13-Jul-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ତୁଷୁରା ସରକାରୀ ହସ୍ପିଟାଲ ପରିସରରେ ଷ୍ଟଲ୍ ନିର୍ମାଣକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ସରକାରୀ ଡାକ୍ତରଖାନା ପରିସରରେ ଔଷଧଦୋକାନ ଖୋଲିବାକୁ ନିଷେଧ କରାଯାଇଥିବା ବେଳେ ରୋଗୀ କଲ୍ୟାଣ ସମିତି ଆଳରେ ଏଠାରେ ୧୦ଟି ଷ୍ଟଲ୍ ନିର୍ମାଣ କରାଯାଉଛି, ଯାହାର ଗେଟ୍ ପାଖର ବାହାରପଟକୁ ମୁହଁ ଥିବା ଷ୍ଟଲ୍ ଟିରେ ଏକ ଔଷଧଦୋକାନ ଖୋଲିବାକୁ ଯାଉଥିବା କୁହାଯାଉଛି । ତୁଷୁରା ଜିଲ୍ଲାର ଏକ ମାରୁଆଡି ଅଧ୍ୟୁଷିତ ବ୍ୟବସାୟିକ ପେଣ୍ଠସ୍ଥଳୀ ହୋଇଥିବାରୁ ବଜାରର ମୁଖ୍ୟସ୍ଥଳରେ ଅବସ୍ଥିତ ଏହି ହାସପାତାଳର ପରିସରରେ ଦୋକାନଘରର ଯଥେଷ୍ଟ ଚାହିଦା ରହିଛି । ଏଣୁ ଷ୍ଟଲ୍ ବୁକିଂ ପାଇଁ ଲକ୍ଷାଧିକ ଟଙ୍କାର ଅଗ୍ରୀମ ସଂଗ୍ରହ କରାଯାଇଥିବା ଜଣାଯାଇଛି । ତେବେ ଏହାକୁ ବେଆଇନ୍ ଅଭିଯୋଗ କରାଯାଇ ସ୍ଥାନୀୟ ଲୋକଙ୍କ ପକ୍ଷରୁ ଉପରିସ୍ଥ ଜିଲ୍ଲା ସ୍ବାସ୍ଥ୍ୟ କର୍ତ୍ତୃପକ୍ଷଙ୍କ ଦୃଷ୍ଟିଆକର୍ଷଣ କରାଯିବାରୁ ବଲାଙ୍ଗୀର ସିଡିଏମଓ ଏହି ନିର୍ମାଣ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି । ତେବେ ତାଙ୍କ ନିର୍ଦ୍ଦେଶକୁ ବେଖାତିର୍ କରାଯାଇ ନିର୍ମାଣ କାମ ଚାଲୁ ରହିଛି । 

ଏ ସମ୍ପର୍କରେ ଏହି ହାସପାତାଳର ମେଡିକାଲ ଅଫିସର ଥିବା ଡା ଲଲାଟେନ୍ଦୁ ନାୟକଙ୍କ ସହ ଯୋଗାଯୋଗ କରାଯିବାରୁ ସେ ଏହା ରୋଗୀ କଲ୍ୟାଣ ସମିତି କରୁଛି । ସେଥିରେ ମୋର କିଛିନାହିଁ କହି ସଫେଇ ଦେଇଛନ୍ତି । ଏ ସମ୍ପର୍କରେ ସିଡିଏମଓ ଡା ପ୍ରଦୀପ କୁମାର ଗୁରୁ କହିଛନ୍ତି ଯେ, ' ମୁଁ  ନିର୍ମାଣ ବନ୍ଦ ପାଇଁ ନିର୍ଦ୍ଦେଶ ଦେଇଛି ।  ଏ ସମ୍ପର୍କରେ ସରକାରଙ୍କୁ ମଧ୍ୟ ଜଣାଇ ଦେଇଛି ।  ନ ମାନିଲେ ଥାନାରେ ଏତଲା ଦିଆଯିବ । ' ସର୍ବଶେଷ ସୂଚନା ଅନୁଯାୟୀ, ଆଜି ଏ ସମ୍ପର୍କରେ ସ୍ବାସ୍ଥ୍ୟମନ୍ତ୍ରୀ ବଲାଙ୍ଗୀର ଆସିଥିବା ଅବସରରେ ତାଙ୍କର ଦୃଷ୍ଟିଆକର୍ଷଣ ମଧ୍ୟ କରାଯାଇଛି ।

ଉଲ୍ଲେଖନୀୟ ଯେ ସ୍ବାସ୍ଥ୍ୟମନ୍ତ୍ରୀ ଡା ମୁକେଶ ମହାଲିଙ୍ଗ ବଲାଙ୍ଗୀର ଜିଲ୍ଲାର ବାସିନ୍ଦା ହୋଇଥିବାବେଳେ ଉକ୍ତ ଡାକ୍ତର ଜଣକ ମଧ୍ୟ ତୁଷୁରା ନିକଟସ୍ଥ କୁତୁର୍ଲାର ବାସିନ୍ଦା ଅଟନ୍ତି ।  ଶୁଣିବାକୁ ମିଳିଛି ଯେ ସେ ଗତ ବିଜେଡି ସରକାରର ସ୍ଥାନୀୟ ମନ୍ତ୍ରୀ ଟୁକୁନୀ ସାହୁଙ୍କ ସୁପାରିଶ୍ ରେ ଏହି ଷ୍ଟଲ୍ ନିର୍ମାଣର ଆଦେଶ ହାତେଇଥିଲେ ଓ ଏତଦ୍ଦ୍ୱାରା ଡାକ୍ତରଖାନାକୁ ଆର୍ଥିକ ସହାୟତା ମିଳିପାରିବ ଆଳରେ ଷ୍ଟଲ୍ ବିକା ଅର୍ଥରେ ଏହାର ନିର୍ମାଣ ଚାଲିଛି । ଏହି ଡାକ୍ତରଙ୍କ ସହ ପୂର୍ବମନ୍ତ୍ରୀ ଟୁକୁନୀ ସାହୁଙ୍କର ରାଜନୈତିକ ସମ୍ପର୍କ ଥିବା ଓ ସେ  ଚାକିରୀରୁ ଇସ୍ତଫା ଦେଇ ଗତ ନିର୍ବାଚନରେ ରେଢାଖୋଲରୁ ବିଧାୟକ ପ୍ରାର୍ଥୀ ମଧ୍ୟ ହୋଇଥିବା ଶୁଣିବାକୁ ମିଳିଛି । ପରେ ସେ ପୁଣି ଚାକିରୀରେ ଯୋଗଦେଇ ଏଠାରେ ଏମ୍ ଓ ଭାବରେ ଅବସ୍ଥାପିତ ଅଛନ୍ତି । ସେ ଯାହାହେଉ, ସଂପ୍ରତି ଏହି ସରକାରୀ ଡାକ୍ତରଖାନା ପରିସରରେ ଅଭିଯୋଗ ହେଉଥିବା ବେଆଇନ୍ ଷ୍ଟଲ୍ ନିର୍ମାଣ ବିବାଦୀୟ ହୋଇପଡିଛି । ତେବେ କିଏ ଠିକ୍  ? ସିଡିଏମଓ ନା ମେଡିକାଲ ଅଫିସର  ? ଏଥିରେ ପ୍ରକୃତରେ ଉକ୍ତ ଡାକ୍ତରଙ୍କର ହାତ ଅଛି କି ନାହିଁ,  ତଦନ୍ତସାପେକ୍ଷ ।