24-Jan-2025

ବଲାଙ୍ଗୀର(ପ୍ରେରଣା ଖବର): ଦେଓଗାଁ ବ୍ଲକ ଅନ୍ତର୍ଗତ ଖଇରଗୁରା ଓ କୁମୁରିଆର ସୁଲିଆପୂଜା ଶହଶହ ବର୍ଷର ପରମ୍ପରା ରହିଆସିଛି। କନ୍ଧମାନଙ୍କ ସଂସ୍କୃତି ଓ ପରମ୍ପରାକୁ ସୁରକ୍ଷା ନେଇ ତଥା ପୂଜକମାନଙ୍କ ମତାମତ ନେଇ ଏହି ଦୁଇପୀଠର ବିକାଶ କରାଯିବ। କେବଳ ଏତିକି ନୁହେଁ ଦେଓଗାଁ ଅଞ୍ଚଳର ସାମଗ୍ରୀକ ବିକାଶ କରାଯିବ ବୋଲି ଆଜି ଦେଓଗାଁ ବ୍ଲକର କୁଲତାପଡା ଗ୍ରାପ.ର କୁମୁରିଆ ସାନଖଳା ଠାରେ ଆୟୋଜିତ ଆଞ୍ଚଳିକ ଲୋକମହୋତ୍ସବକୁ ଉଦଘାଟନ କରି ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ କହିଛନ୍ତି । ଠିକ ସେହିପରି 

ଦେଓଗାଁ ବ୍ଲକର ୧୨ଟି ପଞ୍ଚାୟତ ଅଞ୍ଚଳକୁ ଶୁଦ୍ଧ ପାନୀୟଜଳ ଯୋଗାଣ ପାଇଁ ୬୨କୋଟି ଟଙ୍କାର ପ୍ରକଲ୍ପକାମ  ଚାଲିଛି ବୋଲି ବିଧାୟକ କହିଥିଲେ। ପୂର୍ବରୁ ନବୀନ ସରକାର ଅମଳରେ ଦେଓଗାଁ ବ୍ଲକଅଞ୍ଚଳର ଭୀମଡୁଙ୍ଗୁରୀ ଓ ଚାନ୍ଦଲି ପୀଠକୁ ବହୁତ ଅନୁଦାନ ଆସିଛି । ଏବେ ସୁଲିଆପୀଠର ବିକାଶ ପାଇଁ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ୩୦କୋଟି ଟଙ୍କାର ଅନୁଦାନ ପାଇଁ ଦାବିପତ୍ର ଦିଆଯାଇଛି ବୋଲି ବିଧାୟକ ଶ୍ରୀ ସିଂଦେଓ କହିଛନ୍ତି । ମହୋତ୍ସବ କମିଟିର ଅଧ୍ୟକ୍ଷ ଅଭିମନ୍ୟୁ ମାଝୀଙ୍କ ସଭାପତିତ୍ୱ ଓ ମହୋତ୍ସବ କମିଟିର ସଭାପତି ଲକ୍ଷ୍ମଣ କୁମାର ମେହେରଙ୍କ ସଂଯୋଜନାରେ ଅନୁଷ୍ଠିତ ଆଜିର ଉଦଘାଟନୀ କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବିଧାୟକ କଳିକେଶ ନାରାୟଣ ସିଂଦେଓ, ସମ୍ମାନୀତ ଅତିଥି ଭାବରେ ଦେଓଗାଁ ବ୍ଲକ ଅଧ୍ୟକ୍ଷ ଦୟାନିଧି ଖମାରୀ,ପୂର୍ବତନ ବିଡିସିସି ସଭାପତି ସୁଶୀଳ ଚାନ୍ଦ, ବିଜେଡି ଦଳର କୈଳାଶ ମହାନ୍ତି, ଅତିଥି କଳାକାର ରସରାଜ ଅଚ୍ୟୁତ ପୁରୋହିତ, କଣ୍ଠଶୀଲ୍ପୀ ଶାଶ୍ୱତ ତ୍ରୀପାଠୀ, ସଂଯୋତ କଳାକେନ୍ଦ୍ରର ସଂପାଦିକା ସଂଗୀତା ଦାସ ପ୍ରମୁଖ ମଞ୍ଚାସୀନ ଥିଲେ। ସଭାପ୍ରାରମ୍ଭରେ ସୁଳିଆବୁଢାର ପୂଜାର୍ଚ୍ଚନା କରାଯାଇଥିଲା ଓ ମଞ୍ଚରେ କୁମୁରିଆ ସାନଖଳା ସୁଲିଆପୀଠର ମୁଖ୍ୟପୂଜକ ହରି ଝାଙ୍କର ସମେତ ଅନ୍ୟାନ୍ୟ ପୂଜକଙ୍କୁ ଉତ୍ତରିୟ ଓ ଫୁଲମାଳ ଦେଇ ସମ୍ବର୍ଦ୍ଧିତ କରାଯାଇଥିଲା । ରସରାଜ ଅଚ୍ୟୁତ ପୁରୋହିତଙ୍କ ବ୍ୟଙ୍ଗକବିତା ଓ କଣ୍ଠଶିଲ୍ପୀ ଶାସ୍ୱତ ତ୍ରୀପାଠୀଙ୍କ ଗୀତରେ ଦର୍ଶକ ବିଭୋର ହୋଇଯାଇ ଥିଲେ। ଠିକ ସେହିପରି ସଂଯ୍ୟୋତ କଳାକେନ୍ଦ୍ର,ବଲାଙ୍ଗୀରର ସମ୍ବଲପୁରୀ ନୃତ୍ୟ,ପୁଇଁତଳାର କଳାକାରଙ୍କ ଡାଲଖାଇ ନୃତ୍ୟ ମଧ୍ୟ ପରିବେଷିତ ହୋଇଥିଲା। ଏହା ସହିତ ବିଳମ୍ବିତ ରାତି ପର୍ଯ୍ୟନ୍ତ କଂସଦରବାର ମଧ୍ୟ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ଲକ୍ଷ୍ମଣ କୁମାର ମେହେର, ରୂପାଧର ପୁଟା, ଟଙ୍କଧର ରଣା, ବେଣୁଧର ସିଂ,ଜୟ ରଣା,ହେମନ୍ତ କୁମାର ମାଝୀ,ଲୋକନାଥ ନନ୍ଦ,ପିତବାସ ନାଏକ,ନିରୋଦ ଛତ୍ରୀଆ ପ୍ରମୁଖଙ୍କ ସହ ଆୟୋଜକ କମିଟିର ଶତାଧିକ ବ୍ୟକ୍ତି ଉପସ୍ଥିତ ଥିଲେ। କାର୍ଯ୍ୟକ୍ରମରେ  କୁଲତାପଡା, ମୁଡପଲା, ଅର୍ଜୁନପୁର, ମକୁନ୍ଦପୁର,ସୋନପୁର ଜିଲ୍ଲାର ବାଳଖମାର ଓ ଚାରଭଟା ଗ୍ରାମପଞ୍ଚାୟତ ବହୁସଂଖ୍ୟାରେ ଦର୍ଶକ ଆସିଥିଲେ । ଆସନ୍ତା ୨୫ ଓ ୨୬ ଦୁଇଦିନ ଏହି ମହୋତ୍ସବ ଚାଲିବ ।