10-Jan-2025

ଯାଜପୁର/ବରୀ(ରଞ୍ଜିତ ମହାନ୍ତି): ବରୀ ବ୍ଳକ ଅନ୍ତର୍ଗତ କଳାମାଟିଆ ପଞ୍ଚାୟତ ସ୍ଥିତ ସର୍ବପ୍ରାଚୀନ ରାଧାକାନ୍ତ ମଠରେ ପବିତ୍ର ଶାମ୍ବ ଦଶମୀ ଉପଲକ୍ଷେ ଏବଂ ମଠାଧିସ ଶ୍ୟାମସୁନ୍ଦର ଦାସଜୀ ମହାରାଜଙ୍କ ଜନ୍ମୋତ୍ସବ ଉପଲକ୍ଷେ ଏକ ସନାତନ ଧର୍ମସମ୍ମିଳନୀ ଏବଂ ପ୍ରବଚନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ଏହି କାର୍ଯ୍ୟକ୍ରମକୁ ସମାଜସେବୀ ଗୋବର୍ଦ୍ଧନ ତ୍ରିପାଠୀ ପ୍ରଦୀପ ପ୍ରଜ୍ବଳନ କରି ଶୁଭାରମ୍ଭ କରିଥିଲେ। ପ୍ରଥମେ ବିଭିନ୍ନ ମଠରୁ ଆସିଥିବା ସାଧୁସନ୍ଥ ଏବଂ ପଣ୍ଡିତ ବ୍ରାହ୍ମଣ ମାନଙ୍କ ସେବାର୍ଚ୍ଚନା ପରେ ସନାତନ ଧର୍ମ ସମ୍ମିଳନୀ ଆରମ୍ଭ ହୋଇଥିଲା । ଏହି କାର୍ଯ୍ୟକ୍ରମ ରେ କେନ୍ଦ୍ରାପଡ଼ା, ପଟ୍ଟାମୁଣ୍ଡାଇ, ଇନ୍ଦୁପୁର, କୃଷ୍ଣନଗର ଏବଂ ବରୀ ବ୍ଲକର ବିଭିନ୍ନ ପ୍ରାନ୍ତରୁ ଆସିଥିବା ସାଧୁସନ୍ଥ ଏବଂ ପଣ୍ଡିତମାନେ ଅବକ୍ଷୟ ମୁଖି ସନାତନ ଧର୍ମକୁ ପୁନରୁଦ୍ଧାର ଏବଂ ଉନ୍ନତି କଳ୍ପେ ପ୍ରତ୍ୟେକ ସନାତନୀ ହିନ୍ଦୁ ଯତ୍ନବାନ ହେବା ସହିତ ଆମର ଗୀତା, ଭାଗବତ, ରାମାୟଣ, ମହାଭାରତ ପ୍ରଭୃତି ଆଧ୍ୟାତ୍ମିକତା ପୁସ୍ତକ ଗୁଡ଼ିକ ପଢ଼ିବା ସହିତ ଦୈନନ୍ଦିନ ଜୀବନରେ ତାକୁ ପ୍ରୟୋଗ କରିବା ପାଇଁ ସାଧୁସନ୍ଥ ଏବଂ ପଣ୍ଡିତ ମାନେ ପ୍ରବଚନ ମାଧ୍ୟମରେ ଦିଗଦର୍ଶନ ଦେଇଥିଲେ । ଏହି କାର୍ଯ୍ୟକ୍ରମକୁ ମଠାଧିସ ଶ୍ୟାମସୁ୍ଦର ଦାସଜୀ ମହାରାଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ଆଧ୍ୟାତ୍ମିକ କାର୍ଯ୍ୟକ୍ରମରେ ପ୍ରବଚକ ପଣ୍ଡିତ ରତିକାନ୍ତ ତ୍ରିପାଠୀ, ଶ୍ରୀକାନ୍ତ ଦାସଜୀ ମହାରାଜ, ରାକେଶ ଦାସ, ଜନ୍ ପଣ୍ଡା, ସସ୍ମିତା ସାମଲ, ସଞ୍ଜୟ ଧଳ, ଜୟରାମ ନାୟକ, ସତ୍ୟଜିତ ଶତପଥି, ପ୍ରତାପ ଚନ୍ଦ୍ର ସାହୁ, ଅଞ୍ଜନା ଧଳ ପ୍ରଭୃତି ଯୋଗ ଦେଇଥିଲେ । ଏହି କାର୍ଯ୍ୟକ୍ରମକୁ ଶ୍ରୀମଦ୍ ଭାଗବତ ଆଧ୍ୟାତ୍ମିକ ଚେତନା ସେବା ପରିଷଦର ସମସ୍ତ ସଦସ୍ୟଙ୍କ ସହିତ କୃଷ୍ଣଚନ୍ଦ୍ର ଧଳ ଏବଂ ଆନନ୍ଦ ପରିଡ଼ା ପରିଚାଳନା କରିଥିଲେ। ଶେଷରେ ପରିଷଦର ସଭାପତି ଯୁବ ସମାଜସେବୀ ଡ଼ଃ ବିଶ୍ଵନାଥ ତ୍ରିପାଠୀ ଧନ୍ୟବାଦ ଅର୍ପଣ କରିଥିଲେ। ହରିବୋଲ, ହୁଳହୁଳି ସଂକୀର୍ତ୍ତନ ଏବଂ ଜୟ ଜୟ ଧ୍ବନିରେ ସମଗ୍ର ଅଞ୍ଚଳଟି ଆଧ୍ୟାତ୍ମିକମୟ ହୋଇଯାଇଥିଲା ।