21-Nov-2024

ବୀରମହାରାଜପୁର, (ବିନୋଦ ପାଣ୍ଡେ ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ସଂଗ୍ରାମପୁର ସରକାରୀ ଉନ୍ନତ ଉଚ୍ଚ ବିଦ୍ୟାଳୟ ରେ ଛାତ୍ରଛାତ୍ରୀ ମାନେ ଧାରଣାରେ ବସିଥିବା ଦେଖିବାକୁ ମିଳିଥିଲା। ଉକ୍ତ ବିଦ୍ୟାଳୟର ସହକାରୀ ଶିକ୍ଷକ ମନୋରଞ୍ଜନ ବାଗଙ୍କ ମେଣ୍ଡିଲିପାଲି ବିଦ୍ୟାଳୟ କୁ ବଦଲି ନିର୍ଦ୍ଦେଶ ହେବାରୁ ସ୍କୁଲ ସମସ୍ତ ଛାତ୍ରଛାତ୍ରୀ ମାନେ ବଦଳି ବାତିଲ ପାଇଁ ସ୍କୁଲ ପରିସରରେ ଧାରଣାରେ ବସି ପ୍ରତିବାଦ କରିଥିଲେ। ଏହି ବିଦ୍ୟାଳୟ ଟି ୧୯୬୪ ରେ ସ୍ଥାପନ ହୋଇଥିବା ବେଳେ ଏଥିରେ ପ୍ରଥମ ରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ରହିଛି। ଏଥିରେ ୩୬୨ ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି। ଏହି ଛାତ୍ରଛାତ୍ରୀ ମାନଙ୍କୁ ଶିକ୍ଷାଦାନ ପାଇଁ ଆଠ ଜଣ ଶିକ୍ଷକ ଦରକାର ରହିଥିବା ବେଳେ ବଦଳି ଶିକ୍ଷକ ଙ୍କୁ ଧରି ପାଞ୍ଚ ଜଣ ରହିଛନ୍ତି। ଶିକ୍ଷକ ବଦଳି ହେବାରୁ ପାଠପଢ଼ା ରେ ବିଭିନ୍ନ ସମସ୍ୟା ହୋଇପାରେ ବୋଲି ଅଭିଭାବକମାନେ ଅଭିଯୋଗ କରିଛନ୍ତି। ଏବଂ ଯେ ପର୍ଯ୍ୟନ୍ତ ଏହି ବିଦ୍ୟାଳୟରୁ ଆଗରୁ ଥିବା ଶିକ୍ଷକ ରାଜେଶ ମେଣ୍ଡେଲି କୁ ଫେରାଇ ଆଣିବା ଓ ବଦଲି ଆଦେଶ ଥିବା ଶିକ୍ଷକଙ୍କର ବାତିଲ କରାଯିବ ସେ ପର୍ଯ୍ୟନ୍ତ ଧାରଣା ଦିଆଯିବ ବୋଲି ଅଭିଭାବକ ମାନେ କହିଛନ୍ତି। ପରିଚାଳନା କମିଟି ସଭାପତି ଶେଷଦେବ ଗାଇଗୋରିଆ, ସମ୍ପାଦକ କଲ୍ୟାଣୀ ଜେନା ଙ୍କ ସହ ସମସ୍ତ ଅଭିଭାବକ ଧାରଣ ସ୍ଥଲରେ ସାମିଲ ହୋଇଥିଲେ।ଖବର ପାଇ ଧାରଣା ସ୍ଥଳରେ ଏବିଇଓ ବାଞ୍ଛାନିଧି ମିଶ୍ର, ସିଆରସିସି ଅନାଦି ଜଗଦଲା ପହଞ୍ଚି ଅଭିଭାବକ ମାନଙ୍କ ସହ ସମାଧାନ ପାଇଁ କଥାବାର୍ତ୍ତା ହୋଇଥିଲେ। ଜିଲ୍ଲା ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାକୁ ଦାବି ହେଉଛି।