11-Jan-2025

ଲୋଇସିଂହା, (ବିନୋଦ ଦୀପ) ବଲାଙ୍ଗୀର ଜିଲ୍ଲା ଲୋଇସିଂହା ବ୍ଲକ କାର୍ଯ୍ୟାଳୟ ପରିସରରେ  ବ୍ଲକ ସ୍ତରୀୟ ଲୋକ ମହୋତ୍ସବ ଶୁକ୍ରବାର ଅନୁଷ୍ଠିତ ହୋଇଯାଇଛି l ଏହି ଅବସରରେ ପ୍ରଥମେ ମଶାଲ ଶୋଭାଯାତ୍ରା ଲୋଇସିଂହା ଦୁର୍ଗା  ମନ୍ଦିରରୁ ଲୋକ ମହୋତ୍ସବ ମଞ୍ଚ କୁ ଏକ ବିରାଟ ଶୋଭାଯାତ୍ରା ରେ କଲାକାର ଙ୍କ ଗହଣରେ ଅଣାଯାଇଥିଲା l ବିଡ଼ିଓ ଅକ୍ଷୟ ପାଣି ଉଡ୍ଡୁ ଙ୍କ ଅଧକ୍ଷାତାରେ ଅନୁଷ୍ଠିତ ଉକ୍ତ ଲୋକ ମହୋତ୍ସବ ଉଦଘାଟନୀ ଉତ୍ସବ ରେ ମୁଖ୍ୟ ଅତିଥି ରୂପେ ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ ପ୍ରଭାତ ମହାପାତ୍ର, ସମ୍ମାନିତ ଅତିଥି ରୂପେ ବ୍ଲକ ଅଧ୍ୟକ୍ଷ ଯତୀନ୍ଦ୍ର ପଟେଲ, ସ୍ୱାସ୍ଥ୍ୟମନ୍ତ୍ରୀ ଙ୍କ ବ୍ଲକ ପ୍ରତିନିଧି ଗୌରାଙ୍ଗ ନାଏକ , ବଲାଙ୍ଗୀର ସାଂସଦ ଙ୍କ ପ୍ରତିନିଧି ବାଳକୃଷ୍ଣ ଧରୁଆ, ସରପଞ୍ଚ ସଙ୍ଘ ସଭାପତି ସଞ୍ଜୟ ଗଡତ୍ୟା, ବ୍ଲକ କଳାକାର ସଂଘ ସଭାପତି ସରୋଜ ବିଶ୍ୱାଳ ପ୍ରମୁଖ ଯୋଗଦେଇ ନଡ଼ିଆ ଭାଙ୍ଗି, ପ୍ରଦୀପ ପ୍ରଜ୍ଵଳନ କରି ଉଦଘାଟନ କରିଥିଲେ l

ଏହି ଅବସରରେ ଅତିଥି ମାନେ ଅଞ୍ଚଳ ର ଲୋକ ସଂସ୍କୃତ, ଲୋକ ବାଦ୍ୟ, ଲୋକ୍ ଗୀତ, ଲୋକ ନୃତ୍ୟ ର  କଳାକାର ଙ୍କ ଲୁକ୍କାୟିତ ପ୍ରତିଭା ର ଚିହ୍ନଟ ଓ ସୁରକ୍ଷା ଉପରେ ଆଲୋକପାତ କରିଥିଲେ l ପରେ ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀଯୁକ୍ତ ଅକ୍ଷୟ ପାଣି ଉଡ୍ଡୁ ଙ୍କ ସ୍ୱର ରେ 'ଏଇ ଯେ ବନଲତା ପାହାଡ଼' ଗୀତରେ ଦର୍ଶକ ଝୁମିଥିଲେ l ଏହି ଅବସରରେ କଳାକାର ମାନଙ୍କ ଦ୍ଵାରା କରମା ନୃତ୍ୟ, ସମ୍ବଲପୁରୀ ଲୋକ ନୃତ୍ୟ, ପାଲା, ସଙ୍କୀର୍ତ୍ତନ, ସମ୍ପ୍ରଦା, ଖଞ୍ଜଣି, ଘୁଡୁକା, ପଞ୍ଚ ବାଦ୍ୟ, ଦଣ୍ଡ ନୃତ୍ୟ, ରାମ ଲୀଳା , ବାହା ଘର ଗୀତ, ଘୋଡ଼ା ନାଚ ଆଦି ବିଭିନ୍ନ ନାଚ, ଗୀତ, ବାଦ୍ୟ ପରିବେଷିତ ହୋଇଥିଲା l ପାରମ୍ପାରିକ ଲୋକ ନୃତ୍ୟ ଓ ଲୋକ ଗୀତରେ ମଞ୍ଚ ଦୁଲୁକିଥିଲା l ମଞ୍ଚ କୁ ପି. ଇ. ଓ ସମାରୁ ଦଣ୍ଡସେନା ଓ ଭିକାରି ଚରଣ କର୍ମୀ ପରିଚାଳନା କରିଥିବା ବେଳେ ବିଚାରକ ଭାବେ ବରିଷ୍ଠ କଳାକାର ଶ୍ରୀଯୁକ୍ତ ପ୍ରତାପ ବହିଦାର, ଦେବେନ୍ଦ୍ର ମିସ୍ତ୍ରୀ, ବ୍ରଜ ମୋହନ ବିଶୋଇ ଯୋଗଦେଇଥିଲେ l ଅନ୍ୟ ମାନଙ୍କ ମଧ୍ୟରେ ଜି. ପି. ଡି.ଓ କିଶୋର ଚନ୍ଦ୍ର ମାନସିଂହ, ଏ.ଏ.ଇ ସିଦ୍ଧାର୍ଥ ପାଢ଼ୀ ,ବ୍ଲକ ଯୋଗାଣ ଅଧିକାରୀ ସୋମ୍ୟରଞ୍ଜନ ମହାନନ୍ଦ ଙ୍କ ସମେତ ସରପଞ୍ଚ ସମିତି ସଭ୍ୟା ସଭ୍ୟ, ସରକାରୀ କର୍ମଚାରୀ, କଳାକାର, କଲାପ୍ରେମୀ ଉପସ୍ଥିତ ଥିଲେ l ଏହି ଅବସରରେ କୃତି କଳାକାର ଙ୍କୁ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା l କୃତି କଳାକାର ଆଗାମୀ ଉପଖଣ୍ଡ ସ୍ତରୀୟ ଲୋକ ମହୋତ୍ସବ ରେ ଭାଗନେବେ ବୋଲି ଆୟୋଜକ କମିଟି ପ୍ରକାଶ କରିଛନ୍ତି l