12-Jan-2025

ବଲାଙ୍ଗୀର(ପ୍ରେରଣା ଖବର): କଳା ବଞ୍ଚିଲେ କଳାକାର ବଞ୍ଚିବ ଓ ସେହି ମାର୍ଗରେ  ଆମର ଅଞ୍ଚଳର ଲୋକ କଳା ଓ ସଂସ୍କୃତି ବଞ୍ଚିବ ଓ ଲୋକ ସଂସ୍କୃତିର ସଂରକ୍ଷଣ ଓ ସମ୍ବର୍ଦ୍ଧନ ହୋଇପାରିବ। ବଲାଙ୍ଗୀରର କୋଶଳ କଳାମଣ୍ଡଳ  ପାଇଁ ସ୍ବର୍ଗତ ମହାରାଜା ରାଜେନ୍ଦ୍ରନାରାୟଣ ସିଂହଦେଓଙ୍କ ଦେଖିଥିବା ସ୍ବପ୍ନ ସାକାର ହେବ ବୋଲି କହିଛନ୍ତି ପୂର୍ବତନ ରାଜ୍ୟସଭା ସାଂସଦ ଅନଙ୍ଗ ଉଦୟ ସିଂହଦେଓ। 
ବଲାଙ୍ଗୀର ର ଅଗ୍ରଣୀ ସମାଜ ସଂସ୍କୃତିର ଅନୁଷ୍ଠାନ ଅନ୍ବେଷଣ ତରଫରୁ ଆଜି କୋଶଳ କଳାମଣ୍ଡଳ ପଡିଆରେ ଦିବସବ୍ୟାପୀ କାର୍ଯ୍ୟକ୍ରମ ସହ ଅନ୍ବେଷଣ ଫେଷ୍ଟ -୨୦୨୫  ର ଉଦଯାପନୀ ସଭାରେ ମୁଖ୍ଯ ଅତିଥି ଭାବରେ ଯୋଗ ଦେଇ ସକାଳେ ଅନୁଷ୍ଠିତ ପ୍ରତିଯୋଗିତାର କୃତୀ ପ୍ରତିଯୋଗୀଙ୍କୁ ପୁରସ୍କୃତ କରିବା ସହ  ଗୋଲାପ ବାଗ,ମୁରଲୀ ମହାକୁର, ରାଜେନ୍ଦ୍ର ମଲ୍ଲିକ, କିଶୋର ପଟେଲ, ଇନ୍ଦ୍ରମଣି ବାରିକ,ବ୍ୟାସଦେବ ପୁରୋହିତ,ଇଶ୍ବରୀ ବେହେରା, ସ୍ବରୂପା ସିଂ,ଅଂଜନ କୁମ୍ଭାରଙ୍କୁ ସମ୍ବର୍ଦ୍ଧିତ କରିଥିଲେ। 

