26-Dec-2024

ହାଇଦ୍ରାବାଦ ସ୍ଥିତ ପ୍ରବାସୀ ପଶ୍ଚିମ ଓଡିଶାବାସୀ ଙ୍କ ଅଗ୍ରଣୀ ଅନୁଷ୍ଠାନ 'ଓସାକା' ତରଫରୁ "କୋଶଳାଞ୍ଚଳ ଡାଲଖାଇ ପୁରସ୍କାର ଉତ୍ସବ ୨୦୨୪" ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ ଅନ୍ତର୍ଗତ ନୁନିଆପାଲି ଗ୍ରାମ ପଂଚାୟତ ସ୍ଥିତ ସରଧାପାଲି ଗ୍ରାମରେ ଅନୁଷ୍ଠିତ ହୋଇଯାଇଛି। ପଶ୍ଚିମ ଓଡିଶା ର ଗ୍ରାମାଞ୍ଚଳ ର ହଜିଯାଇଥିବା ପ୍ରାଚୀନ ପରମ୍ପରା ଡାଲଖାଇ କୁ ବଂଚେଇବା ପ୍ରୟାସ ସହ ଗ୍ରାମାଞ୍ଚଳ ର କଳାକାର କୁ ପ୍ରୋତ୍ସାହନ ପାଇଁ ଓସାକା ହାଇଦ୍ରାବାଦ ଡାଲଖାଇ ପୁରସ୍କାର ୨୦୨୩ ଠାରୁ

