23-Jun-2025

ରାଜରାସ୍ତାରେ ଦୁର୍ଘଟଣା ହେଲେ ପୋଲିସ ବିଭାଗ ତୁମ୍ବିତୁଫାନ କରୁଥିବା ବେଳେ ଦୁର୍ଘଟଣାଗ୍ରସ୍ତ ବେଦାନ୍ତ ଗାଡି ଡ୍ରାଇଭରକୁ ପୋଲିସ ନିଜେ ଫେରାର କରାଇବା ଘଟଣାକୁ ନେଇ ଚର୍ଚ୍ଚା ଚାଲିଛି।

ବଲାଙ୍ଗିର: ପୋଲିସ ବିଭାଗର ଏଭଲି କାର୍ଯ୍ୟାକଳପକୁ ବିଭିନ୍ନ ମହଲରେ ସମାଲୋଚନା କରାଯାଉ ଥିବା ବେଳେ ପୋଲିସ ଏଭଳି ଗାଡିରୁ ମାସିକିଆ ବଟି ଆଦାୟ କରୁଥିବାରୁ ଜଣେ ମାତାଲ ଡ୍ରାଇଭରକୁ ଫେରାର କରିବାରେ ସହଯୋଗ କରିଛି ବୋଲି ଅଭିଯୋଗ ଉଠୁଛି। ଏହି ଘଟଣାର ଏକ ଉଚ୍ଚସ୍ତରୀୟ ତଦନ୍ତ କରାଯିବାକୁ ମଧ୍ୟ ଜନସାଧାରଣରେ ଦାବି ହେଉଛି।
  ପ୍ରକାଶ ଯେ, ଗତ ୧୭ ତାରିଖରେ ଭୋର ୪ ଟା ବେଳେ ବେଦାନ୍ତ କମ୍ପାନୀର ଏକ କଣ୍ଟେନର ଜାତୀୟ ରାଜପଥ-୨୬ରେ ବଲାଙ୍ଗୀର ସହରର ପେଲେସ ଲାଇନ୍ ପଡାର ମହିଳା ମହାବିଦ୍ୟାଳୟ ଛକରେ ଭାରସାମ୍ୟ ହରାଇ ରାସ୍ତାକଡର ଦୋକାନମାନଙ୍କୁ ମାଡିଯାଇ ଦୁର୍ଘଟଣାଗ୍ରସ୍ତ ହୋଇଥିଲା। ଘଟଣାଟି ରାତିରେ ହୋଇଥିବାରୁ ଏଥିରେ କେହି ଆହତ କିମ୍ବା ମୃତାହତ ହୋଇନଥିଲେ। ତେବେ ଦୁର୍ଘଟଣା ପରେ ପରେ ଗାଡିରୁ ଡ୍ରାଇଭର ଓହ୍ଲାଇ ଥିଲେ ଓ ସେଠାରେ ଉପସ୍ଥିତ ଥିବା କିଛି ପୋଲିସ କର୍ମଚାରୀଙ୍କ ସହିତ କଥା ହେବା ପରେ ଫେରାର ହୋଇଯାଇଥିଲେ। ନିୟମ କହୁଛି ପୋଲିସ ଦୁର୍ଘଟଣାଗ୍ରସ୍ତ ଗାଡିକୁ ଜବତ କରିବା ସହିତ ଡ୍ରାଇଭରକୁ ହେପାଜତକୁ ନେଇ ତାର ଡାକ୍ତରୀ ପରୀକ୍ଷାର ଆବଶ୍ୟକତା ରହିଥାଏ। ଏହି ପରୀକ୍ଷାରେ ଡ୍ରାଇଭର ମଦ ପିଇ ଗାଡି ଚଳାଉଥିଲା ନା ସୁସ୍ଥ ମସ୍ତିସ୍କରେ ଥାଇ ଗାଡିଡ୍ରାଇଭ କରୁଥିଲା ତାହା ଜଣାପଡିଥାଏ। କିନ୍ତୁ ଏତେ ବଡ ଦୁର୍ଘଟଣା ପରେ ମଧ୍ୟ ପୋଲିସ କଣ୍ଟେନର ଡ୍ରାଇଭରକୁ ଫେରାର କରିଦେଲା। ପୋଲିସ ଏହି ଘଟଣାରେ ଡ୍ରାଇଭରକୁ ଫେରାର ଦର୍ଶାଇଥିବା ବେଳେ ଦୁର୍ଘଟଣା ଘଟିଥିବା ସ୍ଥାନରେ ଲାଗିଥିବା ସିସିଟିଭି ଫୁଟେଜରେ ପୋଲିସ ସାଙ୍ଗରେ କଥା ହୋଇ ଫେରାର କରାଇ ଦେଇଥିଲା ତାହା ସ୍ପଷ୍ଟ ଜଣାପଡୁଛି। ଏହି ସିସିଟିଭି ଫୁଟେଜ ଯାଞ୍ଚ କରାଯାଇ ସେଠିକି ଦୁର୍ଘଟଣା ସମୟରେ ଯାଇଥିବା ପିସିଆର ଡ୍ୟୁଟିରେ କିଏ କିଏ ଥିଲେ ତାହାର ତଦନ୍ତ କରା ଯିବାର ଆବଶ୍ୟକତା ରହିଛି। ଦୁର୍ଘଟଣାର ନହେବାକୁ ନିୟମକାନୁନ ନେଇ ପୋଲିସ ସାଧାରଣ ଜନତାଙ୍କୁ ସଚେତନ କରୁଥିବା ବେଳେ ନିଜେ ଜଣେ ମଦ୍ୟପ କଣ୍ଟେନର ଡ୍ରାଇଭରକୁ ଫେରାର କରାଇବାରେ ସହାୟତା କରିବା ମଧ୍ୟ ଏକ ଅପରାଧିକ କାର୍ଯ୍ୟରେ ପରିଗଣିତ ହେବ। ଡ୍ରାଇଭର ଜଣକୁ ଫେରାର କରାଇ ତାକୁ ପୋଲିସ ରିପୋର୍ଟରେ ଫେରାର ଦର୍ଶାଇ ହାଜର ହେବାକୁ ନୋଟିସ କରିବା ଘଟଣାକୁ ନେଇ ବିଭିନ୍ନ ମହଲରେ ସନ୍ଦେହ ପ୍ରକାଶ ପାଉଛି। ଏଡଭୋକେଟ୍ ଓମକାର ନାୟକ କହିଛନ୍ତି ବଲାଙ୍ଗୀର ସହରରେ ଭାରିଯାନ ମାନେ ଅନେକ ସମୟରେ ନିୟମକାନୁନ ଉଲଂଘନ କରି ଯିବା ଆସିବା କରୁଛି ଓ ଦୁର୍ଘଟଣାଗ୍ରସ୍ତ ହେଉଛି। ପୋଲିସର ଭୁମିକାକୁ ନେଇ ସନ୍ଦେହ ପ୍ରକାଶ ପାଉଛି ବୋଲି ଶ୍ରୀ ନାୟକ କହିଛନ୍ତି। ପୋଲିସ ବେଦାନ୍ତ ଭଳି କମ୍ପାନୀର ଭାରିଯାନରୁ ମାସିକିଆ ବଟି ଆଦାୟ କରି ତାଙ୍କର ସବୁ ବେନିୟମ କାମକୁ ସହଯୋଗ କରୁଥିବା ଅଭିଯୋଗ ଉଠୁଛି। ବଲାଙ୍ଗୀର ଏସପି ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯିବାକୁ ଜନସାଧାରଣରେ ଦାବି ହେଉଛି ।