21-Apr-2025

ବଲାଙ୍ଗୀର(ପ୍ରେରଣା ଖବର): ଶନିବାର ଦିନ ବଲାଙ୍ଗୀର ଜିଲ୍ଲାକୁ ଦିନିକିଆ ଗସ୍ତରେ ଆସି କେନ୍ଦ୍ରଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିଭିନ୍ନ ପ୍ରକଲ୍ପର ଶିଳାନ୍ୟାସ ଓ ଉଦଘାଟନ କରିଛନ୍ତି । ଏହି କାର୍ଯ୍ୟକ୍ରମ ମଧ୍ୟରେ କଂଗ୍ରେସନେତା ନରସିଂହ ମିଶ୍ରଙ୍କ ପୁତ୍ର ତଥା ରାଜ୍ୟକଂଗ୍ରେସର ପ୍ରବକ୍ତାଥିବା ସମରେନ୍ଦ୍ର ମିଶ୍ରଙ୍କ ମାଲିକାନାରେ ଥିବା ବରକାନୀସ୍ଥିତ “ଓଭୋ” ଅଣ୍ଡା ପ୍ରକ୍ରିୟାକରଣ କାରଖାନାର ମଧ୍ୟ ଉଦଘାଟନ କାର୍ଯ୍ୟକ୍ରମ ଥିଲା । ରାଜ୍ୟରେ କଂଗ୍ରେସ-ଭାଜପା ନେତାଙ୍କ ମଧ୍ୟରେ ରାଜନୈତିକ ଆରୋପ ପ୍ରତ୍ୟାରୋପ ଚାଲିଥିବା ବେଳେ ଉଭୟଦଳର ନେତାଙ୍କ ମିଳନ ଏକ ନୂଆ ସମୀକରଣର ବାର୍ତ୍ତା ଦେଉଛି । ଅବଶ୍ୟ କଂଗ୍ରେସନେତା ନରସିଂହ ମିଶ୍ର ଓ ଭାଜପାନେତା ଧର୍ମେନ୍ଦ୍ର ପ୍ରଧାନଙ୍କ ମଧ୍ୟରେ ପୁରୁଣାସମ୍ପର୍କ ରହିଥିବା ଆଲୋଚନା ହୁଏ । ଧର୍ମେନ୍ଦ୍ର ର୍ପଧାନଙ୍କ ବାପା ଦେବେନ୍ଦ୍ର ପ୍ରଧାନଙ୍କ ସହ ବର୍ଷିୟାନ ନେତା ନରସିଂହ ମିଶ୍ରଙ୍କ ବ୍ୟକ୍ତିଗତ ଭଲ ସମ୍ପର୍କ ରହିଥିବା କାରଣରୁ ଏହି ସମ୍ପର୍କ ବଢିଛି ବୋଲି କୁହାଯାଏ । ଧର୍ମେନ୍ଦ୍ର ସେହି କାରଣରୁ ନରସିଂହ ମିଶ୍ରଙ୍କୁ ପିତୃତୁଲ୍ୟ ମନେକରି ସମ୍ମାନ ପ୍ରଦର୍ଶନ କରନ୍ତି ଓ ପୂର୍ବରୁ ପେଟ୍ରୋଲିୟମମନ୍ତ୍ରୀ ଥିବା ବେଳେ ବଲାଙ୍ଗୀର ନିର୍ବାଚନମଣ୍ଡଳିରେ କେତେକ ବିକାଶ ପ୍ରକଲ୍ପରେ ସହଭାଗୀ ହୋଇଥିଲେ । ପୂର୍ବରୁ କିଛି ବିକାଶ ପ୍ରକଲ୍ପ ଦେଇଥିଲେ ଓ ଏବେ ନରସିଂହ ମିଶ୍ରଙ୍କ ପୁଅମାନଙ୍କ ଉଦ୍ୟମରେ ସହଯୋଗୀ ହେବେ ବୋଲି ଧର୍ମେନ୍ଦ୍ର ପ୍ରଧାନ କହିଥିଲେ । ବଲାଙ୍ଗୀର ଭଳି ଆକାଂକ୍ଷୀ ଜିଲ୍ଲାରେ ଏତେବଡ ପ୍ରକଲ୍ପ କରିବାର ସାହସ ଦେଖାଇ ଓଡିଶାର ଯୁବ ଉଦ୍ୟୋଗୀଙ୍କ ପାଇଁ ମିଶ୍ରପରିବାର ଉଦାହରଣ ବୋଲି କହି ପ୍ରଶଂସା ମଧ୍ୟ କରିଥିଲେ । ଏପରିକି ମିଶ୍ର ପରିବାରର ବଲାଙ୍ଗୀର ମାଟିପ୍ରତି ମୋହ ଥିବା ଓ ଏକ ଅନୁନ୍ନତ ଅଞ୍ଚଳରେ କାରଖାନା ଖୋଲି ଯୁବକ ଯୁବତୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିଛନ୍ତି