02-Jun-2025

ବରଗଡ଼ (ନିରଞ୍ଜନ ତ୍ରିପାଠୀ)

ଜାତୀୟ କର୍କଟ ବିଜେତା ଦିବସ ଅବସରରେ ବରଗଡ ଜିଲ୍ଲାରେ ଏକ ସାକାରାତ୍ମକ ଓ ପ୍ରେରଣାଦାୟୀ ପଦକ୍ଷେପ ଗ୍ରହଣ କରାଯାଇଛି – "ଭିନ୍ନ ଏକ ଜୀବନ" କାର୍ଯ୍ୟକ୍ରମ। ବିଭିନ୍ନ ସ୍ବେଚ୍ଛାସେବୀ ସଂଗଠନମାନେ ମିଶି ଏହି ଦିନଟିକୁ ଏମିତି ଏକ ଉତ୍ସବ ଭାବରେ ପାଳିଲେ, ଯାହା କେନ୍ସର ସର୍ଭାଇବର୍ସ ଓ ତାଙ୍କ ପରିବାର ପାଇଁ ଆଶା, ଭଲପାଇବା ଓ ମନୋବଳ ର ସନ୍ଦେଶ ନେଇ ଆସିଛି।ଏହି କାର୍ଯ୍ୟକ୍ରମର ବିଶେଷତା ହେଉଛି – ଅନେକ ସଂଗଠନ ଓ ସମାଜସେବୀମାନେ ଏକତ୍ରିତ ହୋଇ ବହୁ କେନ୍ସର ବିଜେତାଙ୍କ ଘରକୁ ପହଞ୍ଚି ସେମାନଙ୍କୁ ଓ ତାଙ୍କର ପରିବାରକୁ ଏହି ବିଜୟ ଦିବସ ଅବସରରେ ସମ୍ମାନିତ କରିବା ସହିତ ମିଷ୍ଟାନ୍ନ ଦେଇଥିଲେ। ଏଥିପାଇଁ ପରିବାର ଲୋକଙ୍କ ମନୋବଳ ବଢିଥିବା ସହିତ ଏକ ନୂଆ ଆଶା ଜନ୍ମ ନେଇଛି।
ଏହି "ଭିନ୍ନ ଏକ ଜୀବନ" ଅଭିଯାନ ରେ ଭୁବନେଶ୍ୱର ରେ ରହୁଥିବା ବରଗଡ ଅଧିବାସୀ ମାନଙ୍କ ଦ୍ବାରା ଗଠିତ ବରଗଡିଆ@ଭୂବନେଶ୍ବର,  ବରଗଡ ଫାଇଟର୍ସ ଗୃପ, ନିଷ୍ଠା ପରିବାର, ସଂକଳ୍ପ ପରିବାର, ସଂଘମିତ୍ରା ଗୃପ, ଜିଲ୍ଲା ସମାଜସେବୀ ସଂଗଠନ, ପରିବର୍ତ୍ତନ ଟ୍ରଷ୍ଟ, ସୋହେଲା ର ଜୀବନ ଜ୍ୟୋତି ଅନୁଷ୍ଠାନ ଙ୍କ ମିଳିତ ଭାବେ ଆଜି ଏହି କାର୍ଯ୍ୟକ୍ରମ ଆରମ୍ଭ କରିଥିଲେ। ଏଥିରେ ବିଭିନ୍ନ ବ୍ଲକ ର ଅନେକ ସଂସ୍ଥା ତଥା ବ୍ଯକ୍ତି ବିଶେଷ ସାମିଲ ହୋଇ ଥିଲେ। ଏହା ଦ୍ୱାରା ଏକ ମଜବୁତ ମାନବୀୟ ଶୃଂଖଳା ଗଠିତ ହୋଇଛି ଯେଉଁଥିରେ କେନ୍ସର ପିଡିତମାନେ ଏକା ନୁହଁନ୍ତି – ସମାଜ ସେମାନଙ୍କ ପାଖରେ ଅଛି ବାର୍ତ୍ତା ପହଞ୍ଚି ପାରିଛି।
