05-Apr-2025

ବିନିକା(ହିମାଂଶୁ ଶେଖର ପୁଟେଲ)ସୁବର୍ଣ୍ଣପୁର ଜିଲ୍ଲା ବିନିକା ବ୍ଳକ ଫୁଲମୁଠି ଗ୍ରାମର ମାହେଶ୍ୱରୀ ଦୁଗ୍ଧ ସମବାୟ ସମିତି ଆନୁକୁଲ୍ୟରେ ଜିଲ୍ଲାରେ ପ୍ରଥମ କରି ମାଈ ବାଛୁରୀ ପରିପାଲନ ଯୋଜନା ନେଇ ଦାନା ବିତରଣ କାର୍ଯ୍ୟକ୍ରମର ଶୁଭାରମ୍ଭ ହୋଇଛି।ଏହାକୁ ସୁବର୍ଣ୍ଣପୁର ଜିଲ୍ଲାପାଳ ଅନ୍ୟା ଦାସ ଦୀପ ପ୍ରଜ୍ବଳନ ପୂର୍ବକ ଫିତା କାଟି ଉଦ୍ଘାଟନ କରିଥିଲେ।ବ୍ରାହ୍ମଣଙ୍କ ଶ୍ଳୋକ ପରେ ଜିଲ୍ଲାପାଳ ଶ୍ରୀମତୀ ଦାସ ଓ ଅନ୍ୟାନ୍ୟ ଅତିଥିଙ୍କ ଦ୍ଵାରା ବାଛୁରୀ ପୂଜନ କରାଯାଇଥିଲା ।ଜିଲ୍ଲା ଓମଫେଡ ସଭାପତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ଜିଲ୍ଲାପାଳ ଶ୍ରୀମତୀ ଦାସ ମୁଖ୍ୟ ଅତିଥି ଭାବେ ଯୋଗଦେଇ ସରକାରଙ୍କ ଦ୍ଵାରା ପ୍ରଚଳିତ ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ଚାଷୀ ମାନେ ଯେପରି ଲାଭବାନ ହେବେ ସେ  ଉଦ୍ଦେଶ୍ୟରେ ବକ୍ତବ୍ୟ ରଖିଥିଲେ । ମଞ୍ଚାସିନ ଅନ୍ୟ ଅତିଥି ମାନେ ଚାଷୀ ମାନଙ୍କ ପାଇଁ ଉପାଦେୟତା ତଥ୍ୟ, ଆର୍ଥିକ ଉନ୍ନତି ଉପରେ ତଥା  ଦୁଗ୍ଧ ଚାଷୀଙ୍କ ଜୀବିକା ଓ ଆର୍ଥିକ ଅଭିବୃଦ୍ଧି ଉଦ୍ଦେଶ୍ୟରେ  ସୂଚନା ପ୍ରଦାନ କରିଥିଲେ ।ଏହି ଅବସରରେ ମାହେଶ୍ୱରୀ ସୋସାଇଟି ମ୍ୟାନେଜର ଚୈତନ୍ୟ ଦାସ ଦୁଗ୍ଧ ଉତ୍ପାଦନ ଉପରେ ମନକଥା କହିଥିଲେ । ପରେ ବିଭିନ୍ନ କ୍ଷେତ୍ରରେ ଚୟନ ହୋଇଥିବା ୧୦ଜଣ ଚାଷୀଙ୍କୁ ମାନପତ୍ର ଦେଇ ସମ୍ମାନିତ କରାଯାଇଥିଲା।