30-Jul-2024

କଣ୍ଟାମାଳ, (ଜୟ କୁମାର ମହାରଣା )
ଲୋକଙ୍କ ଯାତାୟତର ସୁବିଧା ନିମନ୍ତେ ସରକାରୀ ସ୍ତରରେ ପ୍ରୟାସ କରାଯାଉଥିଲେ ହେଁ ପ୍ରଶାସନିକ ଦୂର ଦୃଷ୍ଟିର ଅଭାବ ହେଉ ଅଥବା ରାଜନୈତିକ ଇଚ୍ଛା ଶକ୍ତିର ଅଭାବ ଯୋଗୁଁ ଆଜି ପର୍ଯ୍ଯନ୍ତ ଗ୍ରାମାଞ୍ଚଳରେ ସବୁଦିନିଆ ରାସ୍ତା ହୋଇପାରିନି । କଣ୍ଟାମାଳ ବ୍ଲକ ଆମ୍ବଗାଁ ପଞ୍ଚାୟତ ଅନ୍ତର୍ଗତ ଦେଢେଣମାଳ ଠାରୁ ଉମା ପଞ୍ଚାୟତ ଅନ୍ତର୍ଗତ ଫଟାମୁଣ୍ତାକୁ ସଂଯୋଗ କରୁଥିବା ରାସ୍ତା ମଝିରେ ସମଲେଶ୍ୱରୀ ନାଳ ପ୍ରବାହିତ ହେଉଛି । ଉକ୍ତ ନାଳ ଉପରେ ପୋଲ ନିର୍ମାଣ ହୋଇ ନଥିବାରୁ ଅଞ୍ଚଳବାସୀଙ୍କୁ ବର୍ଷା ୪ମାସ ବହୁକଷ୍ଟ ସହିବାକୁ ପଡେ । ଏହି ରାସ୍ତା ଉପରେ ବରହାକାଲୁ, ଢ଼େକଲମୁଣ୍ଡା, ଦେଢେଣମାଳ, ସମାକୁପା, ରେଘାମୁଣ୍ଡା, ଉଡେନ, ଭାଞ୍ଜିବେଡା, ଗୋଡ଼ମେଣ୍ଡା ଆଦି ୮ଖଣ୍ତ ମୌଜାର ଲୋକେ ଡାକ୍ତରଖାନା, ବିଦ୍ୟାଳୟ ଆଦି କାମରେ ଦୈନନ୍ଦିନ ନିର୍ଭର କରିଥାନ୍ତି । ସେହିପରି ବଜାର, ବ୍ୟବସାୟ ଏବଂ ଅନ୍ୟାନ୍ୟ କାର୍ଯ୍ୟରେ ନାରାୟଣପ୍ରସାଦ, ବରଗାଁ, ଉମା, ଖୁଣ୍ଟିଗୋରା, ଆମ୍ବାଗାଁ, ଖମନମୁଣ୍ଡା ଆଦି ପଞ୍ଚାୟତର ଶତାଧିକ ଲୋକ ଯାତାୟତ କରିଥାନ୍ତି l କିନ୍ତୁ ପୋଲ ନିର୍ମାଣ ହୋଇ ନଥିବାରୁ ମାତ୍ର ୩କିମି ରାସ୍ତା ବଦଳରେ ଉମା କିମ୍ବା ଆମ୍ବାଗାଁ ପଞ୍ଚାୟତ କାର୍ଯ୍ୟାଳୟ ଦେଇ ୧୦ କିମି ବୁଲିବାକୁ ପଡିଥାଏ । ପୋଲ ନିର୍ମାଣ କରିବା ପାଇଁ ଅଞ୍ଚଳବାସୀ ଦୀର୍ଘ ଦିନରୁ ବ୍ଲକ ଓ ଜିଲା ପ୍ରଶାସନ ନିକଟରେ ଦାବି କରିଆସୁଛନ୍ତି l ଗ୍ରାମ ଉନ୍ନୟନ ବିଭାଗ ପକ୍ଷରୁ ସର୍ବେକ୍ଷଣ ମଧ୍ୟ କରାଯାଇଥିଲା କିନ୍ତୁ ପ୍ରଶାସନିକ ସ୍ତରରେ ଗୁରୁତ୍ବ ଦେଉ ନଥିବା ଫଳରେ ଅଞ୍ଚଳବାସୀଙ୍କ ମନରେ ନାହିଁ ନଥିବା ଅସନ୍ତୋଷ ଦେଖା ଦେଇଛି । ଜିଲ୍ଲା ପ୍ରଶାସନ ଅଞ୍ଚଳବାସୀଙ୍କ ସାମୁହିକ ସ୍ବାର୍ଥକୁ ଦୃଷ୍ଟିରେ ରଖି ଉକ୍ତ ନାଳ ଉପରେ ପୋଲ ନିର୍ମାଣ କରିବାକୁ ସମାଜସେବୀ ବଂଶୀଧର ମାଝୀ ଦାବି କରିଛନ୍ତି ।