12-Jun-2025

ସିନାପାଲି(ପରମେଶ୍ୱର ମେହେର): ନୂଆପଡ଼ା ଜିଲ୍ଲା ସିନାପାଲି ସହରରେ ଗତକାଲି ବସ ଧକ୍କାରେ ଜଣେ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ଆଜି ପରିବାର ପକ୍ଷରୁ କ୍ଷତିପୂରଣ ଦାବିରେ ସିନାପାଲି-ଧର୍ମଗଡ଼ ମୁଖ୍ୟ ରାସ୍ତା ହାତିବନ୍ଧା ନିକଟରେ  ଅବରୋଧ କରି ଦୀର୍ଘ ସମୟ ଧାରଣାରେ ବସିଥିବା ଦେଖିବାକୁ ମିଳିଥିଲା। ମୃତକଙ୍କ ପରିବାରରେ ବିଧବା ସ୍ତ୍ରୀ ସହିତ ଚାରି ଝିଅ ଥିବା ବେଳେ ସେ ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲା। ଏଣୁ ପରିବାରର ଭରଣ ପୋଷଣ ତଥା କ୍ଷତିପୂରଣ ବାବଦକୁ ଆର୍ଥିକ ସହାୟତା ଯୋଗାଇଦେବାକୁ ଦାବି କରି ଉତ୍ୟକ୍ତ ଲୋକେ ରାସ୍ତା ଉପରେ ଶବ ରଖି ଅଡ଼ି ବସିଥିଲେ। ଘଟଣା ସ୍ଥଳରେ ସିନାପାଲି ଥାନାଧିକାରୀ ରଶ୍ମିତା ପ୍ରଧାନ, ସିନାପାଲି ଅତିରିକ୍ତ ତହସିଲଦାର ଶ୍ରୀକେର୍କେଟା ପହଞ୍ଚି ପରିବାର ଲୋକଙ୍କୁ ବହୁ ବୁଝାସୁଝା ପରେ ଲୋକେ ଧରଣାରୁ ଓହରିଥିଲେ। ପରେ ଯାନବାହନ ଚଳାଚଳ ସ୍ବାଭାବିକ ହୋଇଥିଲା। ପ୍ରକାଶ ଯୋଗ୍ୟ ଯେ ଗତକାଲି ଥାନା ପଛ ପଟେ  ଠିଆ ହୋଇ ଥିବା ଏକ ପିକ ଅପ୍ ଭ୍ୟାନ ର କାର୍ଯ୍ୟରତ ଶ୍ରମିକକୁ ସିନାପାଲି ଭାୟା ସମ୍ବଲପୁର ଯାଉଥିବା ବିଜୟଲକ୍ଷ୍ମୀ ବସ (ଓଡ଼ି ୦୮ ଏମ ୩୮୯୯)ଆଘାତ ଦେବା ଫଳରେ ଶ୍ରମିକଟିର ମୃତ୍ୟୁ ଘଟିଥିଲା। ମୃତ ବ୍ୟକ୍ତି ଜଣକ ମହାଳିଙ୍ଗ ଗ୍ରାମର ପାର୍ଥବ କେତକୀ(୪୦) ବୋଲି ଜଣାପଡିଥିଲା।କଳାହାଣ୍ଡି ଜିଲ୍ଲା ମହାଲିଙ୍ଗ ଗ୍ରାମର ଏକ ପିକ୍ଅପ୍ ଭ୍ୟାନ ରେ ଶ୍ରମିକ ଭାବେ ସେ କାମ କରୁଥିବା ବେଳେ ଦୋକାନ ସାମଗ୍ରୀ ଅନ ଲୋଡ କରି ଠିଆ ହୋଇଥିଲା । ହଠାତ  ବସର୍ ଆଘାତରେ ଶ୍ରମିକ ଜଣକ ଘଟଣା ସ୍ଥଳରେ ଟଳି ପଡ଼ିଥିଲେ । ତାଙ୍କର ଗଳା କଟି ଯିବାରୁ ପ୍ରବଳ ରକ୍ତସ୍ରାବ ହୋଇ ମୃତ୍ୟୁ ହୋଇଥିଲା। 
ଖବର ପାଇ ସିନାପାଲି ପୁଲିସ ଘଟଣା ସ୍ଥଳରେ ପହଞ୍ଚି ବସ ଓ ଶବ ଜବତ କରିଥିଲା। ଆଜି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ପରିବାର ଲୋକେ ମରଶରୀର ନେଇ ପ୍ରଥମେ ଗୋଳାମୁଣ୍ଡା ବ୍ଲକ କଦଲିମୁଣ୍ଡା ଠାରେ ରାସ୍ତା ଅବରୋଧ କରି ଧାରଣାରେ ବସିଥିଲେ। ପରେ ସିନାପାଲି ଅନ୍ତର୍ଗତ ହାତିବନ୍ଧା ଠାରେ ମୁଖ୍ୟ ରାସ୍ତାରେ ଶବ ରଖି ଧାରଣା ଦେଇଥିଲେ।