24-Jan-2021

ଭୁବନେଶ୍ବର (ପ୍ରେରଣା ଖବର ନ୍ୟୁରୋ) ପୁଣି ନବୀନ ହେଲେ ନମ୍ବର ଓ୍ବାନ। ଲୋକପ୍ରିୟତାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ ନମ୍ବର ମୁଖ୍ୟମନ୍ତ୍ରୀ ମାନ୍ୟତା ଦେଇଛି ଇଣ୍ଡିଆ ଟୁଡେ ମୁଡ ଅଫ ଦି ନେସନ ସର୍ଭେ । ଶ୍ରେଷ୍ଠ ପ୍ରଦର୍ଶନକାରୀ ମୁଖ୍ୟମନ୍ତ୍ରୀ ଭାବେ ଦର୍ଶାଇଛି । ନିଜ ରାଜ୍ୟରେ ଲୋକପ୍ରିୟତାରେ କେଉଁ ମୁଖ୍ୟମନ୍ତ୍ରୀ କେତେ ଲୋକପ୍ରିୟ ଏହାର ସର୍ଭେ କରିଥିଲା। ଯେଉଁଥିରେ ନିଜ ନିଜ ରାଜ୍ୟର ସବୁଠାରୁ ଅଧିକ ଲୋକପ୍ରିୟ ମୁଖ୍ୟମନ୍ତ୍ରୀଙ୍କ ମଧ୍ଯରେ ସବୁଠାରୁ ଆଗରେ ରହିଛନ୍ତି ନବୀନ।
ସର୍ଭେ ହୋଇଥିବା ଜନସାଧାରଣଙ୍କ ମଧ୍ଯରେ ୫୧ ପ୍ରତିଶତ ନବୀନଙ୍କୁ ନିଜର ରାଜ୍ୟର ସବୁଠାରୁ ଲୋକପ୍ରିୟ ମୁଖ୍ଯମନ୍ତ୍ରୀ ଭାବେ ବାଛିଛନ୍ତି । ସର୍ଭେରେ ନବୀନଙ୍କୁ ସ୍ବଚ୍ଛ ଓ ନିର୍ମଳ ଭାବମୂର୍ତ୍ତି ସଂପନ୍ନ ରାଜନେତା ଭାବେ ଦର୍ଶାଯାଇଛି। ନବୀନ ସରକାରଙ୍କ ସାମାଜିକ ଯୋଜନା ସବୁ ତାଙ୍କୁ ନିଜ ରାଜ୍ଯରେ ସଫଳ କରାଇଛି ବୋଲି ସର୍ଭେରେ ଦର୍ଶାଯାଇଛି ।

ଇଣ୍ଡିଆ ଟୁଡେ ସର୍ଭେ ପୂର୍ବରୁ ଏବିପି ଓ ସିଭୋଟର କରିଥିବା ସର୍ଭେରେ ନବୀନଙ୍କୁ ଦେଶର ସବୁଠାରୁ ଲୋକପ୍ରିୟ ମୁଖ୍ଯମନ୍ତ୍ରୀ ଭାବେ ଦର୍ଶାଇଥିଲା। ୨୧ ବର୍ଷ ଧରି ଓଡ଼ିଶାର ମୁଖ୍ୟମନ୍ତ୍ରୀ ରହିଆସିଥିବା ନବୀନଙ୍କ ଲୋକାଭିମୁଖୀ ଯୋଜନା ପାଇଁ ସାରାଦେଶରେ ପ୍ରଶଂସା କରାଯାଇଛି। ରାଜ୍ୟ ପାଇଁ ମୁଖ୍ୟମନ୍ତ୍ରୀଙ୍କ ଏହି ସଫଳତା ପରେ ସାରା ରାଜ୍ୟରେ ମୁଖ୍ୟମନ୍ତ୍ରୀଙ୍କୁ ଶୁଭେଚ୍ଛାର ସୁଅ ଛୁଟିଛି ।
ଲୋକପ୍ରିୟ ମୁଖ୍ୟମନ୍ତ୍ରୀ ତାଲିକାରେ ନବୀନ ଏକ ନମ୍ବର ଥିବାବେଳେ ଦିଲ୍ଲୀ ମୁଖ୍ଯମନ୍ତ୍ରୀ ଅରବିନ୍ଦ କେଜରିୱାଲ ଦ୍ବିତୀୟ ସ୍ଥାନରେ ଅଛନ୍ତି । କେଜିରଓ୍ବାଲଙ୍କୁ ନିଜ ରାଜ୍ଯର ୪୧ ପ୍ରତିଶତ ଲୋକ ପସନ୍ଦ କରିଛନ୍ତି। ସେହିପରି ଯୋଗୀ ଆଦିତ୍ଯାନାଥଙ୍କୁ ୩୯ ପ୍ରତିଶତ ଏବଂ ଉଦ୍ଧବ ଠାକରେ ଓ କେ ଚନ୍ଦ୍ର ଶେଖର ରାଓଙ୍କୁ ୩୫ ପ୍ରତିଶତ ପସନ୍ଦ କରିଛନ୍ତି।