14-Jan-2025

(ପୁର୍ଣ୍ଣ ଶଶୀ ଶେଖର ରାଓ) ଦାଦନ ପ୍ରବଣ ବଲାଙ୍ଗୀର ଜିଲ୍ଲାର ଏବେ ଦାଦନ ଋତୁ ର ଶେଷ ପର୍ଯ୍ୟାୟ ଚାଲିଛି। ପୌଷ ପୂର୍ଣ୍ଣିମା ଉତ୍ସବ ପାଳନ କରି ନିଜ ପେଟପାଟଣା ପାଇଁ ଭିଟାମାଟି ଛାଡ଼ି ବାହାର ରାଜ୍ୟ କୁ ଦାଦନ ଶ୍ରମିକ ଜୋର୍ ସୋର୍ ରେ ଯାଉଛନ୍ତି। ପଞ୍ଜିକୃତ ଶ୍ରମିକ ଙ୍କ ସଂଖ୍ୟା କମ୍ ଥିବାବେଳେ ସର୍ବାଧିକ ଅଣ ପଞ୍ଜିକୃତ ହୋଇ ଚାଲାଣ କରାଯାଉଥିବା ଦେଖିବାକୁ ମିଳୁଛି। ସମଗ୍ର ଜିଲ୍ଲାରେ ଦାଦନ ଶ୍ରମିକ ନିର୍ଯାତନା ଓ ମୃତ୍ୟୁ ମାମଲା ବଢୁଥିବା ସତ୍ତ୍ୱେ ଲୋକେ ଦାଦନ ଯିବାକୁ ପଛାଉନାହାନ୍ତି କାରଣ ଏଠାରେ କୌଣସି କାରଖାନା ର ସୁବିଧା ନାହିଁ। ବେଆଇନ ଦାଦନ ଶ୍ରମିକ ଚାଲାଣ ରୋକିବାକୁ ରାଜ୍ୟ ସରକାର ଅନେକ ପଦକ୍ଷେପ ନେଉଛନ୍ତି ସତ କିନ୍ତୁ ପ୍ରଶାସନିକ ଅଧିକାରୀ ଙ୍କ ଉଦାସୀନତା ଯୋଗୁଁ ତାହାର ସୁଫଳ ହେଉନାହିଁ। ବେଆଇନ ଦାଦନ ଶ୍ରମିକ ଉଦ୍ଧାର ଉପରେ ପୋଲିସ ର ମୁଖ୍ୟ ଭୂମିକା ରହୁଥିବା ବେଳେ ବିଭିନ୍ନ ସ୍ଥାନରେ ପୋଲିସ ବାବୁମାନେ ସର୍ଦ୍ଦାର ପୀରତି ରେ ଭାସୁଥିବା ନଜିର ଆସିଛି। ହେଲେ କିଛି ଥାନା ଅଧିକାରୀ ଦାଦନ ଶ୍ରମିକ ଉଦ୍ଧାର ମିଶନ କୁ ସଫଳ ରୂପାୟନ ଦେବାକୁ ଚେଷ୍ଟା କରୁଛନ୍ତି। ପ୍ରଥମ ସ୍ଥାନ ରେ ତୁରେକେଲା ଥାନା ଅଧିକାରୀ ରମାକାନ୍ତ ସାହୁ ରହିଛନ୍ତି। ଦ୍ବିତୀୟ ସ୍ଥାନରେ ବେଲପଡା ଥାନା ଅଧିକାରୀ ଅନନ୍ତ ପ୍ରଧାନ ରହିଥିବା ବେଳେ ତୃତୀୟ ରେ ଖପ୍ରାଖୋଲ ଥାନା ଅଧିକାରୀ ନରେନ୍ଦ୍ର ଛତର ରହିଛନ୍ତି। ଶେଷ ପର୍ଯ୍ୟାୟରେ ଖପ୍ରାଖୋଲ ପୋଲିସ ଦୁଇ ଥର ଦାଦନ ଉଦ୍ଧାର କରିବାରେ ସକ୍ଷମ ହୋଇଥିବା ବେଳେ ଗତକାଲି ତୁରେକେଲା ପୋଲିସ ଦାଦନ ଶ୍ରମିକ ଉଦ୍ଧାର କରିଛନ୍ତି। ସୂଚନା ଅନୁସାରେ ବଲାଙ୍ଗିର ଜିଲ୍ଲା ତୁରେକେଲା ଥାନା ମହୁଳବାହାଲି ଗାଁ ର ସର୍ଦ୍ଦାର ଜଗଦିଶ ମାଝୀ (୨୮) ବଲାଙ୍ଗିର ସଦର ଥାନାଅଞ୍ଚଳ ଉପର ଉଡାର ରୁ ୬ ଜଣ ଦାଦନ ଶ୍ରମିକ ଓ ୩ ଜଣ ଶିଶୁ ଶ୍ରମିକ ଆଣି ବେଆଇନ ଭାବେ ହାଇଦ୍ରାବାଦ ଚାଲାଣ କରୁଥିବା ବେଳେ କୌଣସି ସୂତ୍ରରୁ ଖବର ପାଇ ତୁରେକେଲା ପୋଲିସ ପହଞ୍ଚି ଦାଦନ ଶ୍ରମିକ ଉଦ୍ଧାର କରିଥିବା ବେଳେ ସର୍ଦ୍ଦାର ଜଗଦୀଶ କୁଆଡେ ଫେରାର ମାରିଥିବା ଜଣାପଡ଼ିଛି। ସର୍ଦ୍ଦାର ଜଗଦୀଶ ଙ୍କ ନାଁ ରେ ତୁରେକେଲା ଥାନା କେଶ୍ ନମ୍ବର ୭ ତା.୧୩.୧.୨୫ ରେ ବିଭିନ୍ନ ମାମଲା ରୁଜୁ କରାଯାଇଥିବା ଏସ ଆଇ ଶେଷଦେବ ସେଠ କହିଛନ୍ତି।