08-Jul-2025

ଅତାବିରା(ଆକାଶ ମିଶ୍ର): ଏକକ ରେଳ ଲାଇନରୁ ଡବଲ ଲାଇନ୍ ହେଲା । ପ୍ରତିଶ୍ରୁତି ପରେ ପ୍ରତିଶ୍ରୁତି,ପ୍ରସ୍ତାବ ପରେ ପ୍ରସ୍ତାବ ଦିଆଚାଲିଛି  ଓଭର ବ୍ରିଜ ନିର୍ମାଣ ପାଇଁ। ହେଲେ ସବୁ କିଛି ରେଳ ବିଭାଗ ପାଇଁ ଯେପରି ମୂଲ୍ୟହୀନ ମନେ ହୁଏ  । ଦେଶର ବିକାଶ କ୍ଷେତ୍ରରେ ସର୍ବୋଚ୍ଚ ସ୍ଥାନରେ  ରେଳ ବିଭାଗ ର ସ୍ଥାନ ରହିଆସୁଥିବା ବେଳେ  ଏ  ଦିଗରେ ରେଳ ବିଭାଗ ର ନିଷ୍କ୍ରିୟତା ଓ ନିରବତା  ଅଞ୍ଚଳ ବାସୀଙ୍କ ପାଇଁ  ଚିନ୍ତାର କାରଣ ହୋଇଛି । ପ୍ରକାଶ ଥାଉ କି ଅତାବିରା-ପାହାର ଶ୍ରୀଗିଡା ଗ୍ରାମ୍ୟ ଉନ୍ନୟନ ରାସ୍ତାରେ ପଡୁଥିବା ରେଲୱେ ଗେଟ ଜେଟି(୩୬) ରେ ରେଲୱେ ଓଭର ବ୍ରିଜ ନିର୍ମାଣ କରିବା ପାଇଁ ଅଞ୍ଚଳବାସୀଙ୍କ ଦାବୀ ଦୀର୍ଘ ବର୍ଷ ଧରି ରହିଆସିଛି , ଯେତେବେଳେ ଏକକ ରେଳ ଲାଇନ ଥିଲା ।ଦିନକୁ ଦିନ ଜନସଂଖ୍ୟା ବୃଦ୍ଧି ସହିତ ଯାତାୟତ ବଢ଼ିଛି ଏହି ରାସ୍ତାରେ । ରେଳ ଲାଇନ ର ମଧ୍ୟ ସମ୍ପ୍ରସାରଣ ହୋଇ ଡବଲ ଲାଇନ୍ ହୋଇଛି । ଏହି ଲାଇନ୍ ପାରି ହୋଇ ଯିବାପାଇଁ  ଲୋକଙ୍କୁ ଅନେକ ସମୟ ଅପେକ୍ଷା କରିବାକୁ ପଡୁଛି, ଅନେକ ଗୁରୁତ୍ଵପୂର୍ଣ୍ଣ ସ୍ଥାନକୁ ପହଞ୍ଚି ବାରେ ବିଳମ୍ବ ହେଉଛି । ଅନେକ ସମସ୍ୟା ଲୋକଙ୍କ ପାଇଁ ସୃଷ୍ଟି ହେଉଛି।ଏହାକୁ ଦୃଷ୍ଟିରେ ରଖି ବରଗଡ଼ ସାଂସଦ ପ୍ରଦୀପ ପୁରୋହିତ ଲିଖିତ ଭାବେ ଦେଇଥିବା ପ୍ରସ୍ତାବ ପତ୍ରକୁ ଅଞ୍ଚଳବାସୀ ସମ୍ବଲପୁର ଡି ଆର ଏମ ସୁବାଷ ଚନ୍ଦ୍ର ଚୌଧୁରୀଙ୍କୁ ଭେଟି ପ୍ରଦାନ କରିଛନ୍ତି। ଏହି ଦାବିପତ୍ର ପ୍ରଦାନ ସମୟରେ ରବୀନ୍ଦ୍ର ନାୟକ, ମିଳନ ସେଟ, କୁଶ କୁମ୍ଭାର, ରାଜେଶ୍ୱନି ନାଏକ,ଜନକ ରାମ ଦାଶ ପ୍ରମୁଖ ଉପସ୍ଥିତ ଥିଲେ।ତୁରନ୍ତ ସର୍ଭେ କରି ବିହିତ ପଦକ୍ଷେପ ନିଆଯିବ ବୋଲି ସମ୍ବଲପୁର ଡି,ଆର,ଏମ ନିର୍ଭର ପ୍ରତିଶ୍ରୁତି ଦେଇଥିଲେ।