10-Oct-2024

ବରଗଡ଼/ବିଜେପୁର:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ବିଜେପୁର ସହର ଶାରଦୀୟ ନବଦୁର୍ଗା ପୂଜା ପାଇଁ ଚଳଚଞ୍ଚଳ ହୋଇ ଉଠିଛି। ପ୍ରତ୍ୟେହ ରୀତିନୀତି ସହକାରେ ପୂଜା, ଚଣ୍ଡିପାଠ,ହୋମ ଲାଗିରହିଛି। ଶଙ୍ଖ ଘଣ୍ଟ ପୁରୋହିତଙ୍କ ବେଦମନ୍ତ୍ର ପାଠ, ସୁଗନ୍ଧିତ ଧୂପ ଦୀପ ର ମହମହ ବାସ୍ନାରେ ଏକ ଅପୂର୍ବ ଭାବମୟ ପରିବେଶ ସୃଷ୍ଟି ହେଉଛି।ଗୁରୁବାର ମାଁ ଦୁର୍ଗା କାଳରାତ୍ରୀ ବେଶରେ ପୂଜା ପାଇଥିଲେ। ବିଜେପୁର ନିର୍ବାଚନ ମଣ୍ଡଳୀର ମାନ୍ୟବର ବିଧାୟକ ତଥା ଜମିଦାର ସନତ କୁମାର ଗଡତୀୟା କର୍ତ୍ତା ଦାୟିତ୍ୱ ତୁଲାଇଥିବା ବେଳେ ଚଣ୍ଡିପାଠକ ରାଜ ପୁରୋହିତ କିଶୋର ଚନ୍ଦ୍ର ପୂଜାରୀ, ପୁସ୍ତକାଚାର୍ଯ୍ୟ ସୁରେନ୍ଦ୍ର ମହାପାତ୍ର ପ୍ରମୁଖ ପୂଜା କର୍ମ ନିଷ୍ଠା ସହକାରେ ସମ୍ପାଦନ କରୁଛନ୍ତି।

ପ୍ରତ୍ୟହ ହୋମଯଜ୍ଞ ରେ କର୍ତ୍ତା ଶ୍ରୀଯୁକ୍ତ ଗଡତୀୟାଙ୍କ ସହ ସରୋଜ ସାହୁ, ସୁବ୍ରତ ରଥ, ପାଣ୍ଡବ ପଧାନ, ପ୍ରେମାନନ୍ଦ ମହାପାତ୍ର, ଗୈାରାଙ୍ଗ ପଧାନ, ନରସିଂହ ସାହୁ ସମାପନ କରିବା ଦେଖିବାକୁ ମିଳୁଛି। ଆଜି କାଳରାତ୍ରୀ ପୂଜା କାର୍ଯ୍ୟକ୍ରମରେ ବରଗଡ଼ ସାଂସଦ ପ୍ରଦୀପ ପୁରୋହିତ ଏବଂ ବରଗଡ଼ ପୁରୋହିତ ନର୍ସିଂ ହୋମର ପରିଚାଳକ ଡ଼ା ରାମକୃଷ୍ଣ ପୁରୋହିତ ଯୋଗଦାନ କରି ମାଁଙ୍କ ଆଶିଷ ଭିକ୍ଷା କରିଥିଲେ। ଏଅବସରରେ ପ୍ରତ୍ୟହ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେଉଛି। ଆଜି ରାତିରେ ଲୋକଙ୍କ ମନୋରଞ୍ଜନ ପାଇଁ ଲାସ୍ୟ ଡେନ୍ସ ଏକାଡେମୀ କଟକ,ରାବଣ ରାଜ କାର୍ଯ୍ୟକ୍ରମ ଏବଂ ଶ୍ରୀକ୍ଷେତ୍ର ଗଣନାଟ୍ୟ ଜଗତସିଂହପୁର ଏମିତି ସ୍ତ୍ରୀ କୁ ଶହେ ସଲାମ ନାଟକ ମଞ୍ଚସ୍ଥ କରିବା କାର୍ଯ୍ୟକ୍ରମ ରହିଛି। ଆଜି ବ୍ରହ୍ମାଙ୍କ ଠାରୁ ବର ପାଇ ରାବଣ ଭୂମିକାରେ ଅବତୀଣ୍ଣ କରି ଥିବା ଗୋଲାପ ଚନ୍ଦ୍ର ଦାସ ଏବଂ ତାଙ୍କ କଳାକାର ବୃନ୍ଦ ନଗର ଭ୍ରମଣ କରିଥିଲେ। ତାଙ୍କ ଅଟହାସ୍ୟରେ ମେଦିନୀ କମ୍ପମାନ ହୋଇ ପଡ଼ିଥିଲା।