13-Jan-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକର କୁଲତାପଡା ଗ୍ରାମପଞ୍ଚାୟତରେ ଥିବା ଖଇରଗୁରା ବଡଖଳା ଓ କୁମୁରିଆ ସାନଖଳା ସୁଲିଆପୀଠର ସାମଗ୍ରୀକ ବିକାଶ ଦାବିନେଇ ଆଜି କୁମୁରିଆ ଆଞ୍ଚଳିକ ଲୋକମହୋତ୍ସବ କମିଟି ରାଜ୍ୟର ସଂସ୍କୃତି, ଭାଷା, ସାହିତ୍ୟ, ଉଚ୍ଚଶିକ୍ଷା ମନ୍ତ୍ରୀ, କ୍ରୀଡା ଓ ଯୁବବ୍ୟାପାର ବିଭାଗର ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ ଭେଟିଛନ୍ତି । ମହୋତ୍ସବ କମିଟିର ସଂଯୋଜକ ରୂପାଧର ପୁଟା ଓ ସଭାପତି ଲକ୍ଷ୍ମଣ କୁମାର ମେହେରଙ୍କ ନେତୃତ୍ୱରେ ପ୍ରାୟ ୨୦ଜଣ ସଦସ୍ୟ ବଲାଙ୍ଗୀର ସର୍କିଟହାଉସଠାରେ ମନ୍ତ୍ରୀ ଶ୍ରୀ ସୂର୍ଯ୍ୟବଂଶୀଙ୍କୁ ଭେଟି ଦାବିପତ୍ର ଦେବା ସହିତ ଆଲୋଚନା କରିଛନ୍ତି । କମିଟି ଦାବି କରିଛି ଯେ,ଆଦିବାସୀମାନଙ୍କୁ ଧମିୟ ଭାବନା ସହିତ ଜଡିତ ଉଭୟ ଖଇରଗୁରା ଓ କୁମୁରିଆ ସୁଳିଆ ପୀଠର ବିକାଶର ଆବଶ୍ୟକତା ରହିଛି । ଉଭୟପୀଠରେ ସୁଲୀଆଯାତ୍ରା ସମୟରେ ଲକ୍ଷାଧିକ ଲୋକଙ୍କ ସମାଗମ ହେଉଛି କିନ୍ତୁ ଭକ୍ତଙ୍କ ପାଇଁ କିଛି ସୁବିଧା ସୁଯୋଗ କରାଯାଇ ପାରିନି । ଗତ କିଛିଦିନ ତଳେ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ ମଧ୍ୟ ଏହି ଦୁଇପୀଠର ବିକାଶ ପାଇଁ ମୁଖ୍ୟମନ୍ତ୍ରୀ ମୋହନଚରଣ ମାଝୀ ଓ ସଂସ୍କୃତିମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ । ଲୋକଙ୍କ ଦାବିକୁ ନେଇ ସୁଳିଆପୀଠର ବିକାଶ ପାଇଁ ପଦକ୍ଷେପ ନେବାକୁ ମନ୍ତ୍ରୀଙ୍କୁ ଅନୁରୋଧ କରା ଯାଇଛି। ଉଭୟ ପୀଠ ପାଖରେ ଥିବା ଦୁଇଟି କ୍ଷୁଦ୍ରଜଳସେଚ ପ୍ରକଲ୍ପର ବିକାଶ ସହ ସାମଗ୍ରୀକ ବିକାଶ ପାଇଁ ୩୦କୋଟି ଟଙ୍କାର ଅନୁଦାନ ଦେବାକୁ ଦାବି କରାଯାଇଛି । ଏହା ସହିତ ଭୀମଡୁଙ୍ଗୁରୀଠାରେ ସ୍ୱାଧିନତା ସଂଗ୍ରାମୀ ଧରମସିଂ ମାଝୀ ମାନଧାତାଙ୍କ ପ୍ରତିମୂର୍ତ୍ତି ସ୍ଥାପନ ପ୍ରକ୍ରୀୟାକୁ ତ୍ୱରାନ୍ୱିତ କରା ଯିବାକୁ ମଧ୍ୟ ଦାବି କରାଯାଇଛି । ଜରାସିଂହା ଷ୍ଟାଡିୟମର ଉନ୍ନୟନ ପାଇଁ ପ୍ରସ୍ତାବିତ ୪କୋଟି୭୫ଲକ୍ଷ ଟଙ୍କା ମଞ୍ଜୁର କରିବା ଓ ଦେଓଗାଁ ଷ୍ଟାଡିୟମର ମଧ୍ୟ ଉନ୍ନୟନ ପାଇଁ ଅନୁଦାନ ଦେବାକୁ ଲକ୍ଷ୍ମଣ ମେହେର ମନ୍ତ୍ରୀଙ୍କୁ ଅନୁରୋଧ କରିଥିଲେ । ଏହି ଆଲୋଚନାରେ ମନ୍ତ୍ରୀ ଶ୍ରୀ ସୂର୍ଯ୍ୟବଂଶୀଙ୍କ ସହ ଲକ୍ଷ୍ମଣ କୁମାର ମେହେର, ରୂପାଧର ପୁଟା,ଟଙ୍କଧର ରଣା,ବେଣୁଧର ସିଂ,ଜୟ ରଣା,ହେମନ୍ତ କୁମାର ମାଝୀ,ଲୋକନାଥ ନନ୍ଦ, ପିତବାସ ନାଏକ, ନିରୋଦ ଛତ୍ରୀଆ, ବିଜେପିର ବରିଷ୍ଠନେତା ଗୋପାଳଜୀ ପାଣିଗ୍ରାହୀ, ଅମିତ ସିଂନିନା,ପ୍ରମୋଦ ସାହୁ, ଅମରଜିତ ପଟେଲଙ୍କ ସହ ବହୁସଂଖ୍ୟାରେ ଲୋକ ଉପସ୍ଥିତ ଥିଲେ । ମନ୍ତ୍ରୀ ଏହି ଦାବିଗୁଡିକ ବିଷୟରେ ପଦକ୍ଷେପ ନେବେ ବୋଲି ପ୍ରତିଶୃତି ଦେଇଥିଲେ ବୋଲି ସୂଚନା ମିଳିଛି ।