31-Mar-2025

ପଦ୍ମପୁର (ପ୍ରେରଣା ଖବର )
ପଦ୍ମପୁର ସହର ଉପକଣ୍ଠସ୍ଥ 
ଲୁ ନାଟକ ଆଶ୍ରମ, ମହୁଲପାଲି  ଠାରେ ଗତ ୩୦.୦୩.୨୫ ଦିନ ସାରସ୍ୱତ ସାଧକ ତଥା ସଂସ୍କୃତି ଉପାସକ ସ୍ୱର୍ଗତ ଡ. ମାନଭଞ୍ଜନ ଜୟନ୍ତୀ ପାଳିତ ହୋଇଯାଇଛି। ଏ ଉପଲକ୍ଷେ ବ୍ୟଂଗକବି ମନୋରଞ୍ଜନ ସାହୁଙ୍କ  ସଭାପତିତ୍ବରେ ଅନୁଷ୍ଠିତ ଏକ ଭବ୍ୟ ସମାବେଶରେ   ବରଗଡ ସାଂସଦ ଶ୍ରୀ ପ୍ରଦୀପ ପୁରୋହିତ ମୁଖ୍ୟ ଅତିଥି ଭାବରେ ଯୋଗଦେଇଥିଲେ। ନାଟ୍ୟକାର କେଶରଞ୍ଜନ ପ୍ରଧାନଙ୍କ ସଂଯୋଜନାରେ ଆୟୋଜିତ ଏ ସଭାରେ ସହରର ଅନେକ ଗଣ୍ୟମାନ୍ୟ ବ୍ୟକ୍ତି ସ୍ୱର୍ଗତ ପ୍ରଧାନଙ୍କ ବ୍ୟକ୍ତିତ୍ୱର ବହୁବିଧ ଦିଗର ଆଲୋକପାତ ପୂର୍ବକ ଶ୍ରଦ୍ଧାଞ୍ଜଳୀ ଜ୍ଞାପନ କରିଥିଲେ। ଏ ଅବସରରେ ସ୍ୱର୍ଗତ ମାନଭଞ୍ଜନ ପ୍ରଧାନଙ୍କ ଲିଖିତ ଓ ଗୁରୁ ପ୍ରକାଶନୀ ଦ୍ଵାରା ପ୍ରକାଶିତ ପୁସ୍ତକ ବୋଡ଼ାସମ୍ବର ସାହିତ୍ୟାକାଶର ସପ୍ତର୍ଷିମଣ୍ଡଳ ଓ ଧ୍ରୁବତାରା ଉନ୍ମୋଚିତ ହୋଇଥିଲା। ଏ ପୁସ୍ତକର ସମୀକ୍ଷା କରି ଡ.  ଦ୍ବାରିକାନାଥ ନାୟକ ଏ ମହାର୍ଘ ରଚନା ବଳରେ ବୋଡାସମ୍ବର ଅଂଚଳର ଯଥାର୍ଥ ସାରସ୍ୱତ ଆକଳନ ହୋଇପାରିବ ବୋଲି ମତବ୍ୟକ୍ତ କରିଥିଲେ। ଉତ୍ସବର ପରବର୍ତ୍ତୀ ପର୍ଯ୍ୟାୟରେ ଏ ବର୍ଷର ମାନଭଞ୍ଜନ ସ୍ମାରକୀ ବକ୍ତୃତା ପ୍ରଦାନ କରିଥିଲେ କବି ଡ଼.  ପ୍ରଦୀପ ପଣ୍ଡା। 'ଲୋକ ସଂସ୍କୃତି: ଆଦିମତମ  ଆଧୁନିକତା' ଶୀର୍ଷକ ଏ ବକ୍ତବ୍ୟ ଶ୍ରୋତୃମହଲରେ ପ୍ରବଳ ଆଲୋଡ଼ନ ସୃଷ୍ଟି କରିଥିଲା । ଏଇ ଅବସରରେ ସର୍ବଶ୍ରୀ-ଅରୁଣ ମହାନ୍ତି, ପତିତପାବନ ସାହୁ, ସୋମନାଥ ସାହୁ, ମନୋରଞ୍ଜନ ସିଂ ବରିହା, ଲଳିତ ପଣ୍ଡା, ଚନ୍ଦ୍ରଶେଖର ପୁରୋହିତ, ଜୟନାରାୟଣ ତ୍ରିପାଠୀ, ରାଜେନ୍ଦ୍ର ମହାନ୍ତି,ନିରୋଜ ଦୋରା, ମିନକେତନ ସାହୁ ମହେଶ୍ୱର ସାହୁ ପ୍ରମୁଖ ଅନେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।ପରିଶେଷରେ ଶ୍ରୀ ପ୍ରୀତି ରଞ୍ଜନ ପ୍ରଧାନ ଧନ୍ୟବାଦ ଅର୍ପଣ କରିଥିଲେ।