13-Apr-2025

ବରଗଡ଼:(ନିରଞ୍ଜନ ତ୍ରିପାଠୀ)-ଖାଦ୍ୟ ପରମ୍ପରା ହେଉଛି ଓଡ଼ିଆ ସଂସ୍କୃତିର ଅଂଶ । ଓଡ଼ିଆଙ୍କ ଘରେ କୌଣସି ପର୍ବ ପର୍ବାଣୀ ହେଲେ ଖାଦ୍ୟକୁ ପ୍ରାଧାନ୍ୟ ଦିଆଯାଇଥାଏ । ଭିନ୍ନ ଭିନ୍ନ ରୁଚି ରଖିଥିବାରୁ ଖାଦ୍ୟକୁ ନେଇ ମଧ୍ୟ ଓଡ଼ିଆ ଘରେ ପର୍ବ ପାଳନ ହୁଏ । ଦ୍ବିତୀୟା ଘାଣ୍ଟ ଏହା ଭିତରୁ ଅ୍ୟତମ । ସେହିପରି ରଜ, ପ୍ରଥମାଷ୍ଟମୀ, ଦୁର୍ଗା ପୂଜା, ଚିତାଲାଗି ଅମାବାସ୍ୟା, ବକୁଳ ଅମାବାସ୍ୟା ଭଳି ପର୍ବରେ ଭିନ୍ନ ଭିନ୍ନ ରକମର ଖାଦ୍ୟ ତିଆରି ହୋଇଥାଏ । ଚିତଉ ପିଠାଠୁ ଆରମ୍ଭ କରି ସରସତିଆ ପର୍ଯ୍ୟନ୍ତ, ଘାଣ୍ଟଠୁ କାକରା ଯାଏଁ ।ଓଡିଆ ପକ୍ଷ ପାଳନ ଅବସରରେ ଏହି ପରମ୍ପରାକୁ ବଜାୟ ରଖିବା ଓ ଏନେଇ ସଚେତନତା ସୃଷ୍ଟି ଉଦ୍ଦେଶ୍ୟରେ ପାରମ୍ପରିକ ଖାଦ୍ୟ ପାଳନ ଅଭିଯାନ -ଆମ ରୁଚି, ଆମ ଖାଦ୍ୟ ପ୍ରଦର୍ଶନୀ ଓ ପ୍ରତିଯୋଗିତା ସ୍ଥାନୀୟ ସଂସ୍କୃତି ଭବନ ପରିସରରେ ପାଳନ କରାଯାଇଛି।
ଜିଲ୍ଲା କୃଷି ବିଭାଗ ସହଯୋଗରେ ଆୟୋଜିତ ଏହି ଖାଦ୍ୟ ପ୍ରଦର୍ଶନୀ ଓ ପ୍ରତିଯୋଗିତାରେ ଜିଲ୍ଲାର ବିଭିନ୍ନ ମହିଳା ସଂଗଠନ, ସ୍ବେଚ୍ଛାସେବୀ ସଂଗଠନ ଏବଂ ସ୍ୱୟଂ ସହାୟକ ଗୋଷ୍ଠ ପକ୍ଷରୁ ବିଭିନ୍ନ ପ୍ରକାରର ପାରମ୍ପରିକ ଖାଦ୍ୟ ପ୍ରସ୍ତୁତ କରି ଖାଦ୍ୟ ପ୍ରଦର୍ଶନ କରି ଲୋକଙ୍କୁ ପାରମ୍ପରିକ ଖାଦ୍ୟର ଉପାଦେୟତା ବିଷୟରେ ସଚେତନ କରିଥିଲେ ।

ମୁଖ୍ୟ ଅତିଥି ଭାବେ ଅତିରିକ୍ତ ଜିଲ୍ଲାପାଳ ଶ୍ରୀ ମହେନ୍ଦ୍ର ମହାପାତ୍ର ଏଵଂ ଶ୍ରୀମତୀ ମଧୁଛନ୍ଦା ସାହୁ ଯୋଗ ଦେଇ ପ୍ରଦର୍ଶନୀକୁ ଉଦଘାଟନ କରିବା ସହ ଜିଲ୍ଲାବାସୀଙ୍କୁ ନିଜ ଦୈନନ୍ଦିନ ଜୀବନରେ ପାରମ୍ପରିକ ଖାଦ୍ୟ ଯୋଡିବାକୁ ବାର୍ତ୍ତା ଦେଇଛନ୍ତି।ସମ୍ମାନିତ ଅତିଥି ଭାବେ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶ୍ରୀ ପ୍ରହଲ୍ଲାଦ ଖୋସଲାଙ୍କ ସମେତ ଅତିରିକ୍ତ ଉଦ୍ୟାନ ନିର୍ଦ୍ଦେଶକ ଶ୍ରୀ ଗୋବିନ୍ଦ ଚନ୍ଦ୍ର ପଣ୍ଡା, ଡ଼ିଏସଡବ୍ଲୁଓ ସନ୍ଧ୍ୟାରାଣୀ ନେପାକ, ସଂସ୍କୃତି ଅଧିକାରୀ ତାହିର ହୁସେନ ଯୋଗ ଦେଇଥିବା ବେଳେ ଅତିରିକ୍ତ କୃଷି ଅଧିକାରୀ ଶ୍ରୀ ଅଞ୍ଜନ କୁମାର କାର୍ଯ୍ୟକ୍ରମକୁ ପରିଚାଳନା କରିଥିଲେ ।