31-Jul-2024

ଡୁଙ୍ଗୁରିପାଲ(ଅରବିନ୍ଦ ମିଶ୍ର) ଡୁଙ୍ଗୁରିପାଲି ବ୍ଲକ କାର୍ଯ୍ୟାଳୟ ପରିସର ତଥା ବିଡିଓଙ୍କ ସରକାରୀ ବାସଭବନ ସମ୍ମୁଖରେ ଇଚ୍ଛାପୁର ସରପଞ୍ଚଙ୍କୁ ଭୁଜାଲିରେ ଆକ୍ରମଣ କରାଯାଇଛି । ମିଳିଥିବା ସୂଚନା ଅନୁସାରେ ଆଜି ଅପରାହ୍ନ ୪ଟା ପାଖାପାଖି ସରପଞ୍ଚ ପ୍ରଶାନ୍ତ ସାହୁ (୫୩) କୌଣସି କାମରେ ଡୁଙ୍ଗୁରିପାଲି  ବ୍ଲକ କାର୍ଯ୍ୟାଳୟକୁ ତାଙ୍କର କାରରେ ଆସିଥିଲେ । କାମସାରି ବ୍ଲକ କାର୍ଯ୍ୟାଳୟରୁ  ନିଜେ କାର ଚଳାଇ ବାହାରି ଥିଲେ । ଅନ୍ୟ ସିଟରେ ସାଥିରେ ଥିବା ଜଣେ ବ୍ୟକ୍ତି ବସିଥିଲେ ।  ବ୍ଲକ କାର୍ଯ୍ୟାଳୟ ଠାରୁ ପ୍ରାୟ ୫୦ ମିଟର ଦୂରରେ ବିଡିଓଙ୍କ ସରକାରୀ ବାସ ଭବନ ରହିଛି ।  ପ୍ରଶାନ୍ତଙ୍କ କହିବା ଅନୁସାରେ କାରରେ ସେ ଯାଉଥିବା ବେଳେ  ବିପରୀତ ଦିଗରୁ ଅନ୍ୟ ଏକ କାର ଗାଡିରେ ୪ରୁ ପାଞ୍ଚ ଜଣ ବ୍ୟକ୍ତି ଆସୁଥିଲେ ।ତାଙ୍କ କାରକୁ ଦେଖି ସେମାନେ  ମଝିରେ ଗାଡି ରଖି ଅଟକାଇଥିଲେ ।  ସଙ୍ଗେ ସଙ୍ଗେ ଜଣେ ଏକ ଠେଙ୍ଗାରେ ଗାଡିର ଚାଳକ ପାଶ୍ୱର୍ର କାଚକୁ ଭାଙ୍ଗି ଦେଇଥିଲା । ଅନ୍ୟ ଜଣେ ଏକ ଭୁଜାଲିରେ ଆକ୍ରମଣ କରିବାକୁ ଉଦ୍ୟମ କରିବା ବେଳେ ସେଥିରୁ ବର୍ତ୍ତିବା ପାଇଁ ଗାଡିରୁ ବାହାରି ବିଡିଓଙ୍କ ସରକାରୀ ବାସ ଭବନ ଭିତରକୁ ପଶି ଯିବାକୁ ଉଦ୍ୟମ କରିଥିଲେ । ଏହି ସମୟରେ ଦୁର୍ବୁର୍ତ୍ତମାନେ  ଭୁଜାଲିରେ ମୁଣ୍ଡକୁ ଆକ୍ରମଣ କରିବା ବେଳେ ସେ ହାତକୁ ଦେଖାଇ ପ୍ରତିରୋଧ କରିଥିଲେ । ଭୁଜାଲି ମାଡରେ  ମୁଣ୍ଡରେ କ୍ଷତ ହୋଇ ଥିବା ବେଳେ ବାମ ହାତ କହୁଣି ଉପରେ ଗଭୀର ଚୋଟ ଲାଗି ଥିଲା । ଫଳରେ  ହାତର ବଡ ଅଂଶ କଟି ଯିବା

ସହ ଭେନ ଗୁଡିକ ମଧ୍ୟ କଟି ଯାଇ ଥିବା ଜଣାଯାଏ । ବାମ ହାତର ଆଙ୍ଗୁଠି ଗୁଡିରେ ମଧ୍ୟ କଟି ଯାଇଥିବାରୁ ଷ୍ଟିଜ କରାଯାଇଛି । ଅବସ୍ଥା ଗୁରୁତର ଥିବାରୁ ତାଙ୍କୁ ଆମ୍ବୁଲାନ୍ସ ଯୋଗେ ବୁର୍ଲା ସ୍ଥାନାନ୍ତର କରାଯାଇଛି । ଖବର ପାଇ ଡୁଙ୍ଗୁରିପାଲି ପୋଲିସ ଡାକ୍ତରଖାନାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଆକ୍ରମଣକାରୀଙ୍କୁ ସେ ଚିହ୍ନିଥିବା ସେ ପୋଲିସକୁ ସୂଚନା ଦେଇଛନ୍ତି । ଡାକ୍ତରଖାନାରେ ବିଭିନ୍ନ ପଞ୍ଚାୟତର ସରପଞ୍ଚ, ସମିତି ସଭ୍ୟମାନେ ପହଞ୍ଚିଥିଲେ । ସେଠାରେ   ଭିତରେ ଭିତରେ ଉତ୍ତେଜନା ମଧ୍ୟ ଦେଖା ଦେଇଥିଲା । ବ୍ଲକ ପରିସରରେ ଏହି ଘଟଣାକୁ ନେଇ କର୍ମଚାରୀ ଏବଂ  ବ୍ଲକ କଲୋନୀରେ ଆତଙ୍କ ଦେଖା ଦେଇଛି । ବ୍ଲକ କାର୍ଯ୍ୟାଳୟ ପରିସରରେ ଏଭଳି ଆକ୍ରମଣ ପ୍ରଥମ ହୋଇଥିବା ବେଳେ ପ୍ରାୟ ଆଠ ବର୍ଷ ତଳେ ଏକ ବ୍ୟକ୍ତି  ଜଣେ ପିଇଓଙ୍କୁ ଲକ୍ଷ୍ୟ କରି ଗୁଳିମାଡ କରିଥିଲା ।  ସେତେବେଳେ  ଘଟଣାଟି ମଧ୍ୟ ଚାଞ୍ଚଲ୍ୟ ଖେଳି ଯାଇଥିଲା ।  ପୋଲିସ ଘଟଣାକୁ ଗୁରୁତର ସହ ନେଇ ତଦନ୍ତ ଆରମ୍ଭ କରିଛି । ଅଭିଯୁକ୍ତ ମାନଙ୍କୁ ଶିଘ୍ର ଧରାଯିବ ବୋଲି ଥାନାଧିକାରୀ ସତ୍ୟନାରାୟଣ ପଧାନ ପ୍ରକାଶ କରିଛନ୍ତି ।  ତଦନ୍ତରେ ବାଧା ସୃଷ୍ଟି ହେବା ନେଇ ସେମାନଙ୍କ ପରିଚୟ ଗୋପନ ରଖାଯାଇଥିବା ପୁଲିସ ସୂତ୍ରରୁ ପ୍ରକାଶ । ଘଟଣା ସ୍ଥଳରେ ଆକ୍ରମଣକାରୀଙ୍କ ଚପଳ ପଡି ରହିଥିବା ବେଳେ ବିଡିଓଙ୍କ ଫାଟକ କବାଟରେ ରକ୍ତ ଛିଟା ଲାଗି ରହିଛି ।