ଏହା ସହିତ ଅତାବିରା ରେଲୱେ ଷ୍ଟେସନରେ ଭୁବନେଶ୍ୱର-ସୋନପୁର  ଇଣ୍ଟରସିଟି ରହଣୀ ପାଇଁ ଦାବି ଉପସ୍ଥାପନ କରିଥିଲେ।ସୂଚନାଯୋଗ୍ୟ ଯେ ଦୀର୍ଘ ବର୍ଷ ହେଲା  ଜେଟି( ୩୬) ରେ ରେଲୱେ ଓଭର ବ୍ରିଜ ନିର୍ମାଣ କରିବା ପାଇଁ ଦାବି ହୋଇ ଆସୁଛି।ଯାହା ଫଳରେ ଅଞ୍ଚଳବାସୀ ଓ ବିଜେପି ନେତୃମଣ୍ଡଳୀଙ୍କ ଉପସ୍ଥିତିରେ ଅତାବିରା ରେଲୱେ ଷ୍ଟେସନକୁ ଗସ୍ତ କରିଥିବା ସମ୍ବଲପୁର ଡି ଆର ଏମ ଙ୍କ ଏକ ଟିମ  ଓଭର ବ୍ରିଜ ନିର୍ମାଣର ସ୍ଥାନ ନିରୀକ୍ଷଣ କରି ନିର୍ମାଣ ହେବାର ଏକ ପ୍ରତିଶ୍ରୁତି ଦେଇଥିଲେ।ହେଲେ ପଦକ୍ଷେପ ନେବାରେ ବିଳମ୍ବ ହେବାରୁ  ବର୍ତ୍ତମାନର ନିର୍ବାଚିତ ବିଧାୟକ, ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ  ଓ ସାଂସଦଙ୍କ ଟୋପ ତଥା କାଠଡେରା ରଥଯାତ୍ରା ଗସ୍ତ ସମୟରେ ରେଲୱେ ଗେଟ ପାଖରେ ଆୟୋଜିତ ବୃକ୍ଷ ରୋପଣ କାର୍ଯ୍ୟକ୍ରମ ସମୟରେ  ଏହି ଓଭର ବ୍ରିଜ ନିର୍ମାଣ ଦାବିକୁ ଅଞ୍ଚଳବାସୀ ଉପସ୍ଥାପନ କରିଥିଲେ।ଏପରିକି ଜେଟି(୩୬)ରେ ରେଲୱେ ଓଭର ବ୍ରିଜ ନିର୍ମାଣ କରିବାର ଭିତ୍ତିଭୂମି ରହିଛି ବୋଲି ପ୍ରତିଟି ସ୍ତରରେ ଚର୍ଚ୍ଚା ହେଉଛି।ଏହା ବ୍ୟତୀତ ଏହି ସ୍ଥାନରେ ଅନ୍ୟ ବିକଳ୍ପ ପନ୍ଥାରେ (ଅଣ୍ଡରପାସ)ରେ ଅଞ୍ଚଳବାସୀ ବେଶ ଉପକୃତ ହୋଇପାରିବେ ନାହିଁ ବୋଲି ନିର୍ଭରଶୀଳ ଯାତ୍ରୀମାନେ ପ୍ରକାଶ କରୁଛନ୍ତି।ଅଣ୍ଡର ପାସ ବ୍ରିଜ ହେଲେ ଯାତ୍ରୀ ଯାତାୟାତରେ ଅଧିକ ହଇରାଣ ହେବା ସହ ଦୁର୍ଘଟଣା ଓ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇବାର ଆଶଙ୍କା ରହିଛି। ଏହା ବ୍ୟତୀତ ଏହା ନିମ୍ନ ଭୂମି ହେତୁ ପାଣି ଜମିରହିବାର ମଧ୍ୟ ସମ୍ଭାବନା ରହିଛି । ବିଭାଗୀୟ ଅଧିକାରୀ ତୁରନ୍ତ ଏଦିଗରେ ଦୃଷ୍ଟି ଦେଇ ପଦକ୍ଷେପ ନେବାକୁ ଦାବି ହେଉଛି। ଏହି ରାସ୍ତାର ଅତାବିରା ଯେଭଳି ଏକ ଗୁରୁତ୍ୱପୂର୍ଣ୍ଣ ସ୍ଥାନ ଠିକ ସେହିପରି ପାହାଡ଼ଶ୍ରୀଗିଡା ମଧ୍ୟ ଏକ ଗୁରୁତ୍ୱପୂର୍ଣ୍ଣ ସ୍ଥାନ।ଉଭୟ ସ୍ଥାନରେ ବ୍ୟାଙ୍କ, ସ୍କୁଲ,କଲେଜ, ଡାକ୍ତରଖାନା ,ଥାନା, ସାପ୍ତାହିକ ବଜାର ରହିଛି।ଏହାସହିତ ଏହି ରାସ୍ତା ଦେଇ ହୀରାକୁଦ ଜଳଭଣ୍ଡାର ଭଳି ପର୍ଯ୍ୟଟନ ସ୍ଥଳୀ ଓ ସ୍ୱାଧୀନତା ସଂଗ୍ରାମୀଙ୍କ ପୀଠ ସ୍ଥଳୀ କୁ ଯିବା ଆସିବା କରିଥାନ୍ତି।ପୁଣି ଏହି ରାସ୍ତାଟି ସ୍ୱାଧୀନତା ସଂଗ୍ରାମୀ ଜନାର୍ଦ୍ଦନ ସିଂଙ୍କ ମାର୍ଗ ନାମରେ ନାମିତ ହୋଇଛି।ଯାହାଫଳରେ ଏହି ରାସ୍ତାରେ ଛାତ୍ରଛାତ୍ରୀ,କର୍ମଚାରୀ,ଚାଷୀ, ବ୍ୟବସାୟୀଙ୍କ ଯାତାୟାତର ଭିଡ଼।ପୁଣି ଏହି ରାସ୍ତାରେ ଅନେକ ଗୁଡିଏ ଧାନ ମଣ୍ଡି ରହିଛି ଓ ସରକାରଙ୍କ ପକ୍ଷରୁ ସିଂହପାଲିକୁ ଏକ କ୍ରାଫ୍ଟ ଭିଲେଜର ମାନ୍ୟତା ପ୍ରଦାନ କରାଯାଇ ପର୍ଯ୍ୟଟକ ଓ ପ୍ରଶିକ୍ଷଣ ତାଲିମ ବ୍ୟବସ୍ଥା ପାଇଁ ପ୍ରଶିକ୍ଷଣ କେନ୍ଦ୍ର ନିର୍ମାଣ ହେବାର ପ୍ରସ୍ତାବ ରହିଛି।ଏଣୁ ଏହି ରାସ୍ତା ଦେଇ ଉଚ୍ଚ କ୍ଷମତା ସମ୍ପନ୍ନ ଯାନବାହନ ମଧ୍ୟ ଚଳାଚଳ ହେଉଛି।ଏଣୁ ଏହି ଗୁରୁତ୍ୱପୂର୍ଣ୍ଣ ଗ୍ରାମ୍ୟ ଉନ୍ନୟନ ରାସ୍ତାରେ ରେଲୱେ ଓଭର ବ୍ରିଜ ନିର୍ମାଣ ହେବାର  ଦାବିକୁ ଗୁରୁତ୍ୱ ଦେବା ପାଇଁ ଅଞ୍ଚଳର ଏକ ପ୍ରତିନିଧି ମଣ୍ଡଳୀ ରେଲୱେ କର୍ତ୍ତୃପକ୍ଷ ଓ ସ୍ଥାନୀୟ ଜନ ପ୍ରତିନିଧିଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଛନ୍ତି।  ତେବେ ଦେଖାଯାଉ ସାଂସଦ ଙ୍କ ପ୍ରସ୍ତାବ କୁ ରେଳ ବିଭାଗ ମୋହର ଲଗାଉଛି ନା ପୁଣି ତାର ମନଇଚ୍ଛା କାମ କରି ରାଜକୋଷ ର  ମାତ୍ରାଧିକ ଟଙ୍କାର ଖର୍ଚ୍ଚ  ତାଲିକା ପ୍ରସ୍ତୁତି କରୁଛି ।