ବୋଲି କହି ପ୍ରଶଂସା କରିଥିଲେ । ଏହି ଘଟଣାକୁ କିନ୍ତୁ ବିଭିନ୍ନ ରାଜନୈତିକଦଳମାନଙ୍କ ପକ୍ଷରୁ ଭିନ୍ନଭିନ୍ନ ଦୃଷ୍ଟିରେ ଦେଖୁଛନ୍ତି । ଏହି ଉଦଘାଟନୀ ଉତ୍ସବ ପୂର୍ବରୁ କଂଗ୍ରେସନେତା ନରସିଂହ ମିଶ୍ର ଓ ତାଙ୍କ ପୁଅପୁତୁରାଙ୍କ ସହିତ ଧର୍ମେନ୍ଦ୍ରଙ୍କ ରୁଦ୍ଧଦ୍ୱାର ବୈଠକ ନେଇ ମଧ୍ୟ ଆଲୋଚନା ଯୋର ଧରୁଛି । ସ୍ୱାସ୍ଥ୍ୟ ଓ ପରିବାର କଲ୍ୟାଣମନ୍ତ୍ରୀ ଡ.ମୁକେଶ ମହାଲିଙ୍ଗ,କଣ୍ଟାବାଞ୍ଜିର ବିଧାୟକ ଲକ୍ଷ୍ମଣ ବାଗ,ଟିଟିଲାଗଡ ବିଧାୟକ ନବୀନ ଜୈନଙ୍କ ଉପସ୍ଥିତିରେ କଣ ସବୁ ଆଲୋଚନା ହୋଇଛି ତାହା ସ୍ପଷ୍ଟ ଜଣାପଡିନାହିଁ । କିନ୍ତୁ ଜିଲ୍ଲା ରାଜନୀତିରେ କିଛି ପରିବର୍ତ୍ତନର ନିଶ୍ଚୟ ଆଭାସ ମିିଳିଛି । କଂଗ୍ରେସର ବରିଷ୍ଠନେତା କଣ୍ଟାବାଞ୍ଜିର ପୂର୍ବତନ ବିଧାୟକ ସନ୍ତୋଷସିଂ ସାଲୁଜା ଭାଜପା-କଂଗ୍ରେସ ନେତାଙ୍କ ଏହି ଉଦଘାଟନୀ ଓ ବୈଠକକୁ ନେଇ ପ୍ରଶ୍ନ କରିଛନ୍ତି । ଶିକ୍ଷାମନ୍ତ୍ରୀ କୌଣସି ଶିକ୍ଷାନୁଷ୍ଠାନର ଉଦଘାଟନ କରିଥିଲେ ପ୍ରଶ୍ନ ଉଠିନଥାନ୍ତା । କଂଗ୍ରେସନେତାଙ୍କ ଏକ ଅଣ୍ଡା ପ୍ରକ୍ରିୟାକରଣ କାରଖାନାକୁ ଆସି ଉଦଘାଟନ କରିବା ଘଟଣା ନିଶ୍ଚୟ ସନ୍ଦେହ ସୃଷ୍ଟି କରିବ ଓ କଂଗ୍ରେସଲୋକଙ୍କ ମନୋବଳ ଉପରେ ଏହାର ପ୍ରଭାବ ପଡିବ ବୋଲି ସନ୍ତୋଷ ସିଂ ସାଲୁଜା କହିଛନ୍ତି । କଂଗ୍ରେସଦଳରୁ ୨୦୧୯ରେ ସାଂସଦ,୨୦୨୪ରେ ବଲାଙ୍ଗୀର ବିଧାୟକ ପ୍ରାର୍ଥି ହୋଇଥିବା ତଥା ରାଜ୍ୟକଂଗ୍ରେସର ପ୍ରବକ୍ତା ଥିବା ସମରେନ୍ଦ୍ରଙ୍କ ମାଲିକାନାର ଅଣ୍ଡା ପ୍ରକ୍ରିୟାକରଣ କାରଖାନାକୁ ଶିକ୍ଷାମନ୍ତ୍ରୀ ଉଦଘାଟନ କରିବା ଘଟଣାରେ ନିଶ୍ଚୟ କିଛି ରହସ୍ୟ ରହିଛି ବୋଲି କହି ଶ୍ରୀ ସାଲୁଜା ସନ୍ଦେହ ପ୍ରକଟ କରିଛନ୍ତି । ଠିକ ସେହିପରି ଗତ ସାଧାରଣ ନିର୍ବାଚନପୂର୍ବରୁ କଂଗ୍ରେସ ଛାଡି ସମରେନ୍ଦ୍ର ମିଶ୍ର ଭାଜପା ଦଳରୁ ପ୍ରାର୍ଥି ହେବେ ବୋଲି ମଧ୍ୟ ଆଲୋଚନା ହୋଇଥିଲା । ପ୍ରାୟ ୬ ଦିନ ପର୍ଯ୍ୟନ୍ତ ସମରେନ୍ଦ୍ର ଦିଲ୍ଲୀରେ ଡେରା ପକାଇ ଶେଷରେ ନିରାଶ ହୋଇ ଫେରିବାକୁ ପଡିଥିଲା ବୋଲି ଚର୍ଚ୍ଚା ଯୋର ଧରିଥିଲା । ଅବଶ୍ୟ ସେ ସମୟରେ ସମରେନ୍ଦ୍ର ସେହି ଚର୍ଚ୍ଚାକୁ ଖଣ୍ଡନ କରିଥିଲେ । ଭାଜପା ଭଳି ଏକ ସମ୍ପ୍ରଦାୟିକ ଦଳକୁ ସେ ଯାଇପାରିବେ ନାହିଁ ବୋଲି ଗଣମାଧ୍ୟମରେ କହିଥିଲେ । ଏହା ପୂର୍ବରୁ ୨୦୨୩ ମସିହାରେ ନରସିଂହଙ୍କ ବଡପୁଅ ଏଡଭୋକେଟ ଅମରେନ୍ଦ୍ର ମିଶ୍ର ମଧ୍ୟ ବିଜେଡିଦଳକୁ ଯିବେ ବୋଲି ଚର୍ଚ୍ଚା ହୋଇଥିଲା । ବିଜେଡିଦଳର ବବି ଦାସଙ୍କ ସହ ଅମରେନ୍ଦ୍ରଙ୍କ ଭଲ ସମ୍ପର୍କ ରହିଥିବା ଆଲୋଚନା ହୋଇଥିଲା । ନରସିଂହ ମିଶ୍ର କଂଗ୍ରେସଦଳର ବିଧାୟକ ଦଳର ନେତା ହୋଇ ବିଜେଡି ସହିତ ଭିତିରିଆ ବୁଝାମଣା କରିଥିବା ଅଭିଯୋଗ କରି ଖୋଦ କଂଗ୍ରେସଦଳର ଜଣେ ବିଧାୟକ କୃଷ୍ଣ ସଗରିଆ ଦଳଛାଡି ଚାଲିଯାଇଥିଲେ । ଗତ ସାଧାରଣ ନିର୍ବାଚନ ବେଳେ ଓ ୨୦୧୯ ମସିହାରେ ମଧ୍ୟ ଅନେକ ପୁରୁଣାନେତା ନରସିଂହଙ୍କ କାର୍ଯ୍ୟକଳାପକୁ ବିରୋଧ କରି କଂଗ୍ରେସଦଳ ଛାଡି ଚାଲିଯାଇଥିଲେ । ତେଣୁ ନରସିଂହ ପରିବାର କେତେବେଳେ କାହା ସହିତ ଟାୟଅଫ କରୁଛନ୍ତି ତାହା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି । ଗତ କିଛିମାସ ତଳେ ନରସିଂହଙ୍କ ପୁତୁରା ଠିକାଦାର ରାହୁଲ ମିଶ୍ରଙ୍କ ଫାର୍ମଉପରେ ଆୟକର ଚଢାଉ ହୋଇଥିଲା । ସେଥିପାଇଁ କୁଆଡେ ବିଜେପିଦଳ ସହିତ ବୁଝାମଣା କରି ସେହି ମାମଲାକୁ ରଫାଦଫା କରୁଥିବା ମଧ୍ୟ ଆଲୋଚନା ହେଉଛି । ତେବେ ସବୁଠୁ ଆଲୋଚନାର ବିଷୟ ହୋଇଛି ଓଭୋ ଏକ କୃଷି ଉଦ୍ୟୋଗ ହୋଇଥିଲେ ହେଁ ଜିଲ୍ଲାର କନକବର୍ଦ୍ଧନ ସିଂଦେଓ ଉପମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ ଥିବା ସତ୍ୱେ ତାଙ୍କୁ ଉଦଘାଟନୀ କାର୍ଯ୍ୟକ୍ରମକୁ ଡକାଯାଇନଥିବା କୁହାଯାଉଛି । ସେଥିପାଇଁ ଏହି କାର୍ଯ୍ୟକ୍ରମକୁ କନକବର୍ଦ୍ଧନଙ୍କ ସମର୍ଥକମାନେ ଆସିନଥିବା ମଧ୍ୟ ଦେଖାଯାଇଥିଲା । ତେଣୁ ଘଟଣାଟି ଆହୁରି ସନ୍ଦେହ ଓ ଆଲୋଚନା ଘେରକୁ ଯାଉଛି ।  ତେବେ ଯାହା ମଧ୍ୟ ଚର୍ଚ୍ଚା ହେଉ ଓଭୋ ଅଣ୍ଡାବ୍ରାଣ୍ଡ ଆଜି ବଲାଙ୍ଗୀରକୁ ଦେଶ ବିଦେଶରେ ପରିଚିତ କରାଇଛି ଓ ଏଭଲି ଏକ କାରଖାନାର ଉଦଘାଟନରେ ଜଣେ କେନ୍ଦ୍ରମନ୍ତ୍ରୀ ଯୋଗଦେବା କିଛି ନୂଆ ଘଟଣା ନୁହେଁ ବୋଲି ନରସିଂହଙ୍କ ସମର୍ଥକମାନେ କହୁଛନ୍ତି ।