15-Jan-2025

କଣ୍ଟାମାଳ(ଜୟ କୁମାର ମହାରଣା): ବୌଦ୍ଧ ଜିଲ୍ଲା କଣ୍ଟାମାଳ ବ୍ଳକ୍ ଖୁଣ୍ଟିଗୋରା ପଞ୍ଚାୟତ ଗୋଛାଗୋରାରେ ଆଦିବାସୀଙ୍କ ପାରମ୍ପାରିକ ସଂସ୍କୃତିର ଯାତ୍ରା ଭୀମବୁଢ଼ା ଯାତ୍ରା ତଥା ପଶ୍ଚିମଓଡ଼ିଶାର କୃଷିଭିତ୍ତିକ ପୌଷ ପୂର୍ଣ୍ଣିମାର ଅନନ୍ୟ ପର୍ବ ପୂଷପୁନୀ ଭେଟଘାଟ ୨୦୨୫ ଆଦିବାସୀ ନେତା ପିତାମ୍ବର ଭୋଇଙ୍କ ସଭାପତିତ୍ୱରେ ସାଂସ୍କୃତିକ କାର୍ଯ୍ୟକ୍ରମରେ ଅନୁଷ୍ଠିତ ହୋଇଯାଇଛି।ଭେଟଘାଟ ସଭାରେ ମୁଖ୍ୟ ଅତିଥିଭାବେ କଣ୍ଟାମାଳ ବିଧାୟକ କହ୍ନାଇ ଚ଼ରଣ ଡାଙ୍ଗ ଯୋଗ ଦେଇ କେବଳ କୃଷି ଉପରେ ନିର୍ଭର କରୁଥିବା  ବୌଦ୍ଧ-କନ୍ଧମାଳ-ବଲାଙ୍ଗିର-କଳାହାଣ୍ଡି ସୀମାନ୍ତ ଅଞ୍ଚଳ ଦେଇ ଅବବାହିକା ଖଡ଼ଙ୍ଗ ନଦୀରେ ଡ୍ୟାମ ନିର୍ମାଣ ହେଲେ ଏ ଅଞ୍ଚଳ ସଶ୍ୟଶ୍ୟାମଳା ହୋଇ ଲୋକଙ୍କ ଜୀବନରେଖା ବଦଳିଯିବ । ତେଣୁ  ବିଧାୟକ ହେବାପରେ ପ୍ରଥମ କାର୍ଯ୍ୟ ସ୍ୱରୂପ ଏହି ଖଡ଼ଙ୍ଗ ନଦୀରେ ଡ୍ୟାମ ପାଇଁ ସରକାରଙ୍କୁ ପ୍ରସ୍ଥାବ ଦେଇଥିବା ନେଇ ଉପସ୍ଥିତ ଜନସାଧାରଣଙ୍କୁ ଉଦବୋଧନ ଦେଇଥିଲେ । ସେହିପରି ସମ୍ମାନୀତ ଅତିଥିଭାବେ ଶିକ୍ଷକ ନେତା ନିଳାଚଳ ଭୋଇ, ଶିକ୍ଷାବିତ ଗୋବର୍ଦ୍ଧନ ପ୍ରଧାନ, ଆଦିବାସୀ ନେତା ସତ୍ୟନାରାୟଣ ମାଝୀ, ସମାଜସେବୀ ଧନଞ୍ଜୟ କାଲସେ,ଘଣ୍ଟାପଡ଼ା ବିଜେପି ମଣ୍ଡଳ ସଭାପତି ଗୋପୀନାଥ କହଁର,ଖୁଣ୍ଟିଗୋରା ସରପଞ୍ଚ ରବି ମହାକୁଡ଼, ଆମ୍ବଗାଁ ଗୌନ୍ତିଆ ମୋତିଲାଲ ରଣା, ବରିଷ୍ଠ ସାମ୍ବାଦିକ ପ୍ରଭାତ କୁମାର ସାହୁ ଓ ଅନୁଷ୍ଠାନର ସଭାପତି ଶଙ୍କର୍ଷଣ ଭୋଇ ପ୍ରମୁଖ ମଞ୍ଚାସିନ ରହି ଆଦିବାସୀଙ୍କ ପାରମ୍ପାରିକ ଜାନୀ ଯାତ୍ରାରେ କୃଷିଭିତ୍ତିକ ତଥା ଭାଇଚାରାର ପର୍ବ ପୁଷପୁନୀ ଉପରେ ବକ୍ତବ୍ୟ ରଖିଥିଲେ । କାର୍ଯ୍ୟକ୍ରମଟିକୁ ଅନୁଷ୍ଠାନର ସଦସ୍ୟ ଦେବେନ୍ଦ୍ର କାଲସେ ପରିଚାଳନା କରିଥିବା ସ୍ଥଳେ  ଅନୁଷ୍ଠାନର ସଂପାଦକ ନିର୍ମଳ କୁମାର ସାହୁ (ସିଲୁ) ଧନ୍ୟବାଦ ଦେଇଥିଲେ। ଶେଷରେ ଅଞ୍ଚଳର ଶିଶୁ କଳାକାରଙ୍କୁ ନେଇ ନାଚଗୀତର ଆସର ଶୀତୁଆ ପାଗରେ ମଧ୍ୟ ବିଳମ୍ବିତ ରାତ୍ର ପର୍ଯ୍ୟନ୍ତ ଦର୍ଶକଙ୍କୁ ବାନ୍ଧି ରଖିଥିଲା।କାର୍ଯ୍ୟକ୍ରମକୁ ଅନୁଷ୍ଠାନର ସମସ୍ତ ସଦସ୍ୟ ଓ ଗ୍ରାମବାସୀ ସହଯୋଗ କରିଥିଲେ।