22-Aug-2024

ସିନ୍ଧେକେଲା(ଅନୀଲ କୁମାର ତ୍ରିପାଠୀ):  ବଙ୍ଗୋମୁଣ୍ଡା ବ୍ଲକ ସିନ୍ଧେକେଲା ଏକ ମିନି ଟାଉନ ଭାବେ ପରିଚିତ। ସେଥିପାଇଁ ତ ବଙ୍ଗୋମୁଣ୍ଡା ବ୍ଲକର ମୁଖ୍ୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସିନ୍ଧେକେଲା ରେ ଅଛି । ଏହାସହ ପୋଲିସ ଷ୍ଟେସନ , ପ୍ରାଣୀ ଧନ ଚିକିତ୍ସାଳୟ , ବ୍ୟାଙ୍କ ଏମିତି ଅନେକ ସରକାରୀ ବେ ସରକାରୀ ଅନୁଷ୍ଠାନ ରହିଛି ସିନ୍ଧେକେଲା ରେ । ଦିନେ ଯୋଉ ଗାଁ ର ପିଲାମାନେ ସେବେଳର ଶିକ୍ଷା ବ୍ୟବସ୍ଥା ରେ ଶିକ୍ଷା ପାଇ ଆମେରିକା ଓ୍ବାଲ୍ଡ ବ୍ୟାଙ୍କ ର ସିନିଅର ଇକୋନୋମିଷ୍ଟ,  ଭାରତୀୟ ରିଜର୍ଭ ବ୍ୟାଙ୍କ, ପ୍ରଶାସନିକ ଅଧିକାରୀ, ଆଇଆଇଟି  କେତେ ଯେ ସିଏ , ଏମବିଏ, ଶିକ୍ଷକ, ଇଞ୍ଜିନିୟର, ବୈଜ୍ଞାନିକ, ଡକ୍ଟର, ଓକିଲ ଏମିତି ଅନେକ କିଛି ପଦପଦବୀ ମଣ୍ଡନ କରିବାରେ ସଫଳ ହୋଇଛନ୍ତି। ହେଲେ ବର୍ତ୍ତମାନ ର ସବୁଠାରୁ ବଡ ବିଡ଼ମ୍ବନା ହେଉଛି ଏହି ମିନି ଟାଉନ ର ଶିକ୍ଷା ବ୍ୟବସ୍ଥା। ଏବଂ ଏହି ଶିକ୍ଷା ବ୍ୟବସ୍ଥା ରେ ଠିକା କାମ ପାଇଁ ସମସ୍ତ ଆଦର୍ଶବାଦକୁ ଜଳାଞ୍ଜଳି ଦେଇ ଦେଇ ଥିବା ପଲ୍ଲୀଶ୍ରି ନୋଡାଲ ହାଇସ୍କୁଲ ରେ ପ୍ରମାଣିତ ହୋଇସାରିଛି। ତେବେ ଆଜି ଆମେ କହୁଛୁ ପଲ୍ଲୀଶ୍ରି ହାଇସ୍କୁଲ ନିକଟରେ ଥିବା ପ୍ରାଇମେରୀ ସ୍କୁଲର କଥା। କିଛି ଦିନ ତଳେ ଆମେ ଦେଖାଇ ଥିଲୁ ମାତ୍ର ତିନି ମାସ ତଳେ ହସ୍ତାନ୍ତର କରିଥିବା ୮ ଲକ୍ଷ ଟଙ୍କା ବ୍ୟୟରେ ଗୋଟିଏ ମାତ୍ର ଶ୍ରେଣୀ କୋଠରୀ ପାଣି ଘେରରେ ରହିଥିବା ବେଳେ ଶ୍ରେଣୀ କୋଠରୀ ର କାନ୍ଥ ମାନଙ୍କରେ ପାଣି ସିପେଜ ହେଉଥିବା ଦେଖିବାକୁ ମିଳିଥିଲା। କାମ ତଦାରଖ ଦାୟିତ୍ଵରେ ଥିବା ଜେଇ ବି ମାନିଥିଲେ ଯେ ସେ ସମୟରେ କାର୍ଯ୍ୟ ବ୍ୟସ୍ତତା ଥିଲା। ଖବର ପରିବେଷଣ ପରେ ଏକ ନାଳ ତିଆରି କରି ପାଣି ନିଷ୍କାସନ କରାଯାଇଥିଲା। ସେହି ପ୍ରାଇମେରୀ ସ୍କୁଲରେ ଏବେ ଚାରୋଟି କୋଠରୀ ରେ ୮ଟି କ୍ଲାସ ର ଛାତ୍ରଛାତ୍ରୀ ପାଠ ପଢ଼ୁଥିବା ଦେଖିବାକୁ ମିଳିଛି। ଗୋଟିଏ ପୁରୁଣା କୋଠା କୁ ବି ବ୍ୟବହାର କରାଯାଉଛି। ଏହାକୁ ମିଶାଇ ୫ ଟି ଶ୍ରେଣୀ କୋଠରୀ କୁହାଯାଇପାରେ। ଶିକ୍ଷକ, ଶିକ୍ଷୟିତ୍ରୀ କହିଲେ ଆଗରୁ ଥିଲେ ୧୪ ଏବେ ଆଠଟି ଶ୍ରେଣୀର ୩୯୧ ଛାତ୍ରଛାତ୍ରୀ ଙ୍କ ପାଇଁ ୭ ଶିକ୍ଷକ ରେ ଚାଳିଛି ଶିକ୍ଷାଦାନ। ଗୋଟିଏ ପଟେ ସରକାର ଶିକ୍ଷା ବ୍ୟବସ୍ଥା କୁ ସୁଦୃଢ କରିବା ପାଇଁ ଯୋଜନା ଉପରେ ଯୋଜନା ତିଆରି କରୁଛନ୍ତି। ହେଲେ କିଛି ଲାଭ ଖୋର ଯନ୍ତ୍ରୀ, ଠିକାଦାର ଓ ପ୍ରଶାସନିକ ଅଧିକାରୀ ମାନଙ୍କ ପାଇଁ ଯୋଉ ସ୍କୁଲ ରେ ଶ୍ରେଣୀ କୋଠରୀ ଦରକାର ଯୋଉ ସ୍କୁଲକୁ ଶିକ୍ଷକ ଶିକ୍ଷୟିତ୍ରୀ ଦରକାର ସେହି ସ୍କୁଲରେ କାମ କରାଯାଉନାହିଁ। ସେହି ସ୍କୁଲ ମାନଙ୍କରୁ ଓଲଟା ଶିକ୍ଷକ ଶିକ୍ଷୟିତ୍ରୀ ମାନଙ୍କୁ ଅନ୍ୟତ୍ର ବଦଳି କରି ଦିଆଯାଉଛି। ଫଳରେ ସରକାରୀ ସ୍କୁଲ ରେ ପାଠ ନ ପଢ଼ାଇ ପ୍ରାଇଭେଟ୍ ସ୍କୁଲ ମାନଙ୍କରେ ପାଠ ପଢ଼ାଇବା ପାଇଁ ଲୋକେ ଏକରକମ ବାଧ୍ୟ

ହେଉଛନ୍ତି। ପ୍ରକାଶ ଯୋଗ୍ୟ ଯେ ପ୍ରତିଦିନ ସିନ୍ଧେକେଲା ରୁ ଟିଟିଲାଗଡ଼, କଣ୍ଟାବାଞ୍ଜି ରେ ଥିବା ପ୍ରାଇଭେଟ୍ ସ୍କୁଲ ମାନଙ୍କରେ ପାଠପଢିବାକୁ ଶହଶହ କୁନିକୁନି ଛାତ୍ରଛାତ୍ରୀ ଯାଇଥାନ୍ତି। ତେଣୁ ପ୍ରଶାସନିକ ଅଧିକାରୀ ମାନେ ଏ ଉପରେ ନଜର ପକେଇ ଆନୁସଙ୍ଗିକ ସୁବ୍ୟବସ୍ଥା କଲେ ସିନ୍ଧେକେଲା ଅଞ୍ଚଳର ସମସ୍ତ ଛାତ୍ରଛାତ୍ରୀ ଉପକୃତ ହୋଇପାରିବେ। ତେଣୁ ପ୍ରଶାସନ ତୁରନ୍ତ ପଦକ୍ଷେପ ନେବାକୁ ଲୋକେ ଦାବି କରିଛନ୍ତି।