ ମନ୍ଦିର ଥିବାରୁ ଦର୍ଶନ ପାଇଁ ଭକ୍ତଙ୍କ ଯିବା ଆସିବା ହେଉଛି ।ରାସ୍ତାର ଅବସ୍ଥା ସମ୍ପର୍କରେ ୯ତାରିଖ ପ୍ରେରଣା ଖବରକାଗଜରେ ଖବର ପ୍ରକାଶ ପାଇଥିଲା ।ଖବରକୁ କେତେକ ସାମାଜିକ କର୍ମୀ ସୋସିଆଲ ମିଡିଆରେ ଭାଇରାଲ କରିବା ସହିତ ରମେଶ ମେହେର ନାମକ ଜଣେ ବ୍ୟକ୍ତି ମାନ୍ୟବର ମୁଖ୍ୟମନ୍ତ୍ରୀ,ମୁଖ୍ୟ ଶାସନ ସଚିବ,ଏଚୟୁଡିଡି ବିଭାଗ ଓ ସ୍ଥାନୀୟ ଏନଏସି ପ୍ରଶାସନକୁ ଟୁଇଟ କରିଥିଲେ। କିନ୍ତୁ ଦୁଃଖର ବିଷୟ ସମସ୍ତଙ୍କ ପାଇଁ ବିପଦପୂର୍ଣ୍ଣ ସାଜିଥିବା ଏହି ରାସ୍ତାର ସମାଧାନ ଦିଗରେ ପ୍ରଶାସନ ତରଫରୁ ଅଦ୍ୟାବଧି ସ୍ଥାୟୀ ପ୍ରତିକାର କରାଯାଇ ନାହିଁ । ହେଲେ ଗତକାଲି ସନ୍ଧ୍ୟାରେ ରାସ୍ତାର ପ୍ରବେଶ ପଥରେ ଭରି ରହିଥିବା ପାଣିକୁ ନିଷ୍କାସନ କରାଯିବା ସହିତ ଆବୁଡା ଖାବୁଡ଼ାକୁ ଯେସିବି ମେସିନ ଦ୍ଵାରା ସମତୁଲ କରାଯାଇଛି।  ତେବେ ରାସ୍ତାର ଅବସ୍ଥା ନେଇ ଏବେବି ଛାତ୍ରଛାତ୍ରୀ ତଥା ଜନସାଧାରଣଙ୍କୁ ଦୁଃଖ ଦେଉଥିବା ବେଳେ କେବଳ ପ୍ରବେଶ ପଥରେ ସମତୁଲ "ଦେଖେନ ସୁନ୍ଦୁରୀ ଫଲସା ଫୁଲ" ବୋଲି ଲୋକେ କହୁଛନ୍ତି।