23-Apr-2025

ବରଗଡ଼:(ନିରଞ୍ଜନ ତ୍ରିପାଠୀ)-ଓଡିଶା ଖାଦ୍ୟ ଆୟୋଗ ସଦସ୍ୟ ଶ୍ରୀ ଦୟାନିଧି  ଦାଶ ଏବଂ ଶ୍ରୀ ଅକ୍ଷୟ କୁମାର ବେହେରାଙ୍କ ବରଗଡ଼ ଜିଲ୍ଲା ଗସ୍ତର ଦ୍ଵିତୀୟ ଦିବସରେ ବିଜେପୁର ବ୍ଲକ ଅନ୍ତର୍ଗତ ବରମୁଣ୍ଡା ସ୍ଥିତ ଛତୁଆ କେନ୍ଦ୍ର,ଏମ. ଶ୍ରୀଗିଡା ସ୍ଥିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ,ଅଙ୍ଗୱାଡ଼ି କେନ୍ଦ୍ର,ପ୍ରାଥମିକ କୃଷି ସମବାୟ ସମିତି, ମୋ ସେବା କେନ୍ଦ୍ର ଓ ବଲଣ୍ଡା ଗ୍ରାମର ଆଶ୍ରମ ବିଦ୍ୟାଳୟ(ଛାତ୍ର ଛାତ୍ରୀ ନିବାସ)କୁ ଅପ୍ରତ୍ୟାଶିତ ଭାବରେ ପରିଦର୍ଶନ କରି ପିଲାମାନଙ୍କୁ ବଣ୍ଟନ କରାଯାଉଥିବା ମଧ୍ୟାହ୍ନ ଭୋଜନର ମାନ ତଦାରଖ କରିବା ସହ ଛାତ୍ରଛାତ୍ରୀ ନିବାସ ନିରୀକ୍ଷଣ କରିଛନ୍ତି।  ଏତତ ବ୍ୟତୀତ ଛତୁଆ ପ୍ରସ୍ତୁତି କେନ୍ଦ୍ରର ପରିଦର୍ଶନ କରି ଛତୁଆର ଗୁଣାତ୍ମକ ମାନ ପରୀକ୍ଷା କରିଥିଲେ । ପିଲାମାନଙ୍କର ଗୁଣାତ୍ମକ ବିକାଶ ନିମନ୍ତେ ଆବଶ୍ୟକୀୟ ସମସ୍ତ ପଦକ୍ଷେପ ନେବା ପାଇଁ ଗୋଷ୍ଠୀ ଉନ୍ନୟନ ଅଧିକାରୀଙ୍କ କାର୍ଯ୍ୟାଳୟରେ ବିଭାଗୀୟ କର୍ତ୍ତୃପକ୍ଷଙ୍କ ସହ ଆଲୋଚନା କଲେ ।ଏହାପରେ ଅପରାହ୍ନ ୫ ଘଟିକା ସମୟରେ ଜିଲ୍ଲା ମୁଖ୍ୟ ଚିକିତ୍ସାଳୟ ସ୍ଥିତ ପୁଷ୍ଟି ପୁନର୍ବାସ କେନ୍ଦ୍ରକୁ ଅପ୍ରତ୍ୟାଶିତ ଭାବରେ ପରିଦର୍ଶନ କରି ପିଲାମାନଙ୍କ ସ୍ୱାସ୍ଥ୍ୟବସ୍ଥା ଖାଦ୍ୟପେୟ ବିଷୟରେ ଭାରପ୍ରାପ୍ତ  ଏ.ଏନ.ଏମ  ସସ୍ମିତା ସାହୁ ଙ୍କ ସହ ଆଲୋଚନା କରି ପିଲାଙ୍କ ଉତ୍ତମ ସ୍ୱାସ୍ଥ୍ୟବସ୍ଥା ନିମିତ୍ତ ସମସ୍ତ ବ୍ୟବସ୍ଥା ଗୁଡିକୁ ସୁନିଶ୍ଚିତ କରିବା ପାଇଁ ନିର୍ଦ୍ଦେଶ ଦେଇ ଥିଲେ ।

ସଦସ୍ୟଙ୍କ ଗସ୍ତ ସମୟରେ ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ସରୋଜ କୁମାର ବିଶ୍ଵାଳ ,ଭାରପ୍ରାପ୍ତ ସିଡ଼ିପିଓ ଅମେର୍‌ସିଏନ୍ ଏକା,ଗୋଷ୍ଠୀ ଶିକ୍ଷା ଅଧିକାରୀ ଶ୍ରୀ ବଲ୍ଲଭ ମେହେର, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀ ଜ୍ୟୋତିକାନ୍ତ ସାହୁ ଓ ଭାରପ୍ରାପ୍ତ ଉପଖଣ୍ଡ ସୂଚନା ଲୋକ ସମ୍ପର୍କ ଅଧିକାରୀ ଶ୍ରୀ ମହେନ୍ଦ୍ର ସାହୁଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀ ବୃନ୍ଦ ଉପସ୍ଥିତ ଥିଲେ ।