10-Dec-2024

ବରଗଡ:(ନିରଞ୍ଜନ ତ୍ରିପାଠୀ)-ଧାନ ମଣ୍ଡିରେ ଚାଲିଛି ଦଲାଲ ଓ ମିଲରମାନଙ୍କ ରାଜତ୍ଵ। ଗ୍ରେନ୍ ଏନାଲାଇଜର୍ ମେସିନ ଚାଷୀର ଭଲ ଧାନ କୁ ମଧ୍ୟ ଅଯୋଗ୍ୟ ପ୍ରମାଣିତ କରୁଛି। ଯାହା କଟଣି ଛଟଣି କରିବାରେ  ଦଲାଲ ଓ ତଥା ମିଲରମାନଙ୍କୁ ସାହାଯ୍ୟ  କରୁଛି। ଏପରି ଏକ ନଗ୍ନ ଚିତ୍ର ଦେଖିବାକୁ ମିଳୁଛି ବରଗଡ଼ ଜିଲ୍ଲା ଭଟଲି ବ୍ଲକ ଅନ୍ତର୍ଗତ ସୁଲୁସୁଲିଆ ଧାନ କ୍ରୟକେନ୍ଦ୍ର ରେ। ଗାଁର ଜଣେ ମହିଳା ଚାଷୀ ଅଞ୍ଜଳୀ ସାହୁ,  ସ୍ବା - ଚୁଡାମଣି ସାହୁ ଗତ ୬ ଡିସେମ୍ବର ଶୁକ୍ରବାର ଦିନ ୬୪ ପ୍ୟାକେଟ ଧାନ ମଣ୍ଡିକୁ ଆଣିଥିଲେ। ଚାରି ଦିନ ପର୍ଯ୍ୟନ୍ତ ତାଙ୍କ ଧାନକୁ ବିକ୍ରି କରିବାର କୌଣସି ବ୍ଯବସ୍ଥା କରାଯାଇନଥିଲା। ସେ ବାରମ୍ବାର ମଣ୍ଡିକୁ ଦୌଡିଲା ପରେ ମଧ୍ୟ ମଣ୍ଡି ଅଧିକାରୀ ତାଙ୍କୁ ବେପାରୀଙ୍କ ସହିତ କଥାବାର୍ତ୍ତା କରି ଧାନ ଦେଇଦେବା ପାଇଁ କହିଥିଲେ। ସଂପୃକ୍ତ ଚାଷୀ ଏଥିରେ ରାଜି ହୋଇନଥିଲେ। ସେ ଭଲ ଧାନ ଆଣିଥିବା କହି କଟଣି ଛଟଣି କରିବା ପାଇଁ ମନା କରିଦେଇଥିଲେ। ଏହା ପରେ ଆଜି ମଙ୍ଗଳବାର ଦିନ ୟାଡକୁ ନିୟନ୍ତ୍ରିତ ବଜାର କମିଟିର ସଂପାଦକ ଗୋବିନ୍ଦ ନାଗ , ଯୋଗାଣ ନିରୀକ୍ଷକ ସାନ୍ତାକାର ପ୍ରଧାନ ଆସି ସମସ୍ୟା ବିଷୟରେ ଚାଷୀମାନଙ୍କ ସହ ଆଲୋଚନା କରି ସେହି ଚାଷୀଙ୍କ ଧାନକୁ ଗ୍ରେନ୍ ଏନାଲାଇଜର୍ ମେସିନ ସାହାଯ୍ୟରେ ପରିକ୍ଷା କରିବା ପାଇଁ କହିଥିଲେ। ପ୍ରକାଶ ଥାଉକିଯେ ଗ୍ରେନ୍ ଏନାଲାଇଜର୍ ମେସିନ ଆଜିହିଁ ଏହି ୟାଡ କୁ ଅଣାଯାଇଥିଲା। ସେହି ଚାଷୀର ଧାନକୁ ପରୀକ୍ଷା କଲାପରେ ମେସିନ ଅଯୋଗ୍ୟ ପ୍ରମାଣିତ କଲା। 
    ଏହି ମାର୍କେଡ ୟାଡରେ ଆଜି ପର୍ଯ୍ୟନ୍ତ ମୋଟ ୧୪୬୫ ପାକେଟ  ( ୬୫୧ . ୬୩ କ୍ବିଣ୍ଟାଲ) ଧାନ ବିକ୍ରି ହୋଇ ସାରିଲେଣି। ସେହି ସବୁ ଧାନ ଯେହେତୁ ଦଲାଲଙ୍କ ମାଧ୍ୟମରେ କଟଣି ଛଟଣି ହୋଇ ବିକ୍ରି ହୋଇଛି, ସେଥିପାଇଁ ମେସିନର ଆବଶ୍ୟକତା ପଡିନଥିଲା। ଚାଷୀ ଠିକ ଦର ପାଇବା ପାଇଁ ନିଜେ ମଣ୍ଡିକୁ ଧାନ ଆଣି ବିକ୍ରି କରିବା ପାଇଁ ଚେଷ୍ଟା କଲେ ଏପରି ମେସିନ ଆଣି ସଂପୃକ୍ତ ଅଧିକାରୀମାନେ ଚାଷୀମାନଙ୍କୁ ଭୟଭୀତ କରାଉଛନ୍ତି। 
   ସଂଯୁକ୍ତ ଅଧିକାରୀମାନଙ୍କ ସହ ଚାଷୀ ଆଲୋଚନା କଲା ସମୟରେ ମିଲର ପ୍ରତିନିଧିମାନେ ଚାଷୀମାନଙ୍କୁ ଆକ୍ରମଣ କରିବାର ଚେଷ୍ଟା କରିଥିଲେ। ଏଥିରୁ ସ୍ପଷ୍ଟ ପ୍ରମାଣିତ ହେଉଛି ଯେ ମଣ୍ଡିରେ ବେପାରୀ ଓ ମିଲରମାନଙ୍କ ଦାଦାଗିରୀ ଚାଲିଛି। ନିରୀହ ଚାଷୀ ଶୋଷଣର ଶୀକାର ହେଉଛି। 
   ସୁଲୁସୁଲିଆ ୟାଡରେ ଧାନ ବିକ୍ରି ସମସ୍ୟା ଥିବା ନେଇ ଗାଁର ଚାଷୀମାନେ ଜୟ କିସାନ ଆନ୍ଦୋଳନ ର ଜିଲ୍ଲା ସଭାପତି ସୁଶିଲ କୁମାର ସାହୁ ଏବଂ ସାଧାରଣ ସଂପାଦକ ହର ବଣିଆଁଙ୍କୁ ଜଣାଇଥିଲେ। ଏହି  ଆଲୋଚନା ସମୟରେ  ସରକାରୀ ନିୟମ ଅନୁଯାୟୀ ଧାନ ସଂଗ୍ରହ କରିବା ପାଇଁ ଅଧିକାରୀମାନଙ୍କୁ କହିଥିଲେ ଏବଂ ଚାଷୀ କୌଣସି ଦଲାଲ ମାଧ୍ୟମରେ ଧାନ ବିକ୍ରି ନକରି ନିଜେ  ୟାଡକୁ ଆଣି ବିକ୍ରି କରିବା ପାଇଁ ଆହ୍ୱାନ ଦେଇଥିଲେ।