12-Jan-2021

ନୟାଗଡ଼,(ପ୍ରଦୀପ କୁମାର ପଣ୍ଡା): ଜିଲ୍ଲାସ୍ତରୀୟ ଖାଦ୍ୟ ସୁରକ୍ଷା ପରାମର୍ଶଦାତା କମିଟିର ବୈଠକ ଜିଲ୍ଲାପାଳ ଡ଼ା. ପୋମା ଟୁଡୁ ଙ୍କ ଅଧକ୍ଷତାରେ ସୋମବାର ଘ. ୧୧ -୩0ମି. ସମୟରେ ଜିଲ୍ଲା ପାଳଙ୍କ ସଦଭାବନା ଗୃହରେ ଅନୁଷ୍ଠିତ ହୋଇଯାଇଛି | ଏହି ବୈଠକରେ ଡ଼ା. ଟୁଡୁ ସମସ୍ତ ସଦସ୍ୟଙ୍କୁ ସ୍ୱାଗତ ଜଣାଇ ବୈଠକର ଆବଶ୍ୟକତା ବିଷୟରେ ସୂଚନା ଦେଇ କହିଥିଲେ ଯେ ଖାଦ୍ୟ ସୁରକ୍ଷା ପାଇଁ ସମସ୍ତ ସଦସ୍ୟଙ୍କ ଭୂମିକା ଏବଂ ଦାୟିତ୍ୱ ଗୁରୁତ୍ୱପୂର୍ଣ | ବିଭିନ୍ନ ବିଭାଗ ଯଥା ଜିଲ୍ଲା ମୁଖ୍ୟ ଯୋଗାଣ ଅଧିକାରୀ, ଜିଲ୍ଲା ମୁଖ୍ୟ ପଶୁ ଚିକିତ୍ସା ଅଧିକାରୀ, ଜିଲ୍ଲା ସମାଜ କଲ୍ୟାଣ ଅଧିକାରୀ ଆଦି ବିଭାଗରେ ଖାଦ୍ୟ ସୁରକ୍ଷା ବିଷୟରେ ବିହିତ ପଦକ୍ଷେପ ନିଆଯାଇ ପଞ୍ଜିକରଣ କରିବା ସହିତ ରାଜସ୍ବ ଆଦାୟ କରିବା ପାଇଁ ଖାଦ୍ୟ ସୁରକ୍ଷା ଅଧିକାରୀଙ୍କୁ ନିର୍ଦେଶ ଦେଇଥିଲେ | 
           ଏହାପରେ ଫାଇଲେରିଆ ରୋଗ ନିରାକରଣ ପାଇଁ ଔଷଧ ବଣ୍ଟନ କାର୍ଯ୍ୟକ୍ରମ ଫେବୃଆରୀ ୧0 ତାରିଖ ରୁ ଆରମ୍ଭ କରାଯିବା ପାଇଁ ବୈଠକରେ ସ୍ଥିର କରାଯାଇଛି | ଫାଇଲେରିଆ ନିରାକରଣ ବଟିକା ସଠିକ ଭାବେ ବଣ୍ଟନ କରାଯିବା ପାଇଁ ଜିଲ୍ଲାପାଳ ଜିଲ୍ଲା ସ୍ୱାସ୍ଥ୍ୟ ଅଧିକାରୀଙ୍କୁ ନିର୍ଦେଶ ଦେଇଥିଲେ | ସେହିପରି ମଶାରୀ ବଣ୍ଟନ କାର୍ଯ୍ୟକ୍ରମକୁ ତ୍ୱରାନ୍ୱିତ କରିବାକୁ ଡ଼ା. ଟୁଡୁ ପରାମର୍ଶ ଦେଇଥିଲେ | ଆସନ୍ତା ଷୋହଳ ତାରିଖଠାରୁ କୋଭିଡ ଟୀକାକରଣ ହେବାକୁ ଥିବାରୁ ମଙ୍ଗଳ ବାର ଦିନ ପ୍ରତେକ ବ୍ଳକସ୍ତରରେ ବିଡିଓ ଙ୍କ ଅଧକ୍ଷତାରେ ସମସ୍ତ ଥାନା ଅଧିକାରୀ, ସମ୍ପୃକ୍ତ ଡାକ୍ତର ଏବଂ ଅନ୍ୟାନ୍ୟ ଅଧିକାରୀ ମାନଙ୍କ ଉପସ୍ଥିତିରେ ଏକ କୋଭିଡ ନିରାକରଣ ବୈଠକ କରିବାକୁ ନିର୍ଦେଶ ଦେଇଥିଲେ | ସମସ୍ତ ବିଭାଗର ଡାକ୍ତର ମାନେ ଏହି ଟୀକାକରଣରେ ଯତ୍ନବାନ ହେବା ସହିତ ପ୍ରଥମେ ଟୀକା ପ୍ରଦାନ କରାଯିବା ବ୍ୟକ୍ତିର ସ୍ୱାସ୍ଥ୍ୟ ପରୀକ୍ଷା କରି ଟୀକାକରଣ ପରେ ତିରିଶ ମିନିଟ ପର୍ଯ୍ୟନ୍ତ ଉକ୍ତ ବ୍ୟକ୍ତିଙ୍କୁ ନଛାଡିବା ପାଇଁ ପରାମର୍ଶ ଦିଆ ଯିବାକୁ ଜିଲ୍ଲାପାଳ କହିଛନ୍ତି | ସୁରକ୍ଷା କର୍ମୀ ମାନେ ଟୀକାକରଣ ସମୟରେ ପରିଚୟ ପତ୍ର ଠିକ ଭାବେ ଯାଞ୍ଚ କରି ନିର୍ବାଚନ ପଦ୍ଧତିରେ ଟୀକାଦାନ କାର୍ଯ୍ୟକ୍ରମକୁ ସୁଚାରୁରୂପେ ପରିଚାଳନା କରିବାର ନିର୍ଦେଶ ମଧ୍ୟ ରହିଛି | ଏହି ବୈଠକରେ ଅତିରିକ୍ତ ଜିଲ୍ଲାପାଳ ବିଧାନ ଚନ୍ଦ୍ର ରାୟ, ଉପଜିଲ୍ଲାପାଳ ଲଗ୍ନଜିତ ରାଉତ, ବନଖଣ୍ଡ ଅଧିକାରୀ ଧନରାଜ ଏଚ ଡି, ଅତିରିକ୍ତ ଜିଲ୍ଲା ଆରକ୍ଷୀ ଅଧିକ୍ଷକ ଉମାକାନ୍ତ ମଲିକ, ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ଼ା. ଶକ୍ତି ପ୍ରସାଦ ମିଶ୍ର, ଜିଲ୍ଲା ଜନ ସ୍ୱାସ୍ଥ୍ୟ ଅଧିକାରୀ ଡ଼ା. ପୁଷ୍ପା ନୀଳିମା ଲାକ୍ରା ଏବଂ ଜିଲ୍ଲାର ଅନ୍ୟାନ୍ୟ ଅଧିକାରୀ ମାନେ ଯୋଗ  ଦେଇଥିଲେ |