ଆୟୋଜନ କରି ଆସୁଛି। ଏହି ବର୍ଷ ପୁରସ୍କାର ପ୍ରଦାନ କାର୍ଯ୍ୟକ୍ରମ ର ମୁଖ୍ୟ ଅତିଥି ଗୁରୁ ଶ୍ରୀ ଡ଼କ୍ଟର ଘାସିରାମ ମିଶ୍ର ଡାଲଖାଇ ର ମୌଳିକତା ବଜାୟ ରଖିବାକୁ କଳାକାରମାନେ ଚେଷ୍ଟିତ ହେବାକୁ ଅନୁରୋଧ କରିବାସହ ଗବେଷଣା ପାଇଁ ସମସ୍ତଙ୍କର ସହଯୋଗ କାମନା କରିଥିଲେ। ସମ୍ମାନିତ ଅତିଥି ବରିଷ୍ଠ ସାମ୍ବାଦିକ ମନୋରଞ୍ଜନ ଯୋଷୀ ଲୋକ କଳାକାର କୁ ଉତ୍ସାହ ପ୍ରଦାନ ତଥା ଗ୍ରାମାଞ୍ଚଳ ରେ ଆୟୋଜିତ ଓସାକା ର ଏହି କାର୍ଯ୍ୟକ୍ରମ କୁ ଭୁୟସୀ ପ୍ରସଂଶା କରିବା ସହ ଡାଲଖାଇ ଉପରେ ଏକାଡେମୀକ ଆଲୋଚନା ଏବଂ କର୍ମଶାଳା ଆୟୋଜନ ପାଇଁ ଅନୁରୋଧ କରିଥିଲେ।  ଏହି ଅବସରରେ ଓସାକା ତରଫରୁ ପ୍ରସିଦ୍ଧ ଡାଲଖାଇ କଳାକାର ବେଟିଖାଇ ବରିହା ଙ୍କୁ "କୋଶଲ ଡାଲଖାଇ ଦେବୀ" ଉପାଧି ରେ ସମ୍ମାନିତ କରାଯାଇଥିଲା। ଏହି ବର୍ଷ ଡାଲଖାଇ ପ୍ରତିଯୋଗିତାରେ ପ୍ରଥମ ସ୍ଥାନ ପାଇଥିବା ଗଣ୍ଡପାଲି ଜୟ ମା ସମଲେଇ ପୁରୁଣା ଡାଲଖାଇ ପାର୍ଟି,   ଦ୍ୱିତୀୟ ସ୍ଥାନ ପାଇଥିବା  ସରଧାପାଲି ର ଜୟ ମା ଦୁର୍ଗାଦେବୀ ଡାଲଖାଇ ପାର୍ଟି ଏବଂ ଯୁଗ୍ମ ଭାବେ ତୃତୀୟ ସ୍ଥାନ ପାଇଥିବା ବରଗଡ଼ ଜିଲ୍ଲା ପାଇକମାଳ ବ୍ଲକ ଡ଼ୁମେରବାହାଲ ଗ୍ରାମର ଡାଲଖାଇ ଦଳ ଓ ଗଣ୍ଡପାଲି ର ଛେଲିଆପାଟ ଡାଲଖାଇ ଦଳ ଙ୍କୁ ନଗଦ ପୁରସ୍କାର ରାଶି ସହ ମାନପତ୍ର ପ୍ରଦାନ କରାଯାଇଥିଲା।  ଏହି ଅବସରରେ ବରିଷ୍ଠ ଧୁନକେଲ ବାଦକ କଳାକାର ପଦ୍ମନାଭ ବାଗ, ଢୁଳିଆ ବଳରାମ ସୁନା, ନୃତ୍ୟଗୁରୁ ଧନୁ ସାହୁ, ଡାଲଖାଇ କଳାକାର ଦୁଲଣା ବାଗ ଙ୍କୁ ମଧ୍ୟ ସମ୍ମାନିତ କରାଯାଇଥିଲା।  ନିମନ୍ତ୍ରିତ ଅତିଥି ଆଗଲପୁର ବ୍ଲକ ଉପାଧ୍ୟକ୍ଷ୍ୟା ନିରୁପମା ପଧାନ, ନୁନିଆପାଲି ଗ୍ରାମପଞ୍ଚାୟତ ର ସରପଞ୍ଚ ପୁଷ୍ପାଞ୍ଜଳି ସାହୁ, ସମିତି ସଭ୍ୟା ବିଳାସିନୀ ଭୋଇ, ଭରସୁଜା ଗ୍ରାମପଞ୍ଚାୟତ ର ସରପଞ୍ଚ ପ୍ରମିଳା ସାହୁ, ଝାରନୀପାଳୀ ଗ୍ରାମପଞ୍ଚାୟତ ର ସରପଞ୍ଚ ସୁନିତା ସାହୁ,  ସମିତି ସଭ୍ୟ ନରେଶ କୁମାର ସାହୁ, ସମାଜସେବୀ ରାଜୀବ ଭୋଇ, କୋଶଲ ସଂଗ୍ରାମୀ ସୂର୍ଯ୍ୟ ସ୍ୱାଇଁ ଏବଂ ସଂସ୍କୃତି ଗବେଷକ ଭରତ ନାଗ କୋଶଳାଞ୍ଚଳର ଡାଲଖାଇ ର ଉନ୍ନତି ପାଇଁ ନିଜ ନିଜ ମତାମତ ରଖିବା ସହ ଆଗାମୀ ଦିନରେ ସବୁପ୍ରକାର ସହଯୋଗ କରିବାକୁ ପ୍ରକାଶ କରିଥିଲେ। ଏହି କାର୍ଯ୍ୟକ୍ରମ ରେ ଗ୍ରାମାଞ୍ଚଳର ଜୀବନ ଜୀବିକା ଆଧାରିତ ପ୍ରଦର୍ଶନୀ ସହ ସନ୍ଧ୍ୟାକାଳୀନ ସାଂସ୍କୃତିକ କାର୍ଯ୍ୟକ୍ରମ ବେସ ମନଛୁଆଁ ଥିଲା। ସ୍ଥାନୀୟ ସଂଯୋଜକ ତଥା ପୋଡ଼ପାଲି  ସ୍ଥିତ ପଞ୍ଚୁସେବା ସଦନ ର ନିର୍ଦେଶକ ଭରତ ସାହୁ  ଏବଂ ଯୁବ ସଂଗଠକ ଅର୍ଜୁନ କୁମାର ସାହୁ କାର୍ଯ୍ୟକ୍ରମ କୁ ସୁନ୍ଦର ଭାବେ ପରିଚାଳନା କରିଥିଲେ। ରଘୁନାଥ ରଣା, ଅଲେଖ ଡାଙ୍ଗ ଓ ବଳରାମ ମିଶ୍ର ସଭାକାର୍ଯ୍ୟ ପରିଚାଳନାରେ

ସହଯୋଗ କରିଥିଲେ। ଓସାକା ହାଇଦ୍ରାବାଦ ତରଫରୁ ଉପଦେଷ୍ଟା ବୈଜ୍ଞାନିକ ଅଧିକାରୀ ପଦ୍ମନାଭ ପଧାନ ଯୋଗଦେଇ ସମସ୍ତଙ୍କୁ ଧନ୍ୟବାଦ ଦେବାସହ ଆଗାମୀ ଦିନରେ ସମସ୍ତଙ୍କ ସହଯୋଗ ରେ ଓସାକା ଡାଲଖାଇ ଉପରେ କର୍ମଶାଳା ଆୟୋଜନ ସହ ପଶ୍ଚିମ ଓଡିଶାର ଡାଲଖାଇ ନୃତ୍ୟ ବଞ୍ଚାଇରଖିଥିବା ଉପଯୁକ୍ତ ଅଂଚଳରେ ଡାଲଖାଇ ଏକାଡେମୀ ପାଇଁ ସରକାରଙ୍କୁ ଅନୁରୋଧ କରିବ  ବୋଲି ଜଣାଇଥିଲେ।