11-Jan-2021

(ପ୍ରେରଣା ଖବର ବ୍ୟୁରୋ): ଆଇନ ଆସୁଛି, କାର୍ଯ୍ୟକାରୀ ହେଉନି । ଓଡ଼ିଆ ଭାଷାକୁ ସରକାରୀ ଭାଷା ଭାବେ ସରକାର ଗ୍ରହଣ କରି ଆଇନ ଆଣିଲେ । ସରକାରୀ ଓ ବେସରକାରୀ ସବୁକ୍ଷେତ୍ରରେ ଓଡ଼ିଆ ଭାଷାର ବ୍ୟବହାର ପାଇଁ ଆଇନରେ ବ୍ୟବସ୍ଥା ହେଲା । ଓଡ଼ିଆ ଭାଷାକୁ ପ୍ରୋତ୍ସାହିତ କଲେ ପୁରସ୍କାର, ନିରୁତ୍ସାହିତ କଲେ ଦଣ୍ଡବିଧାନର ବ୍ୟବସ୍ଥା ରହିଲା । ଅଢ଼େଇ ବର୍ଷ ପରେ କିନ୍ତୁ ଅବସ୍ଥା ଯଥା ପୂର୍ବଂ ତଥା ପରଂ । ସରକାରଙ୍କର ଆନ୍ତରିକତା ନାହିଁ କି ନିଷ୍ଠା ମଧ୍ୟ ନାହିଁ । ସରକାରୀ ନଥିପତ୍ରରୁ ରାସ୍ତାଘାଟର ସାଇନ୍‌ବୋର୍ଡ ଯାଏ ସବୁଠି ଓଡ଼ିଆ ଭାଷା ଅବହେଳା ଓ ଅଣଦେଖାର ଶିକାର । ଆମ ରାଜ୍ୟରେ ଆମ ଭାଷାର ଭାଗ୍ୟ ପଥର ତଳେ । ସରକାର କିନ୍ତୁ ପୂରା କୁମ୍ଭକର୍ଣ୍ଣ ନିଦ୍ରାରେ । ଆଇନ କରିଦେଇ ସରକାର ନିଘୋଡ଼ ନିଦରେ ଘୁଙ୍ଗୁ୍‌ଡ଼ି ମାରୁଛନ୍ତି । ଆଇନ କାର୍ଯ୍ୟକାରୀ ହେଲେ କେତେ, ନହେଲେ କେତେ । ସରକାରଙ୍କର କ’ଣ ଯାଇଛି ଯେ  ???
ଓଡ଼ିଆ ଭାଷାରେ ସରକାରୀ ନଥିପତ୍ର କାମ ନକଲେ ଦଣ୍ଡବିଧାନ ହେବ । ଦୋକାନ ବଜାର ସହ ବାଣିଜ୍ୟିକ ପ୍ରତିଷ୍ଠାନର ନାମ ମଧ୍ୟ ଓଡ଼ିଆରେ ନଲେଖିଲେ ଦଣ୍ଡ ମିଳିବ । ଯେଉଁ ଅଧିକାରୀମାନେ ସରକାରୀ କାର୍ଯ୍ୟରେ ଓଡ଼ିଆ ଭାଷାର ବ୍ୟାପକ ବ୍ୟବହାର କରିବେ ସେମାନଙ୍କୁ ପ୍ରୋତ୍ସାହନ ମିଳିବ । ଏ ସଂକ୍ରାନ୍ତରେ ଦୁଇଟି ବିଲ୍‌ ବିଧାନସଭାରେ ପାରିତ ହୋଇ ଆଇନରେ ପରିଣତ ହେଲା । ମାତ୍ର ଆଇନ କେମିତି କାର୍ଯ୍ୟକାରୀ ହେବ କାହାର ଚିନ୍ତା ନାହିଁ । ଶୀତଳଭଣ୍ଡାରରେ ଏ ଆଇନ ସଢୁଛି । ଓଡ଼ିଆ ଭାଷାରେ ସରକାରୀ କାମ ବାଧ୍ୟତାମୂଳକ ଭାବେ କରିବାକୁ ଓଡ଼ିଶା ସରକାରୀ ଭାଷା (ସଂଶୋଧନ) ଆଇନ ହୋଇଛି!!ସରକାର ୧୯୫୪ ଭାଷା ଆଇନ ଧାରା ୪ ପରେ ନୂଆ ଧାରା ଯୋଡ଼ିଛନ୍ତି । ଏ ଆଇନରେ ଥିବା ବ୍ୟବସ୍ଥା ଅନୁସାରେ, ସରକାରୀ ଭାଷା ଓଡ଼ିଆରେ ବ୍ୟାପକ ବ୍ୟବହାର ପାଇଁ ସରକାରୀ କର୍ମଚାରୀ ବା ବିଭାଗଗୁଡ଼ିକୁ ପ୍ରୋତ୍ସାହନ ପ୍ରଦାନ କରାଯିବ । ଖିଲାପ କରୁଥିବା କର୍ମଚାରୀ ଓ ବିଭାଗକୁ ଦଣ୍ଡବିଧାନ କରାଯିବ । ଆମ ରାଜ୍ୟରେ ଥିବା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନର ନାମଫଳକ ମଧ୍ୟ ଓଡ଼ିଆରେ ଲେଖିବାକୁ ବାଧ୍ୟତାମୂଳକ କରାଯାଇଛି । ଏଥିପାଇଁ ସରକାର ଓଡ଼ିଶା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ଅଧିନୟମ ୧୯୫୬ରେ ସଂଶୋଧନ କରିଛନ୍ତି । ଏହି ସଂଶୋଧିତ ଆଇନ ଅନୁସାରେ, ପ୍ରତିଷ୍ଠାନ ସମ୍ମୁଖରେ ଥିବା ନାମଫଳକରେ ପ୍ରତିଷ୍ଠାନର ନାମ ଅନ୍ୟ କୌଣସି ଭାଷାରେ ଲେଖାଯିବାରେ ଆପତ୍ତି ନାହିଁ, କିନ୍ତୁ ଓଡ଼ିଆ ଭାଷାରେ ସ୍ପଷ୍ଟ ଭାବେ ଲେଖାଯିବା ବାଧ୍ୟତାମୂଳକ!! ସରକାରଙ୍କ ଏ ଆଇନ କିନ୍ତୁ ସେଇମିତି ଫରୁଆ ଭିତରେ ରହିଛି । ଏ ଆଇନ ଆଣିଲା ବେଳେ ସରକାର ବେଶ ଆବେଗର ସହ କହିଲେ, ଓଡ଼ିଆ ଭାଷାକୁ ସମୃଦ୍ଧ କରିବୁ । ସରକାରୀ କାର୍ଯ୍ୟ ଓ ପ୍ରଶାସନରେ ଭାଷାର ପ୍ରସାର ବୃଦ୍ଧି ସହ ଭାଷା ସାହିତ୍ୟର ବିକାଶ ପାଇଁ ସରକାର ଏ ନିଷ୍ପତ୍ତି ନେଇଛନ୍ତି । ଜିଲ୍ଲା, ରାଜସ୍ୱ ଡିଭିଜନ ଏବଂ ରାଜ୍ୟସ୍ତରରେ ପ୍ରଶାସନିକ କାମ ଓଡ଼ିଆ ଭାଷାରେ କରାଯିବ । ସରକାରୀ ଚିଠିପତ୍ର ସହ ଆପତ୍ତି ଅଭିଯୋଗର ପତ୍ରାଳାପ ମଧ୍ୟ ଓଡ଼ିଆରେ ହେବ । ବିଡ଼ମ୍ବନା ରାଜ୍ୟ ଶାସନର ପ୍ରାଣକେନ୍ଦ୍ର ଉଭୟ ଲୋକସେବା ଭବନ ଓ ବିଧାନସଭାରେ ପ୍ରାୟ ସମସ୍ତ ଚିଠି ଏବେବି ଇଂରାଜୀ ଭାଷାରେ ହେଉଛି । ବିଧାନସଭାରେ ଅନେକ ବିଭାଗର ସ୍ଥାୟୀ କମିଟିର ରିପୋର୍ଟ ଇଂରାଜୀ ଭାଷାରେ ଉପସ୍ଥାପିତ ହେଉଛି । ବହୁ ବିଚାର ବିଭାଗୀୟ ରିପୋର୍ଟ, ବିଭାଗୀୟ ଖର୍ଚ୍ଚଦାବି, କମିଶନ ରିପୋର୍ଟ, ଅଧ୍ୟାଦେଶ ଆଦି ଓଡିଆ ଭାଷାରେ ଉପସ୍ଥାପିତ ହେଉନାହି । ଯେଉଁ ବିଧାନସଭାରେ ଏ ନୂଆ ଆଇନ ହେଲା, ସେଇ ସଚିବାଳୟ ମଧ୍ୟ ଏ ଆଇନକ୍‌ୁ କାର୍ଯ୍ୟକାରୀ କରିବାକୁ କୁନ୍ଥକୁନ୍ଥ!

   ଉଲ୍ଲେଖଯୋଗ୍ୟ, ୨୦୧୭ ବିଜେଡି ପ୍ରତିଷ୍ଠା ଦିବସରେ ବସିଥିବା ରାଜ୍ୟ କ୍ୟାବିନେଟ୍‌ରେ ନିଷ୍ପତ୍ତି ହୋଇଥିଲା, ଓଡ଼ିଆ ଭାଷାରୁ ଅନ୍ୟ ଭାଷାକୁ ଏବଂ ଅନ୍ୟ ଭାଷାରୁ ଓଡ଼ିଆ ଭାଷାକୁ ଅନୁବାଦକୁ ପ୍ରୋାତ୍ସାହିତ କରାଯିବ । ଓଡ଼ିଆ ଭାଷା, ସାହିତ୍ୟକୁ ଅବିସ୍ମରଣୀୟ କରିବାକୁ ପୁରସ୍କାର ପ୍ରଦାନ କରାଯିବ । ଐତିହାସିକ ଗବେଷଣା, ଶିଶୁ ସାହିତ୍ୟ, ବିଜ୍ଞାନ ପୁସ୍ତକ, ଓଡ଼ିଆ ୱେବସାଇଟ୍‌, ଓଡ଼ିଆ ବ୍ଲଗ୍‌ ଲିଖନ ଆଦିକୁ ପ୍ରୋତ୍ସାହନ ଦେବାକୁ ପୁରସ୍କାର ଦିଆଯିବ । ଓଡ଼ିଆ ସଫ୍ଟୱେୟାର ପ୍ରସ୍ତୁତିରେ ଉତ୍କର୍ଷ ହାସଲ ପାଇଁ ବ୍ୟକ୍ତି ତଥା ଅନୁଷ୍ଠାନମାନଙ୍କୁ ପ୍ରତିବର୍ଷ ପୁରସ୍କୃତ କରାଯିବ!!