ସମ୍ବଲପୁର ରେ ଆୟୋଜିତ ସ୍ତ୍ରୀ ଓ ପ୍ରସୂତି ବିଶେଷଜ୍ଞଙ୍କ ଦ୍ବାରା ଆୟୋଜିତ "କନସେପ୍ସନ ୨୦୨୫" ରେ ଆଜି ଜାତୀୟ କର୍କଟ ବିଜେତା ଦିବସ ଉପଲକ୍ଷେ ବରଗଡ ଫାଇଟର୍ସ ଗ୍ରୁପ ର ସଦସ୍ୟ ଶ୍ରୀମତୀ ପୁଷ୍ପାଞ୍ଜଳି ବେହେରା, କୁଶଦେବ ସାହୁ ଓ ଶିଶୁ ସର୍ଭାଇଭର୍ କ୍ଷେତ୍ର ମଣି ମେଣ୍ଡାଳିଙ୍କୁ "ବିଶେଷ ବିଜେତା" ଭାବରେ ସମ୍ମାନିତ କରାଯାଇଥିଲା – ଏହା ଅନେକଙ୍କ ପାଇଁ ପ୍ରେରଣା ଦେଇଛି।  ସେହିପରି ବରଗଡ ସହର ସରକାରୀ ହସ୍ପିଟାଲ କୁ ବିଭିନ୍ନ ରୋଗରେ ପିଡୀତ ହୋଇ ଆସୁଥିବା ରୋଗୀ ମାନଙ୍କ ସହାୟକଙ୍କୁ ଦୁଇବର୍ଷ ହେଲା ପ୍ରତ୍ୟେକ ରବିବାର ଦିନ ମାଗଣା ଖାଦ୍ୟ ଦେଇ ଆସୁଥିବା ଜିଲ୍ଲା ସମାଜସେବୀ ସଂଗଠନ ଆଜି ଫାଇଟର୍ସ ଗୃପ କୁ ସମ୍ମାନୀତ କରିଛନ୍ତି। 
ଭିନ୍ନ ଏକ ଜୀବନ କାର୍ଯ୍ୟକ୍ରମ ର ମୁଖ୍ଯ ଉଦ୍ଦେଶ୍ଯ ହେଉଛି ଜଣେ ମଣିଷ କେନସର ରେ ପିଡୀତ ହେଲାପରେ ସେ ଓ ତା ପରିବାର ସଂପୂର୍ଣ୍ଣ ରୂପେ ଭାଙ୍ଗି ପଡିଥାନ୍ତି। କିଛି ଦିନ ବା ମାସ ତାଙ୍କର ସଂପର୍କୀୟ ମାନେ ତାଙ୍କ ସହିତ ରହିବା ପରେ ଧିରେ ଧିରେ ନିଜର ବ୍ଯକ୍ତିଗତ କାରଣ ତାଙ୍କଠୁ ଦୂରେଇ ଯାଇଥାନ୍ତି। ସେ ସମୟ ରେ ପିଡୀତ ଓ ପରିବାର ନିଜକୁ ବହୁ ଏକାକୀ ଓ ଅସହାୟ ମନେ କରି ମାନସିକ ସ୍ତରରେ ଭାଙ୍ଗି ପଡ଼ିଥାନ୍ତି ଏଭଳି ସମୟରେ ପିଡୀତ ମାନସିକ ସ୍ଥିତି ବହୁ ଦୁର୍ବଳ ହୋଇପଡେ। ସେତେବେଳେ ତାର ମନୋବଳ ବ୍ରୁଦ୍ଧି କରିବା ନିହାତି ଜରୁରୀ ହୋଇପଡେ। ତେଣୁ ଏହି କାର୍ଯ୍ୟକ୍ରମ ରେ ମାଧ୍ଯମ ରେ ଏଥିରେ ସାମିଲ ହୋଇଥିବା ସାମାଜିକ ସଂଗଠନ ମାନେ କେନସର ପିଡୀତ ଓ ତାଙ୍କ ପରିବାର କୁ ସୂଚାଇ ଦେବାକୁ ଚାହିଁଛନ୍ତି ଯେ, ସେମାନଙ୍କ ଏଭଳି ସମୟରେ ସେମାନେ ତାଙ୍କ ସହିତ ରହିଛନ୍ତି। ଜୀବନ ଟିକୁ ସଂପୂର୍ଣ୍ଣ ଆନନ୍ଦ ଖୁସି ରେ ରଖିବାକୁ ଅନୁରୋଧ କରିଛନ୍ତି। ଏହି ଅଭିଯାନର ବାର୍ତ୍ତା ହେଉଛି “କେନ୍ସର ହେଲେ ଜୀବନ ଶେଷ ନୁହଁ। ଏହା ଆଉ ଏକ ନୂଆ ଆରମ୍ଭ। ଏହି କାର୍ଯ୍ୟକ୍ରମ କେବଳ ବରଗଡ ଓ ସମ୍ପୂର୍ଣ୍ଣ ଓଡ଼ିଶା ର କେନ୍ସର ପରିବାର ପାଇଁ ଏକ ଆଶାର ନୂଆ ଆଲୋକ ଜଳେଇ ପାରିଛି।