14-Jul-2024

ତୁଷୁରା(ପଞ୍ଚାନନ ନାଏକ): ଜ୍ଞାନ ପ୍ରକାଶ ର ଅଷ୍ଟମ ଇଣ୍ଟର୍‌ଡିସିପ୍ଲିନାରୀ ନେସନାଲ୍ କନଫରେନ୍‌ସ ରବିବାର ପୂର୍ବାହ୍ନ ୧୦ ଘଟିଟାରୁ ସଂଧ୍ୟା ୬ଘ.୩୦ ମି. ପର୍ଯ୍ୟନ୍ତ ରାଜଧାନୀ ଭୁବନେଶ୍ୱର ସ୍ଥିତ ଜୟଦେବ ଭବନଠାରେ ଏକ ବର୍ଣ୍ଣାଢ଼୍ୟ ଉତ୍ସବ ମହା ସମାରୋହରେ ପାଳିତ ହୋଇଯାଇଛି। ଜ୍ଞାନ ପ୍ରକାଶ ର ପ୍ରତିଷ୍ଠାତା ଜ୍ଞାନଚାନ୍ଦ ଶତପଥୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବେ କାଦମ୍ବିନୀର ସମ୍ପାଦିକା ଇତିରାଣୀ ସାମନ୍ତ, ମୁଖ୍ୟବକ୍ତା ଭାବେ ଏନ୍.ସି.ଇ.ଆର୍.ଟି ର ଶିକ୍ଷା ବିଭାଗ ମୁଖ୍ୟ ଡଃ ଲକ୍ଷ୍ମୀଧର ବେହେରା ଯୋଗ ଦେଇ ଥିବାବେଳେ ସମ୍ମାନିତ ଅତିଥି ଭାବେ ଓଡ଼ିଶା ସରକାରଙ୍କ ଗଣଶିକ୍ଷା ବିଭାଗର ଯୁଗ୍ମ ସଚିବ  ଚିତ୍ତରଞ୍ଜନ ପାଣିଗ୍ରାହୀ ଓ ଦିଲ୍ଲୀ ର ଏଡଭୋକେଟ୍ ନରେଶ ବାରଣା ଯୋଗ ଦେଇଥିଲେ। ଜ୍ଞାନ ପ୍ରକାଶ ର ରାଜ୍ଯ ମୁଖ୍ୟ ଅମ୍ବିକା ସ୍ବାଇଁ, ସମ୍ପାଦକ ସରୋଜ କୁମାର ସାହୁ ମଞ୍ଚାସୀନ ଥିଲେ । ଏହି ଅବସରରେ ମଞ୍ଚାସୀନ ଅତିଥି ବୃନ୍ଦ ବଲାଙ୍ଗିର ଜିଲ୍ଲା ଅନ୍ତର୍ଗତ ତୁଷୁରା ର *ଆଶୁକବି ହେମନ୍ତ ଦାଶଙ୍କୁ ଜ୍ଞାନ ପ୍ରକାଶ ସାହିତ୍ୟ ସମ୍ମାନ-୨୦୨୪* ରେ ସମ୍ମାନିତ କରିଥିଲେ। ଶ୍ରୀ ଦାଶଙ୍କୁ ପ୍ରଶସ୍ତି ପତ୍ର, ଅଙ୍ଗବସ୍ତ୍ର,ମୋମେଣ୍ଟୋ ଓ ପୁଷ୍ପଗୁଚ୍ଛ ପ୍ରଦାନ କରି ସମ୍ବର୍ଦ୍ଧିତ କରିଥିଲେ। ଏ ଖବର ପ୍ରଘଟ ହେବା ପରେ ବଲାଙ୍ଗିର ଜିଲ୍ଲା ତଥା ରାଜ୍ୟର ବିଭିନ୍ନ ସାହିତ୍ୟିକ, ଶୁଭେଚ୍ଛା, ବନ୍ଧୁବର୍ଗ ଶ୍ରୀ ଦାଶଙ୍କୁ ଶୁଭେଚ୍ଛା ଜଣାଇଛନ୍ତି। ଶ୍ରୀ ଦାଶ ନିଜ ପ୍ରତିକ୍ରିୟାରେ କହିଛନ୍ତି ଯେ, ଏହା ମୋ ପାଇଁ ଅଧିକ ସାହିତ୍ୟ ସର୍ଜନା କରିବା ପାଇଁ ପ୍ରେରଣା ଯୋଗାଇବ ବୋଲି କହିଛନ୍ତି। ଶ୍ରୀ ଦାଶ ନିଷାନର ପ୍ରତିଷ୍ଠାତା ସମ୍ପାଦକ, ଶ୍ରୀଚନ୍ଦନ ସାହିତ୍ୟ ସଂସ୍କୃତି ଏକାଡେମୀ କଟକ ର ସଂଗଠନ ସମ୍ପାଦକ, ସମ୍ବାଦ ସାହିତ୍ୟ ଘର ଗୁଡଭେଲା ର ସମ୍ପାଦକ ଓ ବିଧୁଭୂଷଣ ସାହିତ୍ୟ ସଂସଦ ତୁଷୁରା ର ସମ୍ପାଦକ ଭାବେ ତୁଷୁରା ଅଞ୍ଚଳରେ ସାହିତ୍ୟ କ୍ଷେତ୍ରରେ ଏକ ଆନ୍ଦୋଳନ ସୃଷ୍ଟି କରିଛନ୍ତି ।