17-Apr-2025

ବରୀ(ରଞ୍ଜିତ କୁମାର ମହାନ୍ତି)- ପୀହୁ ନିଖୋଜ ଘଟଣାକୁ ୫ ବର୍ଷ ଅତିକ୍ରାନ୍ତ କଲାଣି। ପିହୂ ମା ର ଲିଖିତ ଅଭିଯୋଗ ପରେ ବି ପୋଲିସ ହାତ ଖାଲି। ସୂଚନାମୁତାବକ, ବରୀ ବ୍ଲକ ଅଧିନସ୍ଥ ମଧୁସୂଦନପୁର ଗାଁ ର ଦେଢ଼ ବର୍ଷର ଶିଶୁକନ୍ୟା ନିଜ ଦାଣ୍ଡରେ ଖେଳୁଥିବା ବେଳେ ନିଖୋଜ ହେବା ଘଟଣା ସେତେବେଳେ ଚର୍ଚ୍ଚା ଘେରକୁ ଆସିଥିଲା। ଅପହୃତ ହୋଇଥିବା ଶିଶୁକନ୍ୟାର ମା ମୋନାଲିସା ନାୟକ ଗତ ୯.୮.୨୦୨୦ ରେ  ବିଂଝାରପୁର ଥାନାରେ ଲିଖିତ ଅଭିଯୋଗ କରିଥିଲେ। ମାତ୍ର ବିଂଝାରପୁର ପୋଲିସ ଘଟଣାକୁ ଗୁରୁତ୍ବ ନ ଦେଇ ୧୪୵୦୮୵୨୦୨୦ରେ ଉଚ୍ଚପଦସ୍ଥ ଅଧିକାରୀଙ୍କ ଚାପରେ ୧୪୵୦୮୵୨୦୨୦ରେ ଏକ ଅପହୃତ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲେ ମଧ୍ୟ ଅଦ୍ୟାବଧି ନିଖୋଜ ପିହୁକୁ ଠାବ କରି ପାରିନାହିଁ । ଏହି ମର୍ମରେ ନିଖୋଜ ପିହୁ ର ମା ମୋନାଲିସା ଜିଲ୍ଲାପାଳ ଯାଜପୁର, ଆରକ୍ଷୀ ଅଧିକ୍ଷକ ଯାଜପୁର, ଡିଜି ଓଡ଼ିଶା ଓ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ ଏହାର କୌଣସି ପଦକ୍ଷେପ ନିଆଯାଇଥିଲା। ସରକାର ବଦଳିବା ପରେ ଭୁବନେଶ୍ଵର ରାମ ମନ୍ଦିର କିକଟରୁ ଜଣେ ଦୃଷ୍ଟିବାଧିତ ମାକୋଳରୁ ଦେଢ଼ ବର୍ଷର ଶିଶୁପୁତ୍ରକୁ ଅପହରଣ କରାଯିବାର ୭୨ଘଣ୍ଟା ପରେ କମିଶନରେଟ ପୋଲିସ ଉଦ୍ଧାର କରିବା କ୍ଷେତ୍ରରେ ସକ୍ଷମ ହୋଇଥିବା ବେଳେ ବିଂଝାରପୁର ପୋଲିସ ୫ ବର୍ଷ ମଧ୍ୟରେ ନିଖୋଜ ପିହୁ ର ସନ୍ଧାନ ନ ପାଇବା ଜିଲ୍ଲା ପୋଲିସ ପ୍ରଶାସନର କାର୍ଯ୍ୟଦକ୍ଷତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ନିଖୋଜ ପିହୁ ର ଘଟଣା ବିଭିନ୍ନ ଗଣମାଧ୍ୟମରେ ପ୍ରକାଶ ପାଇବା ପରେ ଜାତୀୟ କଂଗ୍ରେସ ଦଳର କର୍ମକର୍ତ୍ତା ସ୍ଥାନୀୟ ମଧୁସୂଦନ ପୁର ଠାରେ ପହଞ୍ଚି ପିହୁ କୁ ଉଦ୍ଧାର କରିବା କ୍ଷେତ୍ରରେ ପ୍ରଶାସନ ପଦକ୍ଷେପ ନେବାକୁ ଦାବି କରିବା ସହିତ ତତ୍କାଳୀନ ଜିଲ୍ଲାପାଳଙ୍କୁ ଭେଟି ତୁରନ୍ତ ପଦକ୍ଷେପ ନେବାକୁ ଦାବି କରିଥିଲେ। ଏତତବ୍ୟତୀତ ନିଖୋଜ ପିହୁ ର ମା ମଧ୍ୟ ୨୯୵୦୧୵୨୦୨୧ରେ ମହିଳା ଶିଶୁ ବିକାଶ ମନ୍ତ୍ରୀଙ୍କୁ ଭେଟି ଗୁହାରି କରିବା ସହ ୨୪୵୦୨୵୨୦୨୧ରେ ବିଧାନସଭା ଆଗରେ ଧାରଣା ଦେବାକୁ ଯାଉଥିବା ବେଳେ କଟକ ଚାଉଳିଆଗଞ୍ଜ ପୋଲିସ ତାଙ୍କୁ ବାଟରେ ଅଟକ ରଖିବା ଘଟଣାକୁ ବୁଦ୍ଧିଜୀବୀ ମାନେ ନାପସନ୍ଦ କରିଥିଲେ। ବର୍ତ୍ତମାନ ଗୃହ ବିଭାଗ ମାନ୍ୟବର ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧୀନରେ ଥିବାବେଳେ ନିଖୋଜ ପିହୁ ର ମା ମଧ୍ୟ ମୁଖ୍ୟମନ୍ତ୍ରୀ ଙ୍କୁ ଭେଟି ଗୁହାରି କରିଥିବା ବେଳେ ଅଦ୍ୟାବଧି କୌଣସି ପଦକ୍ଷେପ ନିଆ ନ ଯିବା ମୋତେ ମାନସିକ ଯନ୍ତ୍ରଣା ଦେଉଛି ବୋଲି ପିହୁ ର ମା ମୋନାଲିସା ପ୍ରକାଶ କରିଛନ୍ତି। ଲୋକଙ୍କ ସରକାର କହି ବାହା ବାହା ନେଉଥିବା ମୋହନ ସରକାରଙ୍କ ପ୍ରଶାସନ ନିଖୋଜ ପିହୁ କୁ ଉଧାର କରିବା କ୍ଷେତ୍ରରେ କେତେଦୂର ସଫଳ ହେବ ତାହା ସମୟ କହିବ।ଏଭଳି ଏକ ସମ୍ବେଦନଶୀଳ  ଘଟଣାକୁ ଗୁରୁତ୍ବ ଦିଆଯାଇ ନିଖୋଜ ପିହୁ କୁ ଉଦ୍ଧାର କରିବାକୁ ମା ମୋନାଲିସା ଆକୁଳ ନିବେଦନ କରିଛନ୍ତି।