10-Oct-2024

ବଲାଙ୍ଗୀର(ପ୍ରେରଣା ଖବର): ସାମ୍ପ୍ରତିକ ମଣିଷ ଜୀବନ ଏକ ଦୁଃସମୟରେ ତଥା ବିପଦରେ ଯିବାକୁ ଲାଗିଛି। ସେଇ ବିପଥଗାମୀଙ୍କୁ ସଠିକ ପଥ ନିର୍ଦ୍ଦେଶ ସହ ମାନବସମାଜକୁ  ଉଚିତ ଦିଶା ନିର୍ଦେଶ  ଆଜିର ଲେଖକମାନଙ୍କ  କର୍ତ୍ତବ୍ଯ। ତେବେ ଉଚିତ ସାହିତ୍ଯ ହିଁ ସମାଜକୁ ପଥ ପ୍ରଦର୍ଶନ କରିବା ସହ  ସୁସ୍ଥ ସମାଜଗଠନ ପାଇଁ ଅନ୍ବେଷୀ  ହୋଇପାରେ। ବେଦବିଦ୍ବାନ ସାରସ୍ବତ ସାଧକ ବ୍ରଜବିହାରୀ ଥିଲେ ସମାଜ ଅଭିମୁଖୀ ମଣିଷ। ତାଙ୍କର ବହୁ ପାଣ୍ଡୁଲିପି ଅପ୍ରକାଶିତ। ପ୍ରକାଶିତ ପୁସ୍ତକ ଆଲୋଚନାର ଆଧାର ହୋଇପାରିଲେ ତାହା ସମାଜ ପାଇଁ ଏକ ନୂତନ ଦିଗଦର୍ଶନ ଦେଇପାରିବ  ବୋଲି  ଆଜି ବଲାଙ୍ଗୀର ସାମ୍ବାଦିକ ଭବନ ଠାରେ ବେଦବିଦ୍ବାନ ସାରସ୍ବତ ସାଧକ  ବ୍ରଜବିହାରୀଙ୍କ ୧୦୫ ତମ ଜନ୍ମ ଜୟନ୍ତୀ ଅବସରରେ ମତଦେଇଛନ୍ତି  ବହୁ ବକ୍ତା। ଆଞ୍ଚଳିକ ସମ୍ବାଦର ପ୍ରାୟୋଜନରେ  ସ୍ରୋତସ୍ବତୀ ପ୍ରକାଶନୀ ଦ୍ବାରା ଆୟୋଜିତ  ଏହି ଜନ୍ମଜୟନ୍ତୀ  ଓ ଗବେଷକ ସନ୍ଦୀପ କୁମାର କୁଅଁରଙ୍କ ଗବେଷଣାତ୍ମକ ପୁସ୍ତକ "ଔପନ୍ୟାସିକ ବ୍ରଜବିହାରୀ: ଏକ ଅନୁଶୀଳନ" ର ପାଠକାର୍ପଣ  ଅବସରରେ  ଏହି ମତପ୍ରକାଶ ପାଇଛି। ସୌମ୍ୟା ମଧୁପର୍ଣ୍ଣା  ତ୍ରିପାଠୀଙ୍କ ମନୋଜ୍ଞ ସଂଯୋଜନାରେ ଡକ୍ଟର  ସଂଜୟ କୁମାର ମିଶ୍ରଙ୍କ  ସଭାପତିତ୍ବରେ  ଅନୁଷ୍ଠିତ ଏହି ଜନ୍ମଜୟନ୍ତୀ ପାଳନ ଓ ପୁସ୍ତକ ପାଠକାର୍ପଣ ସମାରୋହରେ ମୁଖ୍ଯ ଅତିଥି ଭାବରେ ବିଶିଷ୍ଟ  ସାରସ୍ବତ ସାଧକ ଭାଷାବିତ୍ ପଦ୍ମଶ୍ରୀ ନରସିଂହ ପ୍ରସାଦ ଗୁରୁ, ବରେଣ୍ଯ ଅତିଥି ଭାବରେ ପ୍ରଖ୍ୟାତ ନାଟ୍ୟକାର ନିର୍ଦ୍ଦେଶକ, ଲେଖକ ନାଟ୍ୟଭୂଷଣ ଜଗଦାନନ୍ଦ ଛୁରିଆ ଓ ବ୍ରଜବିହାରୀ ସାହିତ୍ଯ  ବିମୁଗ୍ଧ ପାଠକ କବି ଆର୍ତ୍ତତ୍ରାଣ ବାବୁ ଯୋଗ ଦେଇ "ଔପନ୍ୟାସିକ ବ୍ରଜବିହାରୀ: ଏକ ଅନୁଶୀଳନ" ପୁସ୍ତକକୁ ପାଠକାର୍ପଣ କରି ବ୍ରଜବିହାରୀ ସାହିତ୍ଯର ଏପରି ଆଲୋଚନା କରାଯାଇ ପାରିଲେ ଜ୍ଞାନର ତୁଙ୍ଗ ଶିଖର ବ୍ରଜବିହାରୀ ସାହିତ୍ଯ ଜଗତର ମଙ୍ଗଳକାରୀ ହୋଇପାରିବ ଓ ସମାଜର  ଉପକାର ହେବ ବୋଲି ବକ୍ତବ୍ଯ ପ୍ରଦାନ କରିଥିଲେ। ମୁଖ୍ଯ ଅତିଥି ପଦ୍ମଶ୍ରୀ ନରସିଂହ ପ୍ରସାଦ ଗୁରୁ ବ୍ରଜବିହାରୀଙ୍କ ସହ ତାଙ୍କର ଘନିଷ୍ଠତା ସମୟର ସ୍ମୃତିଚାରଣ କରିଥିଲେ l ପ୍ରାରମ୍ଭରେ  ଦେବୀ ସମଲେଶ୍ବରୀଙ୍କ ପୂଜାର୍ଚନା ଓ ବ୍ରଜବିହାରୀଙ୍କୁ ପୁଷ୍ପ ଅର୍ଘ୍ୟ ପ୍ରଦାନ ପରେ ଅତିଥି ପରିଚୟ ଓ ସ୍ବାଗତ ଭାଷଣ ଦେଇ ଥିଲେ ସାମ୍ବାଦିକ ବୀରେନ୍ଦ୍ର କୁମାର ଝାଙ୍କର। ଗବେଷକ  ଶ୍ରୀ କୁଅଁର ପୁସ୍ତକ ପ୍ରକାଶନ ଓ ପାଠକୀୟ ଆବଶ୍ୟକତା ସଂପର୍କରେ ବକ୍ତବ୍ଯ ପ୍ରଦାନ କରିଥିବା ବେଳେ  ଧନ୍ୟବାଦ ଅର୍ପଣ କରିଥିଲେ କବି ଜ୍ଯୋତିରଞ୍ଜନ ମିଶ୍ର। କବି ନବୀନ ବିଶ୍ବବନ୍ଧୁ, ଶିକ୍ଷକ  ରଂଜିତ ମିଶ୍ର, କବି ସୁଜିତ ଶତପଥୀ, ଡକ୍ଟର ଜଗନ୍ନାଥ ସାହୁ, ଡକ୍ଟର କୌତୁକ ପନ୍ଦର, ଅରୁଣ ଖୁଆସ, ପଞ୍ଚାନନ ମିଶ୍ର, ଅଭିଜିତ ମେର୍ଲି  ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।