ସକାଳେ ଲୋକ ବାଦ୍ଯ ଦଳ ସହ କଳାକାର ଶୋଭାଯାତ୍ରାର ଆରମ୍ଭ ହୋଇଥିଲା ବଲାଙ୍ଗୀର ପାଟଣେଶ୍ବରୀଙ୍କ ମନ୍ଦିରରୁ ଦୀପ ପ୍ରଜ୍ବଳନ କରି।  ଶୋଭାଯାତ୍ରା କୋଶଳ କଳାମଣ୍ଡଳରେ ପହଞ୍ଚି  ଅନ୍ବେଷଣ ଫେଷ୍ଟର ଶୁଭାରମ୍ଭ  ହୋଇଥିଲା। ଉଦଘାଟନୀ ଉତ୍ସବ ରେ ମୁଖ୍ଯ ଅତିଥି ଭାବରେ ବଲାଙ୍ଗୀର ପୌରାଧ୍ୟକ୍ଷା ଶ୍ରୀମତୀ ଲିକା ସାହୁ ଯୋଗ ଦେଇ କଳା ଓ ସଂସ୍କୃତିର ବିକାଶ ପାଇଁ କଳାକାର ମାନଙ୍କ ସଂପୂର୍ଣ୍ଣ ସମର୍ପଣ ଯୋଗୁ ବଲାଙ୍ଗୀର ର କଳା ବଞ୍ଚିରହିଛି ଓ ଏହି ଧାରା ଆଗକୁ ବଢିବା ଦରକାର ବୋଲି ସେ କହିଥିଲେ। ଅନ୍ବେଷଣ ଫେଷ୍ଟ ର ପରିଚାଳନା ମୁଖ୍ଯ  ସନ୍ଦୀପ କୁମାର କୁଅଁରଙ୍କ  ସଂଯୋଜନାରେ  ସମ୍ମାନିତ ଅତିଥି ଭାବରେ ନାଟ୍ୟଭୂଷଣ ଜଗଦାନନ୍ଦ ଛୁରିଆ, ଗୁରୁଶ୍ରୀ ଡକ୍ଟର ଘାସିରାମ ମିଶ୍ର, ନାଟ୍ୟକାର ନିର୍ଦ୍ଦେଶକ ସତ୍ଯରଞ୍ଜନ ବେହେରା ମଞ୍ଚାସୀନ ହୋଇଥିଲେ। ପରେ ପରେ ଅବକ୍ଷୟମୁଖୀ ଲୋକସଂସ୍କୃତିର ସଂରକ୍ଷଣ ଓ ସମ୍ବର୍ଦ୍ଧନ  ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା।ଏଥିରେ  ସଂସ୍କୃତି ଗବେଷକ ଅର୍ଜୁନ ମୁଗ୍ରୀ,କୀର୍ତ୍ତନ ଦୀପ ଓ ସତ୍ଯରଞ୍ଜନ ବେହେରା ଯୋଗ ଦେଇ ଲୋକସଂସ୍କୃତି ର ସଂରକ୍ଷଣ ପାଇଁ ଆନ୍ତରିକ ଉଦ୍ୟମ  ଓ ସମ୍ବର୍ଦ୍ଧନ ପାଇଁ  ସରକାରୀ ପ୍ରୋତ୍ସାହନ ଜରୁରୀ ବୋଲି କହିଥିଲେ। ପରେ ପରେ ଆରମ୍ଭ  ହୋଇଥିଲା ହାସ୍ୟକବି ସମ୍ମିଳନୀ।ରାଜେଶ ଦଣ୍ଡସେନାଙ୍କ ସଂଯୋଜନା ରେ ବ୍ୟଙ୍ଗ କବି ଅର୍ଜୁନ କୁମାର ସାହୁ, ହାସ୍ୟ କବି ରଂଜିତ ପ୍ରଧାନ, ଗିତିକବି ଗରିବ ମଲ୍ଲିକ, ବ୍ୟଙ୍ଗ କବି ଦିଲିପ କୁମାର ମିଶ୍ର, ବ୍ୟଙ୍ଗ କବି ଯଶୋବନ୍ତ କୁମ୍ଭାର । ପରେ ପରେ ଜିଲ୍ଲା ସ୍ତରୀୟ  ଲୋକନୃତ୍ଯ ,ଶାସ୍ତ୍ରୀୟ

ନୃତ୍ୟ ଓଡିଶୀ,ଚିତ୍ରାଙ୍କନ, ଅଭିନୟ ଓ ଗୀତ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଛତାପିପଲ ଗ୍ରାମର  ମାଷ୍ଟର ଶଙ୍କର କଲତାଙ୍କ ରାବଣ ଭୂମିକାରେ ରାବଣ ଦରବାର ଅନୁଷ୍ଠିତ ହୋଇଥିଲା।ସମ୍ବଲପୁର  ଓ ସୁନ୍ଦରଗଡ ର କଳାକାର ମାନଙ୍କ ଦ୍ବାରା ଲୋକନୃତ୍ଯ ପରିବେଷଣ ପରେ ସଂଧ୍ୟାରେ  ମୂଳ ବଙ୍ଗଳା ଶରତଚନ୍ଦ୍ର ଚଟ୍ଟୋପାଧ୍ୟାୟଙ୍କ ରଚନାକୁ ନାଟ୍ୟ ରୂପାନ୍ତର କରି ନାଟକ -  ପ୍ରକାଶ ଓ ଛାୟା ପରିବେଷଣ କରାଯାଇଥିଲା । ନାଟ୍ୟକାର ନିର୍ଦ୍ଦେଶକ  ପ୍ରକାଶ ଚନ୍ଦ୍ର ଥନାପତି ଏହାକୁ ରଚନା କରିବା ସହ ନିର୍ଦ୍ଦେଶନା ଦେଇଥିଲେ। ପରେ ପରେ ଲୋକ ସଂଗୀତ କାର୍ଯ୍ୟକ୍ରମ ରେ ବିଭୋର ହୋଇଥିଲେ ଦର୍ଶକ।