17-Nov-2024

ବରଗଡ(ପ୍ରେରଣାଖବର): ଲାଭ ନଥାଇ ବେପାର କରୁଥିବା ମଣିଷ ହିଁ କବିଟିଏ। ଅନ୍ତର ବେଦନା ହିଁ  କବିତା ହୋଇ ଝରିଯାଏ କଲମ ମୁନରେ।କ୍ଷତ ସବୁ କବିତା ହୋଇ ନ ପାରନ୍ତି,ମାତ୍ର ପ୍ରତିଟି କବିତା ପଶ୍ଚାତପଦରେ ଥାଏ ଏକ କେବେ ବି ଶୁଖୁ ନ ଥିବା କ୍ଷତ।ଯାହା ଚିରକାଳ ଦୁଃଖ ହିଁ ଦେଇଥାଏ ଓ ସେଇ ଦୁଃଖଦ ଅନୁଭୂତି ହିଁ ସବୁକାଳେ କବିତା  ବୋଲି କହିଛନ୍ତି କବି ଦିବ୍ୟକିଶୋର ଦେବତା।

ସୃଷ୍ଟି ପ୍ରକାଶନୀ ଦ୍ବାରା ପ୍ରକାଶିତ  କବି ଜ୍ଯୋତିରଞ୍ଜନ ମିଶ୍ରଙ୍କ  କୋରୋନା କାଳର ଅନୁଭୂତି ବ୍ୟଞ୍ଜକ କବିତା "ଏକାନ୍ତବାସ" ର ଲୋକାର୍ପଣ ସମାରୋହ ଅବସରରେ ମୁଖ୍ଯଅତିଥି ଭାବରେ ଯୋଗଦେଇ ସେ ଏହି ମତ ଦେଇଛନ୍ତି।ବରଗଡ ବାପୁଜୀ ସ୍ବତନ୍ତ୍ର ବିଦ୍ୟାଳୟର ପରିସରରେ ଅନୁଷ୍ଠିତ ଏହି ଲୋକାର୍ପଣ ସମାରୋହରେ  ସମ୍ମାନିତ ଅତିଥି ଭାବରେ  କବି ତଥା ବରିଷ୍ଠ ସାମ୍ବାଦିକ ସନ୍ଦୀପ କୁମାର କୁଅଁର ଯୋଗଦେଇ  ଭାବଗତ ସ୍ତରରେ କବିତା ବା ସାହିତ୍ୟର ପାଠକ କମିଯାଉଥିବାରୁ, ଲୋକଙ୍କ ଭିତରେ ସୃଜନଶୀଳ ଭାବ କମିଯାଉଥିବାରୁ ଉଦବେଗ ପ୍ରକାଶ କରିଥିଲେ।ସୃଷ୍ଟି ପ୍ରକାଶନୀ ମୁଖ୍ଯ  କବି ଗାଳ୍ପିକ ରୋହିତ ଦାଶଙ୍କ ସଭା ପରିଚାଳନାରେ ଅନୁଷ୍ଠିତ ଏହି ସମାରୋହରେ କବି ରତ୍ନମୟ ତ୍ରିପାଠୀ କବିତା ସଂକଳନର ସମୀକ୍ଷା କରିଥିବା ବେଳେ ବିଶିଷ୍ଟ କଣ୍ଠଶିଳ୍ପୀ ଅଶୋକ ପଶାୟତ  ପ୍ରାରମ୍ଭିକ ସଂଗୀତ ପରିବେଷଣ କରିଥିଲେ। ଅବସରପ୍ରାପ୍ତ ଅଧ୍ୟକ୍ଷ ଡକ୍ଟର ଅଶୋକ ମହାପାତ୍ର  ଓ ଡକ୍ଟର ଶୁଭେନ୍ଦୁ ସୁଧା ଷଢଙ୍ଗୀ ପ୍ରକାଶିତ ସଂକଳନ "ଏକାନ୍ତବାସ" ରୁ କବିତା ଆବୃତ୍ତି କରିଥିଲେ। "ଏକାନ୍ତବାସ" ର କବି ଜ୍ଯୋତିରଞ୍ଜନ ମିଶ୍ର ଲେଖକୀୟ ବକ୍ତବ୍ଯ ପ୍ରଦାନ କରିଥିବା ବେଳେ ଶେଷରେ ସୁକୋମଳ ଦାଶ ଧନ୍ଯବାଦ ଅର୍ପଣ କରି ଥିଲେ।ଅନ୍ୟମାନଙ୍କ ମଧ୍ଯରେ ଡକ୍ଟର ଗୋବର୍ଦ୍ଧନ ସାହୁ, କବିତା ମେହେର,ଡକ୍ଟର ତପସ୍ବିନୀ ଗୁରୁ,ସଂଗୀତା ରଥ, ସଂଗୀତା ପଣ୍ଡା ଷଢଙ୍ଗୀ ଓ ବହୁ କବିଲେଖକ ଉପସ୍ଥିତ ଥିଲେ।